ເຕືອນລະວັງມັລແວທີ່ເຈາະລະບົບອາດດັດແປງ ປັ່ນປ່ວນໂຄງສ້າງພື້ນຖານທົ່ວໂລກ
ວໍຊິງຕັນ 13 ມິຖຸນາ: ບໍລິສັດຄວາມປອດໄພໂລກອິນເຕີເນັດ 2 ແຫ່ງພົບມັລແວທີ່ເຊື່ອວ່າເປັນສາເຫດເຮັດໃຫ້ໄຟຟ້າມອດທົ່ວອູແກຣນໃນເດືອນທັນວາປີກ່ອນ ແລະ ອາດຖືກເຈາະລະບົບນຳໄປດັດແປງຢ່າງງ່າຍດາຍ ເພື່ອສ້າງຄວາມປັ່ນປ່ວນໃຫ້ແກ່ການເຮັດວຽກຂອງໂຄງສ້າງພື້ນຖານສຳຄັນທົ່ວໂລກ.
+ ຈີນເຕືອນໃຫ້ຜູ້ໃຊ້ windows ລະວັງມັລແວຣ໌ເອີ້ນຄ່າໄຖ່ແບບໃໝ່
+ ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ
+ ໄມໂຄຣຊອບຕຳນິລັດຖະບານອາເມລິກາ ເປັນສາເຫດໂຈມຕີທາງໄຊເບີ
ອີເຊັດ ບໍລິສັດຜູ້ຜະລິດຊອບແວແອນຕີໄວຣັສຂອງສະໂລວັກ ແລະ ດຣາກອສ ບໍລິສັດຄວາມປອດໄພໂຄງສ້າງພື້ນຖານຂອງອາເມລິກາ ໄດ້ເຜີຍແຜ່ລາຍລະອຽດການວິເຄາະມັລແວຊື່ Industroyer ຫລື Crash Override ພ້ອມກັບເຕືອນລັດຖະບານ ແລະ ຜູ້ໃຫ້ບໍລິການໂຄງສ້າງພື້ນຖານໃຫ້ຊ່ວຍກັນປ້ອງກັນໄພດັ່ງກ່າວ ເນື່ອງຈາກກຸ່ມທີ່ສ້າງມັລແວໂຕນີ້ ຫລື ກຸ່ມຮຽນແບບອາດດັດແປງໄປໃຊ້ສ້າງຄວາມເສຍຫາຍໃນວົງກວ້າງຕໍ່ໂຄງສ້າງພື້ນຖານສຳຄັນອື່ນໆຢູ່ເອີຣົບ ຫລື ອາເມລິກາເຊັ່ນ: ການຂົນສົ່ງ, ການໃຫ້ບໍລິການນ້ຳປະປາ ແລະ ແກັສ. ເຖິງຢ່າງໃດກໍດີ, ບໍລິສັດທັງສອງແຫ່ງບໍ່ຮູ້ວ່າໃຜຢູ່ເບື້ອງຫລັງການເຮັດໃຫ້ໄຟຟ້າມອດທົ່ວອູແກຣນເມື່ອທ້າຍປີກ່ອນ, ອູແກຣນໂທດຣັດເຊຍ ແຕ່ຣັດເຊຍປະຕິເສດວ່າບໍ່ກ່ຽວຂ້ອງ.
Industroyer ເປັນມັລແວໂຕທີສອງເທົ່າທີ່ຜູ້ຊ່ຽວຊານຮູ້ຈົນຮອດປັດຈຸບັນນີ້ວ່າ: ສາມາດລົບກວນຂະບວນການເຮັດວຽກຂະແໜງອຸດສາຫະກຳ ໂດຍເຈາະລະບົບບໍ່ຕ້ອງເຂົ້າໄປແຊກແຊງດ້ວຍຕົນເອງ, ສ່ວນມັລແວໂຕທຳອິດຄື Stuxnet ພົບໃນປີ 2000 ວົງການນັກວິໄຈຄວາມປອດໄພຄອມພິວເຕີເຊື່ອວ່າ ອາເມລິກາ ແລະ ອິດສະລາແອນໃຊ້ລົບກວນໂຄງການນິວເຄຼຍອີຣານ.
