“ຍີ່ປຸ່ນ” ເລັ່ງອະນຸມັດ Remdesivir ໃຊ້ປິ່ນປົວໂຄວິດອາທິດນີ້
“ຍີ່ປຸ່ນ” ເລັ່ງຂະບວນການອະນຸມັດ “ຢາເຣມເດສຊິເວຍ” ໂດຍກ່ອນໜ້ານີ້ ອາເມລິກາເລີ່ມໃຊ້ປິ່ນປົວໂຄວິດ-19 ສະເພາະຜູ້ຕິດເຊື້ອສຸກເສີນແລ້ວ.
ທ່ານ ຄັດສີໂນບຸ ກາໂຕະ ລັດຖະມົນຕີສາທາລະນະສຸກ ກ່າວວ່າ: ຕ້ອງການຈະອະນຸມັດຢາດັ່ງກ່າວໃຫ້ສຳເລັດໃນໄລຍະເວລາບໍ່ເກີນ 1 ອາທິດ ຫລັງຈາກທີ່ມີການຍື່ນຂໍ. ຂະນະທີ່ສຳນັກງານອາຫານ ແລະ ຢາອາເມລິກາ (FDA) ເປີດເຜີຍໃນວັນທີ 1 ພຶດສະພາວ່າ: FDA ໄດ້ອະນຸມັດໃຫ້ມີການໃຊ້ຢາເຣມເດສຊິເວຍ (remdesivir) ເພື່ອປິ່ນປົວຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ພາຍໃຕ້ມາດຕະການສຸກເສີນ.
ທັງນີ້ ຖ້າຢາເຣມເດສຊິເວຍໄດ້ຮັບການອະນຸມັດຈາກລັດຖະບານ ຈະກາຍເປັນຢາປິ່ນປົວໂຄວິດ-19 ຊະນິດທຳອິດທີ່ມີການໃຊ້ຕົວຈິງຢູ່ຍີ່ປຸ່ນ.
ສຳລັບຄວາມຄືບໜ້າຫລ້າສຸດ ລັດຖະບານຍີ່ປຸ່ນໄດ້ດຳເນີນການທົບທວນຄຳສັ່ງ ເພື່ອໃຫ້ການອະນຸມັດຢາເຮັດໄດ້ວ່ອງໄວຂຶ້ນ ເຊັ່ນດຽວກັບຂະບວນຂອງອາເມລິກາ, ອັງກິດ, ການາດາ, ເຢຍລະມັນ ແລະ ຝຣັ່ງ.
ທາງກະຊວງສາທາລະນະສຸກຍີ່ປຸ່ນຈະຮຽກປະຊຸມຄະນະກຳມະການທີ່ປຶກສາ ເພື່ອຂໍຮັບຄວາມຄິດເຫັນຂອງຜູ້ຊ່ຽວຊານ ຫລັງຈາກມີບໍລິສັດການຢາແຫ່ງໜຶ່ງຍື່ນຂໍອະນຸມັດຢາຊະນິດນີ້ເຂົ້າມາ.
ສຳນັກຂ່າວກຽວໂດ ລາຍງານວ່າ: ເຈົ້າໜ້າທີ່ຕ້ອງການໃຫ້ຢາເຣມເດສຊິເວຍຜ່ານການອະນຸມັດໂດຍໄວທີ່ສຸດພາຍໃນ 1 ອາທິດ ຖ້າໄດ້ຮັບການອະນຸມັດ ຈະເປັນການປິ່ນປົວດ້ວຍຢາຊະນິດນີ້ທີ່ໄດ້ຮັບການຍອມຮັບເປັນຄັ້ງທຳອິດຢູ່ຍີ່ປຸ່ນສຳລັບຜູ້ຕິດເຊື້ອໂຄວິດ-19.
