ສິງກະໂປໃຈປ້ຳ ກຽມແຈກຜ້າອັດປາກ-ດັງ ກອງແບກທີເຣຍຢ່າງດີ ໃຫ້ພົນລະເມືອງອີກຮອບ
ປະຊາຊົນສິງກະໂປຈະໄດ້ຮັບແຈກຜ້າອັດປາກ-ດັງຟຣີຈາກລັດຖະບານເປັນຮອບທີ 3 ໂດຍຮອບນີ້ຈະເປັນແບບຢ່າງດີທີ່ສາມາດກອງແບກທີເຣຍໄດ້ນຳອີກ.
ລັດຖະບານສິງກະໂປກຽມແຈກຜ້າອັດປາກ-ດັງໃຫ້ແກ່ພົນລະເມືອງທົ່ວປະເທດເປັນຮອບທີ 3 ຫລັງຈາກທີ່ມີການແຈກໄປແລ້ວ 2 ຮອບ ຄືຮອບທຳອິດເດືອນກຸມພາ ເປັນການແຈກຜ້າອັດປາກ-ດັງ 4 ອັນຕໍ່ 1 ຄອບຄົວ ແລະ ຮອບສອງເປັນຜ້າອັດປາກ-ດັງທີ່ສາມາດຊັກໃຊ້ຊ້ຳໄດ້ ໃນເດືອນເມສາຜ່ານມາ ໂດຍໃຫ້ປະຊາຊົນສາມາດໄປຮັບຜ້າອັດປາກ-ດັງທີ່ລັດຖະບານແຈກຢາຍໄດ້ຈາກສູນຊຸມຊົນທີ່ປະຊາຊົນອາໄສຢູ່.
ສ່ວນການແຈກຜ້າອັດປາກ-ດັງຮອບທີ 3 ນີ້ຈະເປັນເນື້ອຜ້າຢ່າງດີທີ່ມີຄຸນສົມບັດໃນການກອງເຊື້ອແບກທີເຣຍ ສາມາດຊັກດ້ວຍມື ແລະ ເອົາກັບມາໃຊ້ໃໝ່ໄດ້ດົນເຖິງ 1 ເດືອນ ເຊິ່ງຈະເລີ່ມແຈກໃຫ້ປະຊາຊົນຫລັງສິ້ນສຸດມາດຕະການ ເຊີກິດເບຣກເກີ ໂດຍຄັ້ງນີ້ຈະເປັນຄັ້ງທຳອິດທີ່ປະຊາຊົນສາມາດໄປຮັບຜ້າອັດປາກ-ດັງໄດ້ຈາກເຄື່ອງກົດອັດຕະໂນມັດທີ່ຈະຕິດຕັ້ງໄວ້ໃຫ້ບໍລິການໄດ້ຕະຫລອດ 24 ຊົ່ວໂມງ.
ທັງນີ້ ສິງກະໂປເລີ່ມມີການຜະລິດຜ້າອັດປາກ-ດັງແບບຜ້າ ແລະ ເກັບໄວ້ໃຊ້ພາຍໃນປະເທດນັບແຕ່ເດືອນກຸມພາຜ່ານມາ ຈາກທີ່ເຄີຍອາໄສການນຳເຂົ້າຈາກຕ່າງປະເທດເປັນຫລັກ ໂດຍເລີ່ມມີການວິໄຈ ແລະ ພັດທະນາ ເພື່ອໃຫ້ໄດ້ວັດຖຸດິບທີ່ມີຄຸນນະພາບດີກວ່າຜ້າອັດປາກ-ດັງແບບຜ້າທຳມະດາທົ່ວໄປ ແລະ ສາມາດຫາຍໃຈໄດ້ສະດວກ ເຊິ່ງການທີ່ລັດຖະບານຕັດສິນໃຈແຈກໃຫ້ອີກຮອບ ເພື່ອໃຫ້ພຽງພໍຕໍ່ຄວາມຕ້ອງການໃຊ້ ເພື່ອແທນຜ້າອັດປາກ-ດັງຊຸດກ່ອນທີ່ຈະເສື່ອມສະພາບ ແລະ ໝົດອາຍຸການໃຊ້ໃນອີກບໍ່ດົນ.
