“ໄຟເຊີ” ເລີ່ມທົດລອງວັກແຊງ ຕ້ານໂຄວິດ-19 ໃນຄົນ
ໄຟເຊີ ອິງ ເຊິ່ງເປັນບໍລິສັດຢາໃຫຍ່ທີ່ສຸດຂອງອາເມລິກາ ເປີດເຜີຍວ່າ: ບໍລິສັດໄດ້ເລີ່ມທົດລອງວັກແຊງຕ້ານໄວຣັສໂຄວິດ-19 ໃນຄົນຢູ່ອາເມລິກາ.
ທັງນີ້ ໄຟເຊີ ໄດ້ພັດທະນາວັກແຊງດັ່ງກ່າວຮ່ວມກັບ BioNTech ເຊິ່ງເປັນບໍລິສັດຢາຂອງເຢຍລະມັນ ໂດຍຜູ້ເຂົ້າຮ່ວມໂຄງການທົດລອງດັ່ງກ່າວຢູ່ອາເມລິກາຈະໄດ້ຮັບການສັກວັກແຊງ BNT162 ຫລັງຈາກເລີ່ມມີການທົດລອງວັກແຊງດັ່ງກ່າວໃນຄົນຢູ່ເຢຍລະມັນໃນເດືອນຜ່ານມາ.
ໄຟເຊີ ລະບຸວ່າ: ຜູ້ເຂົ້າຮ່ວມໂຄງການທົດລອງວັກແຊງດັ່ງກ່າວອາຍຸລະຫວ່າງ 18-55 ປີ ກ່ອນຈະລວມຜູ້ທີ່ມີອາຍຸສູງກວ່າເຂົ້າຮ່ວມໂຄງການດັ່ງກ່າວໃນໄລຍະຕໍ່ໄປ, ພ້ອມທັງຄາດການວ່າ: ບໍລິສັດຈະສາມາດຜະລິດວັກແຊງຫລາຍລ້ານຂະໜານໃນທ້າຍປີນີ້.
ອົງການອະນາໄມໂລກ (WHO) ເປີດເຜີຍວ່າ: ປັດຈຸບັນບໍລິສັດຫລາຍແຫ່ງທົ່ວໂລກກຳລັງທົດລອງວັກແຊງຕ້ານໄວຣັສໂຄວິດ-19 ລວມແລ້ວ 100 ກວ່າຊະນິດ ແລະ ມີວັກແຊງຢ່າງໜ້ອຍ 8 ຊະນິດທີ່ກຳລັງຢູ່ໃນຂັ້ນທົດລອງກັບມະນຸດ.
