ອຸ່ນໃຈໄດ້ ຜູ້ຕິດເຊື້ອປິ່ນປົວດີແລ້ວ ກັບຄືນເປັນໃໝ່ບໍ່ແຜ່ເຊື້ອໃສ່ຄົນອື່ນໄດ້

ກົດເພື່ອຟັງຂ່າວ

ໂດຍ: ລູກເມືອງພວນ

ບັນດານັກຊ່ຽວຊານລະບາດວິທະຍາໃຫ້ຮູ້ວ້າ ຜູ້ຕິດເຊື້ອປິ່ນປົວດີແລ້ວ ກັບຄືນເປັນໃໝ່ ແມ່ນຍ້ອນຮ່າງກາຍຂອງຜູ້ປ່ວຍຍັງມີຊາກເສດເຫຼືອຂອງເຊື້ອໄວຣັສຢູ່ໃນຮ່າງກາຍ ແຕ່ມັນບໍ່ສາມາດຈະແຜ່ເຊື້ອໃສ່ຄົນອື່ນໄດ້.

ທ່ານໝໍ ຫງວຽນ ວັນ ກິ້ງ ຂອງຫວຽດນາມ, ປະທານສະມາຄົມແພດປິ່ນປົວໂຄວິດ-19 ຢູ່ທີ່ໂຮງໝໍ ພະຍາດເຂດຮ້ອນສູນກາງ ຢືນຢັນວ່າ ຜູ້ຕິດເຊື້ອປິ່ນປົວດີແລ້ວ ກັບມາເປັນໃໝ່ນັ້ນ ປຽບເໝືອນກັບ “ຄົນປົກກະຕິມີເຊື້ອ ແຕ່ບໍ່ສາມາດແຜ່ເຊື້ອ”

ທ່ານໃຫ້ຮູ້ຕື່ມອີກວ່າ ຜູ້ຕິດເຊື້ອໃນນາທີສຸດທ້າຍຂອງການກວດຫາເຊື້ອກ່ອນຈະໝົດກຳນົດຕິດຕາມ 14 ວັນ ລ້ວນແຕ່ບໍ່ສະແດງອາການ, ເປັນຄົນແຂງແຮງປົກະຕິ. ດັ່ງນັ້ນ, ຈຶ່ງບໍ່ໝາຍຄວາມວ່າຈະຕ້ອງໄດ້ປິ່ນປົວເລີ່ມຕົ້ນຄືນໃໝ່, ແຕ່ຫາກເປັນການກັກຕົວ ເພື່ອຕິດຕາມສຸຂະພາບ.

ບັນດານັກຊ່ຽວຊານໄດ້ດຳເນີນການເອົາຕົວຢ່າງຂອງຜູ້ປ່ວຍກວດຫາເຊື້ອຄືນ ແລະ ປູກເຊື້ອໄວຣັສ ເພື່ອຄົ້ນຄວ້າຫາສາເຫດການຕິດເຊື້ອຄືນນັ້ນ,  ເຫັນວ່າຮ່າງກາຍຂອງຜູ້ປ່ວຍເກີດຂະບວນວິວັດຂັບຖ່າຍແມ່ພະຍາດອອກຈາກຮ່າງກາຍ. ການກວດຫາເຊື້ອດ້ວຍອຸປະກອນ Realtime RT-PCR ນັ້ນແມ່ນເພື່ອຊອກຫາຊາກເສດເຫຼືອຂອງເຊື້ອໄວຣັສໃນຮ່າງກາຍນັ້ນວ່າມັນຕາຍແລ້ວ ຫຼື ຍັງມີຊີວິດຢູ່.

ຍ້ອນເຫດຜົນດັ່ງກ່າວ, ຜູ້ຊ່ຽວຊານຈຶ່ງຢືນຢັນວ່າ ຊາກເສດເຫຼືອຂອງເຊື້ອໄວຣັສນັ້ນມັນຍັງຕົກຄ້າງຢູ່ໃນຮ່າງກາຍ ຈຶ່ງເຮັດໃຫ້ກັບຄືນເປັນໃໝ່.

ປັດຈຸບັນຢູ່ຫວຽດນາມມີ 14 ກໍລະນີທີ່ປິ່ນປົວດີແລ້ວກັບຄືນມາເປັນອີກ. ດັ່ງນັ້ນຈຶ່ງອູ່ນໃຈ ບໍ່ຕ້ອງຢ້ານວ່າມັນຈະແຜ່ເຊື້ອໃສ່ຄົນອື່ນໄດ້.