ອິນເດຍເລີ່ມທົດລອງ “ຢາອາຍຸຣະເວດ” ສູ້ໂຄວິດ-19
ໃນວັນທີ 7 ພຶດສະພາ, ທ່ານ Harsh Vardhan ລັດຖະມົນຕີກະຊວງສາທາລະນະສຸກຂອງອິນເດຍ ເປີດເຜີຍວ່າ: ອິນເດຍເລີ່ມດຳເນີນການທົດລອງທາງຄລີນິກກັບຢາອາຍຸຣະເວດ ເພື່ອຕ້ານໂຣກຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ແລ້ວ.
“ມື້ນີ້ເປັນມື້ສຳຄັນໃນການຕໍ່ສູ້ກັບໂຄວິດ-19 ທີ່ກຳລັງເກີດຂຶ້ນທົ່ວໂລກ ເຊິ່ງສ້າງຄວາມຍາກລຳບາກເປັນວົງກວ້າງ ດ້ວຍການເນັ້ນເຖິງສະຖານະການດັ່ງກ່າວ ອິນເດຍຈຶ່ງໄດ້ເລີ່ມດຳເນີນງານຄັ້ງປະຫວັດສາດຂຶ້ນ” ລັດຖະມົນຕີສາທາອິນເດຍ ກ່າວ.
“ປັດຈຸບັນການທົດລອງທາງຄລີນິກຂອງຢາອາຍຸຣະເວດຕ່າງໆໄດ້ເລີ່ມຕົ້ນຂຶ້ນແລ້ວເຊັ່ນ: ໂສມອິນເດຍ (Ashwagandha), ຊະເອມສະກັດ (Yashtimadhu), ກະບອງເພັດສະກັດ (Guduchi), ດີປລີ (Pippali), ສາລະພັດພະຍາສັດຕະບັນ (Ayush-64) ໂດຍເປັນການທົດລອງກັບກຸ່ມເຈົ້າໜ້າທີ່ສາທາລະນະສຸກ ແລະ ຜູ້ປະຕິບັດງານໃນແນວໜ້າທີ່ມີຄວາມສ່ຽງສູງ”.
ລັດຖະມົນຕີສາທາ ລະບຸວ່າ: ກະຊວງອາຍຸຣະເວດ ແລະ ການແພດແຜນບູຮານ ກະຊວງສາທາລະນະສຸກ ແລະ ກະຊວງວິທະຍາສາດ ແລະ ເຕັກໂນໂລຊີຂອງອິນເດຍ ດຳເນີນການທົດລອງຕ່າງໆ ຜ່ານສະພາວິໄຈວິທະຍາສາດ ແລະ ອຸດສາຫະກຳ (CSIR) ໂດຍໄດ້ຮັບການສະໜັບສະໜູນທາງເຕັກນິກຈາກສະພາວິໄຈທາງການແພດອິນເດຍ (ICMR) ເຊິ່ງເປັນໜ່ວຍງານວິໄຈດ້ານສາທາລະນະສຸກສູງສຸດຂອງປະເທດ.
ລັດຖະມົນຕີສາທາ ລະບຸວ່າ: ການທົດລອງຕ່າງໆດັ່ງກ່າວຢູ່ລະຫວ່າງດຳເນີນການເພື່ອສຶກສາສັບພະຄຸນຂອງຢາອາຍຸຣະເວດໃນການຕໍ່ສູ້ກັບໂຄວິດ-19.
ຂະນະດຽວກັນ ສະພາວິໄຈທາງການແພດອິນເດຍ ໄດ້ເລີ່ມທົດລອງທາງຄລີນິກທີ່ຈັດຮ່ວມກັນໂດຍຫລາຍສະຖາບັນ ເພື່ອຕີລາຄາຄວາມປອດໄພຂອງການໃຊ້ນ້ຳເລືອດທີ່ມີໂປຣຕິນພູມຄຸ້ມກັນ (convalescent plasma) ໃນການຫລຸດສະພາບແຊກຊ້ອນທີ່ກ່ຽວຂ້ອງກັບໂຄວິດ-19.
ສະພາວິໄຈທາງການແພດອິນເດຍ ລະບຸວ່າ: ນ້ຳເລືອດທີ່ມີໂປຣຕິນພູມຄຸ້ມກັນເປັນໜຶ່ງໃນບັນດາວິທີປິ່ນປົວທີ່ເກີດຂຶ້ນໃໝ່, ແຕ່ຍັງບໍ່ມີຫລັກຖານສະໜັບສະໜູນຈະແຈ້ງວ່າ: ໃຫ້ໃຊ້ໃນການປິ່ນປົວຕາມປົກກະຕິໄດ້.
ນອກຈາກນີ້ ໃນເດືອນເມສາຜ່ານມາ, ສະພາວິໄຈທາງການແພດອິນເດຍ ເປີດເຜີຍວ່າ: ປັດຈຸບັນຍັງບໍ່ມີວິທີປິ່ນປົວທີ່ກຳນົດແນ່ນອນ ແລະ ໄດ້ຮັບການຮັບຮອງສຳລັບໂຄວິດ-19.
ທັງນີ້ ສູນວິທະຍາສາດ ແລະ ວິສະວະກຳທາງລະບົບ (CSSE) ມະຫາວິທະຍາໄລຈອນ ຮອບກິນ ລາຍງານວ່າ: ອິນເດຍມີຜູ້ຕິດເຊື້ອໂຄວິດ-19 ທັງໝົດ 53.045 ຄົນ ແລະ ມີຜູ້ເສຍຊີວິດ 1.787 ຄົນ (ນັບຮອດເວລາ 16:32 ໂມງ ຂອງວັນທີ 7 ພຶດສະພາ).
