“ແຕນຍັກສັງຫານ” ບຸກອາເມລິກາ ຕອດຄົນເຖິງຕາຍ ທຳລາຍກະສິກຳ
ນອກຈາກຈະຖືກໂຄວິດ-19 ທີ່ເລີ່ມຕົ້ນຈາກຈີນເຂົ້າໂຈມຕີແລ້ວ ຕອນນີ້ອາເມລິກາຈະຖືກຮຸກຮານຈາກແຕນຍັກອາຊີທີ່ເປັນອັນຕະລາຍຫລາຍນຳອີກ.
ເຈົ້າໜ້າທີ່ກະສິກຳຂອງລັດວໍຊິງຕັນ ສະຫະລັດອາເມລິກາ ເປີດເຜີຍວ່າ: ແຕນຍັກອາຊີ (Asian giant hornet) ຫລາຍຮ້ອຍໂຕ ເຊິ່ງເປັນແມງໄມ້ທີ່ກິນຊີ້ນເປັນອາຫານ ຈົນມີສາຍຍານາມວ່າ: “ແຕນສັງຫານ” (Murder Hornet) ປາກົດຕົວຂຶ້ນຢູ່ລັດວໍຊິງຕັນໃກ້ກັບຊາຍແດນການາດາ ພວກມັນເປັນໄພຄຸກຄາມຕໍ່ມະນຸດ ແລະ ອຸດສາຫະກຳການລ້ຽງຜິ້ງ.
ແຕນນີ້ມີຊື່ວິທະຍາສາດວ່າ: Vespa mandarinia ສາມາດເຕີບໃຫຍ່ໄດ້ຂະໜາດໃຫຍ່ເຖິງ 6,35 ຊມ ມີຖິ່ນກຳເນີດຢູ່ອາຊີຕາເວັນອອກສຽງໃຕ້, ຈີນ ແລະ ໄຕ້ຫວັນ ຖືກພົບຄັ້ງທຳອິດຢູ່ເມືອງເບລນ ລັດວໍຊິງຕັນ ໃນເດືອນທັນວາ ໂດຍເຈົ້າຂອງເຮືອນຄົນໜຶ່ງ ຫລັງຈາກນັ້ນໄດ້ກາຍເປັນໄພຄຸກຄາມຢ່າງວ່ອງໄວ.
“ແຕນຍັກອາຊີສາມາດຕອດໄດ້ຫລາຍຄັ້ງ ແລະ ສົ່ງພິດໃນປະລິມານຫລາຍກວ່າ ເນື່ອງຈາກຂະໜາດຂອງມັນ ພິດນັ້ນເອງຂ້ອນຂ້າງເປັນສານພິດ ເຮັດໃຫ້ເກີດຊີ້ນຮ້າຍສະເພາະອ້ອມບາດແພ” ສະເວນ-ເອຣິກ ສະປິຊິເກີ ຫົວໜ້ານັກກິດວິທະຍາຂອງກະຊວງກະສິກຳ ລັດວໍຊິງຕັນ ບອກກັບສຳນັກຂ່າວຣອຍເຕີ.
ສະປິຊິເກີ ຍັງບອກວ່າ: ຄົນສ່ວນຫລາຍຖືກແຕນຍັກອາຊີ 1-2 ຄັ້ງເທົ່ານັ້ນ ແຕ່ຖ້າມັນຕອດຫລາຍໆຄັ້ງ ພິດຈະເຂົ້າສູ່ກະແສເລືອດໄປທຳລາຍອະໄວຍະວະຕ່າງໆ ຈົນອາດເຖິງແກ່ຊີວິດ.
ໃນປີ 2013 ແຕນຍັກອາຊີສັງຫານຄົນໄປແລ້ວ 41 ຄົນ ແລະ ບາດເຈັບຫລາຍກວ່າ 1.600 ຄົນ ຢູ່ມົນທົນສ່ານຊີ ປະເທດຈີນ ແລະ ນັບແຕ່ປີ 2001 ເປັນຕົ້ນມາ ຈຳນວນຜູ້ເສຍຊີວິດຕໍ່ປີຢູ່ຍີ່ປຸ່ນຈາກການຖືກແຕນຍັກຕອດມີປະມານ 12-26 ຄົນ.
ນອກເໜືອຈາກອັນຕະລາຍຕໍ່ມະນຸດແລ້ວ “ແຕນຍັກສັງຫານ” ຍັງເປັນອັນຕະລາຍຕໍ່ກະສິກຳ ແລະ ອຸດສາຫະກຳລ້ຽງເຜິ້ງ. ສະປິຊິເກີ ເປີດເຜີຍວ່າ: ແຕນຊະນິດນີ້ມັກໂຈມຕີຜິ້ງທີ່ຜະລິດນ້ຳເຜິ້ງ ໂດຍມີແຕນພຽງບໍ່ເທົ່າໃດໂຕກໍສາມາດກຳຈັດເຜິ້ງຮັງທັງໝົດໃນເວລາບໍ່ເທົ່າໃດຊົ່ວໂມງ.
ເວັບໄຊກະຊວງກະສິກຳຂອງວໍຊິງຕັນ (WSDA) ເປີດເຜີຍວ່າ: ແຕນສັງຫານຈະເຮັດໃຫ້ການຕັດຫົວເຜິ້ງຈົນຕາຍໝົດ, ຈາກນັ້ນພວກມັນຈະຍຶດຮັງເຜິ້ງມາເປັນຂອງພວກມັນເອງ ໂດຍເອົາໂຕອ່ອນເຜິ້ງໄປລ້ຽງລູກອ່ອນຂອງພວກມັນເອງ.
ເກີດຄວາມກັງວົນວ່າ: ຖ້າພວກມັນປັກຫລັກຢູ່ອາເມລິກາໄດ້ ມັນຈະສາມາດທຳລາຍປະຊາກອນເຜິ້ງໃນປະເທດ ແລະ ຂະຫຍາຍພັນຢູ່ນີ້ຖາວອນ ຈົນໝົດໂອກາດທີ່ຈະກຳຈັດມັນໄປຕະຫລອດການ.
