UN ຮຽກຮ້ອງເພີ່ມບ້ວງເງິນຊ່ວຍເຫລືອປະເທດທຸກຍາກ 6,7ຕື້ໂດລາສະຫະລັດ
ແຫລງຂ່າວຈາກ ເຈນິວາ ລາຍງານໃຫ້ຮູ້ວ່າ: ໃນວັນທີ 8 ພຶດສະພານີ້, ສະຫະປະຊາຊາດ (ສປຊ) ຫລື UN ໄດ້ຮຽກຮ້ອງໃຫ້ເພີ່ມບ້ວງເງິນຊ່ວຍເຫລືອປະເທດ ແລະ ເຂດແຄ້ວນທີ່ທຸກຍາກໃນການຮັບມືກັບການແຜ່ລະບາດເຊື້ອພະຍາດ ໂຄວິດ-19 ຂຶ້ນເປັນ 6,7 ຕື້ໂດລາ ສະຫະລັດ ຈາກເມື່ອກ່ອນເຄີຍຮຽກຮ້ອງໃຫ້ຕັ້ງກອງທຶນ 2 ຕື້ໂດລາ ສະຫະລັດ.
ຈຸດປະສົງຕົ້ນຕໍຂອງໂຄງການດັ່ງກ່າວ ເພື່ອຈະນຳໃຊ້ເຂົ້າໃນການຈັດຫາຢາປິ່ນປົວ ແລະ ອາຫານ ໃຫ້ແກ່ບັນດາປະເທດ ແລະ ເຂດແຄ້ວນທີ່ມີລະບົບການປິ່ນປົວ ອ່ອນແອ ເຊັ່ນ: ປະເທດພວມພັດທະນາທີ່ມີຄວາມຂັດແຍ່ງເກີດຂຶ້ນ, ໄລ່ເຖິງຕົ້ນອາທິດນີ້ ຍີ່ປຸ່ນ, ສ.ອາເມລິກາ ແລະ ອີກຫລາຍປະເທດສາມາດຮ່ວມກັນລະດົມທຶນໄດ້ແລ້ວ 923 ລ້ານໂດລາ ສະຫະລັດ ເພື່ອຊ່ວຍເຫລືອໃຫ້ແກ່ 54 ປະເທດ ແລະ ເຂດແຄ້ວນ. UN ຕ້ອງການນຳເງິນຈາກກອງທຶນພິເສດໄປເສີມສ້າງມາດຕະການທີ່ມີຢູ່ແລ້ວ ແລະ ເພີ່ມຈຳນວນປະເທດ ທີ່ຕ້ອງໃຫ້ຄວາມຊ່ວຍເຫລືອ ອີກ 9 ປະເທດ ລວມເຖິງ ໂມຊຳບິກ ແລະ ປາກິດສະຖານ ໂດຍເລຂາທິການໃຫຍ່ UN ຖະແຫລງວ່າ: ຈຳເປັນຕ້ອງໃຊ້ເງິນ ເພື່ອຊ່ວຍເຫລືອຊີວິດຜູ້ຄົນນັບລ້ານຢູ່ໃນບັນດາປະເທດທຸກຍາກ ແລະ ເພື່ອສະກັດກັ້ນບໍ່ໃຫ້ເຊື້ອພະຍາດດັ່ງກ່າວກັບ ຄືນມາແຜ່ລະບາດຢູ່ທົ່ວໂລກ.
