“ນາຍົກຫວຽດນາມ” ໝັ້ນໃຈເສດຖະກິດປີນີ້ ເຕີບໃຫຍ່ກວ່າ IMF ຄາດໄວ້ຢູ່ 2,7%
ທ່ານ ຫງວຽນ ຊວນ ຟຸກ ນາຍົກລັດຖະມົນຕີຫວຽດນາມ ເປີດເຜີຍໃນວັນທີ 5 ພຶດສະພານີ້ວ່າ: ເສດຖະກິດຂອງຫວຽດນາມໃນປີ 2020 ຈະຕ້ອງຂະຫຍາຍຕົວຫລາຍກວ່າລະດັບທີ່ກອງທຶນການເງິນສາກົນ (IMF) ຄາດໄວ້ທີ່ 2,7%.
ກິດຈະກຳທາງເສດຖະກິດໄດ້ເລີ່ມຂຶ້ນອີກເທື່ອໃໝ່ ຫລັງຫວຽດນາມຍົກເລີກມາດຕະການລັອກດາວໃນວັນທີ 23 ເມສາຜ່ານມາ ຫລັງຈາກຈຳນວນຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ເລີ່ມຫລຸດລົງ ໂດຍຫວຽດນາມມີຜູ້ຕິດເຊື້ອໂຄວິດ-19 ທັງໝົດ 271 ຄົນ ແລະ ບໍ່ມີຜູ້ເສຍຊີວິດ.
ກ່ອນໜ້ານີ້ ຫວຽດນາມໄດ້ຕັ້ງເປົ້າໝາຍວ່າ: ເສດຖະກິດຈະຂະຫຍາຍຕົວ 6,8% ໃນປີນີ້, ແຕ່ໃນໄລຍະໄຕມາດ 1 ຂອງປີ 2020 ເສດຖະກິດຫວຽດນາມຂະຫຍາຍຕົວໃນອັດຕາຕໍ່າສຸດ 3,8% ເນື່ອງຈາກໄດ້ຮັບຜົນກະທົບຈາກໂຄວິດ-19.
ເຖິງຢ່າງໃດກໍຕາມ, IMF ຄາດຄະເນຕົວເລກການຂະຫຍາຍຕົວທາງເສດຖະກິດຂອງຫວຽດນາມໃນລະດັບ 2,7% ເຊິ່ງເປັນລະດັບສູງສຸດໃນກຸ່ມປະເທດອາຊີຕາເວັນອອກສຽງໃຕ້, ແຕ່ທ່ານ ຫງວຽນ ຊວນ ຟຸກ ກ່າວວ່າ: ຫວຽດນາມຈະບໍ່ຍອມໃຫ້ເສດຖະກິດມີການຂະຫຍາຍຕົວຢ່າງຊັກຊ້າ ເນື່ອງຈາກການຂະຫຍາຍຕົວຂອງເສດຖະກິດໝາຍເຖິງການທີ່ປະຊາຊົນຈະມີວຽກເຮັດ, ຊ່ວຍຫລຸດຄວາມທຸກຍາກ ແລະ ເປັນຫລັກປະກັນຄວາມໝັ້ນຄົງທາງສັງຄົມ.
