ລາວ-ຫວຽດນາມ ຮ່ວມວາງສະແດງຜົນງານ ວິຈິດສິນຂຶ້ນທີ່ນະຄອນຫລວງວຽງຈັນ
(ເນື່ອງໃນໂອກາດວັນເຊັນສົນທິສັນຍາການຮ່ວມມື ລາວ-ຫວຽດນາມ ຄົບຮອບ 40 ປີ)
ງານວາງສະແດງຜົນງານວິຈິດສິນ ລາວ-ຫວຽດນາມ ໄດ້ຈັດຂຶ້ນໃນວັນທີ 12 ມິຖຸນານີ້ ທີ່ສູນວັດທະນະທຳຫວຽດນາມປະຈຳລາວ ຢູ່ນະຄອນຫລວງວຽງຈັນ ໂດຍສະມາຄົມວິຈິດສິນ ລາວ-ຫວຽດນາມ ເປັນຜູ້ຈັດຂຶ້ນ ເນື່ອງໃນໂອກາດສະເຫລີມສະຫລອງວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ (18/7/1977 – 18/7/2017) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ (5/9/1962 – 5/9/2017) ໂດຍການໃຫ້ກຽດເຂົ້າຮ່ວມຂອງທ່ານລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານເອກອັກຄະລັດຖະທູດ ສສ ຫວຽດນາມປະຈຳລາວ, ພ້ອມດ້ວຍມວນຊົນຊາວນະຄອນຫລວງວຽງຈັນເຂົ້າຮ່ວມຊົມຢ່າງຫລວງຫລາຍ.
ໃນງານວາງສະແດງດັ່ງກ່າວຈະດຳເນີນໄປເປັນເວລາ 5 ວັນ ໂດຍໄດ້ນຳເອົາຜົນງານວິຈິດສິນຂອງສອງປະເທດເຂົ້າຮ່ວມວາງສະແດງຫລາຍກວ່າ 70 ລາຍການ, ໃນນັ້ນຜົນງານນັກສິລະປິນຫວຽດນາມມີ 40 ກວ່າລາຍການ ແລະ ຂອງນັກສິລະປິນລາວມີ 20 ກວ່າລາຍການ ທີ່ແຕ້ມດ້ວຍສີນ້ຳມັນ, ສີອັກຄະລິກ, ສີນ້ຳ, ແຕ້ມເສັ້ນມຶກດຳ, ຮູບແຕ້ມພາບພິມ ແລະ ຮູບປະຕິມະກຳ ໄດ້ແກ່ຮູບແກະສະຫລັກໄມ້, ຮູບນູນທອງ ແລະ ຮູບຫລໍ່ດ້ວຍທອງ ທີ່ບັນດານັກສິລະປິນຂອງສອງປະເທດໄດ້ປະດິດຄິດແຕ່ງຂຶ້ນມາດ້ວຍຄວາມປານີດ ແລະ ຫລາກຫລາຍສີສັນໃນສິນລະປະຮ່ວມສະໄໝ ທີ່ໄດ້ສະທ້ອນໃຫ້ເຫັນທາງດ້ານການພົວພັນຮ່ວມມືຢ່າງຮອບດ້ານ ແລະ ພິເສດອັນເປັນມູນມໍລະດົກຂອງສອງປະເທດ ແລະ ສະທ້ອນໃຫ້ເຫັນເຖິງວັດທະນະທຳ, ວິຖີການດຳລົງຊີວິດຂອງປະຊາຊົນສອງປະເທດ ແລະ ຄວາມງາມຂອງທິວທັດທຳມະຊາດທີ່ຮັກ ແລະ ຫວງແຫນຂອງຕົນ.
ຂ່າວໃຫ້ຮູ້ອີກວ່າ: ເມື່ອຕົ້ນເດືອນມິຖຸນານີ້, ສະຖາບັນການເມືອງແຫ່ງຊາດໂຮ່ຈີມິງ, ສະຖາບັນວິທະຍາສາດສັງຄົມຫວຽດນາມ, ສະຖາບັນການເມືອງການປົກຄອງແຫ່ງຊາດລາວ ແລະ ສະຖາບັນວິທະຍາສາດສັງຄົມແຫ່ງຊາດລາວ ໄດ້ຮ່ວມກັນຈັດສຳມະນາວິທະຍາສາດໃນຫົວຂໍ້: “55 ປີແຫ່ງສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ” ຂຶ້ນທີ່ເມືອງຢານຖຽດ ແຂວງບິ່ງຖວັນ ສສ ຫວຽດນາມ ເພື່ອລະນຶກວັນຄົບຮອບ 55 ປີແຫ່ງການສ້າງຕັ້ງສາຍພົວພັນການທູດ ລາວ-ຫວຽດນາມ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ ຢ່າງມີຄວາມໝາຍ.
