ລາວເລັ່ງແກ້ໄຂວຽກເຮັດງານທຳໃຫ້ແຮງງານລາວກັບມາຈາກປະເທດໄທ

ໃນວັນທີ 7 ພຶດສະພານີ້, ກະຊວງ ແຮງງານ ແລະ ສະຫວັດດີການສັງຄົມ, ໄດ້ຈັດກອງປະຊຸມປຶກສາຫາລືການຊ່ວຍເຫຼືອຜູ້ອອກແຮງງານທີ່ກັບຈາກຕ່າງປະເທດ ຮ່ວມກັບສູນບໍລິການຈັດຫາງານ ແລະ ບໍລິສັດຈັດຫາງານ ໂດຍການເຂົ້າຮ່ວມຂອງທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.
ຫົວໜ້າກົມພັດທະນາສີມືແຮງງານ ແລະ ຈັດຫາງານ ໃຫ້ຮູ້ວ່າ: ຜ່ານການປະສານງານເພື່ອເກັບກຳຕົວເລກຂອງພົນລະເມືອງລາວທີ່ກັບຄືນຈາກປະເທດໄທ ແຕ່ວັນທີ 11ມີນາ-4 ພຶສະພານີ້ ມີຈໍານວນ 79.208 ຄົນ ແລະ ຍັງມີ ຜູ້ອອກແຮງງານຈຳນວນບໍ່ໜ່ອຍຍັງທະຍອຍ ກັບຄືນ ມາຈາກປະເທດໄທ ໂດຍຜ່ານດ່ານຕ່າງໆ ແລະ ຜ່ານມາກົມແຮງງານກໍໄດ້ປະສານສົມທົບກັບຜູ້ຊ່ວຍວຽກທາງດ້ານແຮງງານປະຈຳຢູ່ສະຖານທູດ ລາວ ທີບາງກອກ, ເພື່ອຕິດຕາມ ແລະ ລາຍງານສະພາບຢ່າງປົກກະຕິ;ໃນຜ່ານມາການເດີນທາງກັບຄືນປະເທດຂອງຜູ້ອອກແຮງງານ ໃນຊ່ວງເວລາປະກາດປິດດ່ານ ແມ່ນສ້າງຄວາມຫຍຸ້ງຍາກບໍ່ຫນ້ອຍໃນ ການຮັບເອົາແຮງງານໄປສູ່ຖິ່ນຖານ, ການກວດກາພະຍາດ, ການປິ່ນປົວ, ລວມທັງການປະຕິບັດຕາມມາດຕະການຕ່າງໆຂອງກະຊວງສາທາລະນະສຸກ ກ່ຽວກັບການປ້ອງກັນການລະບາດຂອງພະຍາດໂຄວິດ-19, ໃນກອງປະຊຸມໄດ້ສະເໜີໃຫ້ສູນບໍລິການຈັດຫາງານ ແລະ ບໍລິສັດຈັດຫາງານ ປະຕິບັດຕາມແຈ້ງການຂອງກະຊວງແຮງງານ ແລະ ສະຫວັດດີການສັງຄົມຢ່າງເຂັ້ມງວດ ໃນການຕິດຕາມ, ເກັບກຳຂໍ້ມູນ ແລະ ໃຫ້ການຊ່ວຍເຫຼືອຜູ້ອອກແຮງງານ; ສະເໜີໃຫ້ບໍລິສັດຈັດຫາງານປະກອບສ່ວນທາງດ້ານງົບປະມານ ໃຫ້ແກ່ຄະນະສະເພາະກິດ ໃນການຮັບເອົາຜູ້ອອກແຮງງານລາວທີ່ກັບມາຈາກປະເທດໄທ.
ໃນກອງປະຊຸມ, ທ່ານ ຮອງລັດຖະມົນຕີ ໄດ້ຍົກໃຫ້ເຫັນວ່າ: ການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID 19) ໄດ້ສົ່ງຜົນກະທົບຢ່າງໃຫຍ່ຫຼວງຕໍ່ກັບການພັດທະນາເສດຖະກິດສັງຄົມ ແລະ ຊີວິດການເປັນຢູ່ ຂອງປະຊາກອນ ຢູ່ໃນໂລກ ເນື່ອງຈາກຫົວໜ່ວຍທຸລະກິດ ໄດ້ມີການໂຈະ ແລະ ປິດກິດຈະການ ຊຶ່ງເຮັດໃຫ້ຕ້ອງໄດ້ໂຈະການຈ້າງງານ ແລະ ຢຸດການຈ້າງງານຢ່າງຖາວອນ. ອີງຕາມການຄາດຄະເນຂອງອົງການແຮງງານສາກົນ ໃນທົ່ວໂລກ ຈະມີຜູ້ວ່າງງານເນື່ອງຈາກພະຍາດໂຄວິດ 19 ສູງເຖິງ 25 ລ້ານຄົນ ຊຶ່ງຈະສູນເສຍລາຍຮັບປະມານ 3,4 ຕື້ ໂດລາສະຫະລັດ. ສຳລັບ ສປປ ລາວ ແລ້ວ ຫົວໜ່ວຍແຮງງານ, ໂຄງການ ແລະ ໂຮງຈັກໂຮງງານຫຼາຍແຫ່ງກໍ່ມີການໂຈະ ແລະ ປິດກິດຈະການ ເຊັ່ນກັນ ຊຶ່ງຜູ້ອອກແຮງງານໃນລະບົບ, ນອກລະບົບ ລວມເຖິງຜູ້ປະກອບອາຊີບອິດສະຫຼະ ກໍ່ໄດ້ຮັບຜົນກະທົບຫຼາຍສົມຄວນ. ຄຽງຄູ່ກັນນັ້ນ, ປະຊາຊົນລາວທີ່ອອກແຮງງານຢູ່ປະເທດໄທແບບຖືກຕ້ອງ ແລະ ບໍ່ຖືກຕ້ອງຕາມກົດໝາຍ ກໍຈະຕ້ອງໄດ້ໃຫ້ການຊ່ວຍເຫຼືອເຂົາເຈົ້າ ຊຶ່ງໄລຍະຜ່ານມາກໍ່ເຫັນວ່າ ກົມກອງທີ່ກ່ຽວຂ້ອງ ກໍ່ໄດ້ເອົາໃຈໃສ່ເປັນຢ່າງດີໃນການປະສານງານ ແລະ ພົວພັນກັບປະເທດໄທ ເພື່ອຕິດຕາມສະພາບທາງດ້ານນະໂຍບາຍຕໍ່ຜູ້ອອກແຮງງານ ເປັນໄລຍະ ແລະ ຮ່ວມກັບສູນບໍລິການຈັດຫາງານ, ບໍລິສັດຈັດຫາງານ ລວມທັງ ພະແນກ ແຮງງານ ແລະ ສະຫວັດດີກາສັງຄົມແຂວງ ແລະ ນະຄອນຫຼວງ ເພື່ອຕິດຕາມ ແລະ ໃຫ້ການຊ່ວຍເຫຼືອ ຜູ້ອອກແຮງງານທີ່ເດີນທາງກັບຈາກປະເທດໄທ ໃນດ້ານຕ່າງໆ ທີ່ຈຳເປັນ. ແຕ່ເຖິງຢ່າງໃດກໍ່ຕາມການໃຫ້ການຊ່ວຍເຫຼືອນັ້ນ ແມ່ນຍັງບໍ່ທັນທົ່ວເຖິງ ແລະ ເປັນພຽງການບັນເທົາໃນຊ່ວງວິກິດການເທົ່ານັ້ນ. ສະນັ້ນ, ເພື່ອເປັນການຊ່ວຍໃຫ້ຜູ້ອອກແຮງງານທີ່ກັບຈາກຕ່າງປະເທດ ໄດ້ຮັບຜົນກະທົບຈາກການລະບາດຂອງໂຄວິດ– 19 ໄດ້ຮັບການປົກປ້ອງສິດ ແລະ ຜົນປະໂຫຍດຫລາຍຂຶ້ນເພື່ອ ບັນຈຸເຂົາເຈົ້າເຂົ້າເຮັດວຽກ ຕາມເງື່ອນໄຂ ແລະ ຄວາມຕ້ອງການຂອງຫົວໜ່ວຍແຮງງານ ພາຍໃນປະເທດ ເຫັນວ່າ ກອງປະຊຸມປຶກສາຫາລື ໃນຄັ້ງນີ້ ແມ່ນມີຄວາມສຳຄັນ ແລະ ຈຳເປັນ ທີ່ສຸດ ເພື່ອເປີດໂອກາດໃຫ້ສູນບໍລິການຈັດຫາງານ ແລະ ບໍລິສັດຈັດຫາງານ ໄດ້ລາຍງານສະພາບຂອງແຮງງານ, ສະເໜີຂໍ້ສະດວກ ແລະ ຄວາມຫຍຸ້ງຍາກ, ບັນຫາຕ່າງໆ ພ້ອມທັງກຳນົດທິດທາງແກ້ໄຂຮ່ວມກັນ ເພື່ອເຮັດໃຫ້ຜູ້ອອກແຮງງານທີ່ໄດ້ຮັບຜົນກະທົບ ໄດ້ຮັບການແກ້ໄຂ ທ່ວງທັນກັບສະພາບການ.