ເລເຊີ້ກຳຈັດຂົນ ແລະ ການແຖຂົນ ມີຂໍ້ດີຂໍ້ເສຍແນວໃດ ແລະ ແບບໃດດີກ່ວາກັນ?

ຂົນແຂ່ງ, ຂົນຂີ້ແຮ້ ເປັນສິ່ງກວນໃຈທີ່ອາດເຮັດໃຫ້ແມ່ຍິງຫລາຍຄົນໝົດຄວາມໝັ້ນໃຈໃນການນຸ່ງເຄື່ອງໄດ້. ບັນຫາກ່ຽວກັບເສັ້ນຂົນຍັງລວມເຖິງຂົນແຂນ ຫລື ຂົນບໍລິເວນໃບໜ້ານຳ ອາດເຮັດໃຫ້ຜິວບໍ່ກ້ຽງນຽນ. ບັນຫາຂອງແມ່ຍິງທີ່ມີເສັ້ນຂົນໜາ ແລະ ມີປະລິມານຫລາຍ ຈະນຸ່ງເຄື່ອງໂຊຜິວໃນຍາມອາກາດຮ້ອນກໍຕ້ອງມາຢຸດຄິດກັບບັນຫາເສັ້ນຂົນນີ້ແທນ.

ສະນັ້ນ ການກຳຈັດຂົນເຜີຍຜິວກ້ຽງນຽນກໍມີຢູ່ຫລາຍວິທີ, ແຕ່ວິທີທີ່ແມ່ຍິງຫລາຍຄົນນິຍົມເຮັດກັນຫລາຍທີ່ສຸດ ກໍແມ່ນການເລເຊີກຳຈັດຂົນ ແລະ ການແຖຂົນ ເຊິ່ງທັງສອງວິທີນີ້ກໍມີຂໍ້ດີແຕກຕ່າງກັນໄປ ໃຜຢາກຮູ້ວ່າການເລເຊີ້ກຳຈັດຂົນກັບການແຖຂົນແຕກຕ່າງກັນແນວໃດ, ກົງກັບຄວາມຕ້ອງການແບບໃດແດ່ ມາເບິ່ງກັນເລີຍ.

• ການກຳຈັດຂົນໂດຍການແຖ : ເປັນການກຳຈັດຂົນແບບຊົ່ວຄາວ ໃຜຮີບຮ້ອນຟ້າວຟັ່ງ ຫລື ຕ້ອງການໃຫ້ຜິວກ້ຽງນຽນແບບຮີບດ່ວນ ວິທີນີ້ເຫັນຜົນວ່ອງໄວກ່ວາການເລເຊີ້ກຳຈັດຂົນ. ການແຖຂົນເຮົາສາມາດເຮັດໄດ້ດ້ວຍຕົນເອງ, ຢູ່ໃສ ຍາມໃດກໍໄດ້ ທັງຍັງລາຄາກໍບໍ່ແພງ, ແຕ່ການກຳຈັດຂົນແບບນີ້ກໍມີຂໍ້ເສຍຄືກັນ ເພາະຫລັງຈາກແຖຂົນໄປ 3 – 4 ມື້ ເສັ້ນຂົນກໍຈະປົ່ງຂຶ້ນມາໃໝ່ ເຮັດໃຫ້ຕ້ອງແຖຊຳ້ອີກຢູ່ເປັນປະຈຳ ເນື່ອງຈາກການແຖຂົນເປັນການກຳຈັດຂົນຊົ່ວຄາວ ຈັດການຂົນພຽງແຕ່ເສັ້ນຂົນທາງປາຍ ບໍ່ໄດ້ກຳຈັດຮາກຂົນນຳ ວິທີນີ້ຈຶ່ງເຮັດໃຫ້ຂົນປົ່ງຂຶ້ນໄວກ່ວາການເລເຊີ້ກຳຈັດຂົນ ເຮັດໃຫ້ຂົນທີ່ປົ່ງຂຶ້ນມາໃໝ່ເປັນຕໍແຂງໆ ແລະ ອາດເຮັດໃຫ້ເກີດບັນຫາຂົນຂົດ ຫລື ຜິວໜັງເປັນຮູດຳ, ຜິວບໍ່ກ້ຽງນຽນ, ການແຖຂົນຈຶ່ງເໝາະສົມກັບກໍລະນີທີ່ຮີບດ່ວນ ຫລື ຄົນທີ່ຕ້ອງການເຫັນຜົນໄວຫລາຍກ່ວາ.
• ກຳຈັດຂົນດ້ວຍເລເຊີ້ກຳຈັດຂົນ : ເປັນວິທີກຳຈັດຂົນແບບຖາວອນທີ່ສາມາດຈັດການໄດ້ແບບຖອນຮາກຖອນກົກ ເອີ້ນໄດ້ວ່າເລເຊີ້ກຳຈັດຂົນ ເຮັດໃຫ້ໝົດບັນຫາເລື່ອງຂົນກວນໃຈໄປເລີຍ ເຊິ່ງດຽວນີ້ມີນະວັດຕະກຳເລເຊີ້ກຳຈັດຂົນແບບໃໝ່ທີ່ບໍ່ເຈັບໂຕ ແລະ ບໍ່ທຳລາຍຮາກຂົນບໍລິເວນອື່ນ H.R. ຫລື Super Hair Removal ທີ່ບໍ່ເຮັດປະຕິກິລິຍາກັບເມັດສີຜິວເມລານິນ, ແຕ່ເນັ້ນທຳລາຍແຊນກະຕຸ້ນການຈະເລີນເຕີບໃຫຍ່ຂອງເສັ້ນຂົນໃຫ້ເສຍຫາຍເທົ່ານັ້ນ ຈຶ່ງເຮັດໃຫ້ເສັ້ນຂົນບໍ່ປົ່ງອີກ ແລະ ການເລເຊີ້ກຳຈັດຂົນດ້ວຍເຕັກໂນໂລຊີນີ້ຈະບໍ່ໃຊ້ຄວາມຮ້ອນທີ່ສູງ ຈຶ່ງອ່ອນໂຍນກັບຜິວ. ຂະນະເຮັດກໍຈະພຽງແຕ່ຮູ້ສຶກອຸ່ນເທົ່ານັ້ນ ແຕ່ການເຮັດເລເຊີ້ກຳຈັດຂົນທຸກເທື່ອຕ້ອງໃຊ້ຜູ້ຊ່ຽວຊານ ແລະ ອາດຕ້ອງເຮັດປະມານ 3 – 4 ເທື່ອ ຈຶ່ງຈະເຫັນຜົນຈະແຈ້ງ ຈາກການເຮັດເທື່ອທຳອິດຈະສັງເກດໄດ້ວ່າເສັ້ນຂົນທີ່ປົ່ງຂຶ້ນມານັ້ນບາງລົງ, ເທື່ອຕໍ່ໄປຈະນ້ອຍລົງ ແລະ ບໍ່ປົ່ງຂຶ້ນອີກ ວິທີນີ້ຈຶ່ງມັກມີລາຄາແພງກ່ວາການແຖ ແລະ ໄດ້ປະສິດທິພາບຫລາຍກ່ວາການກຳຈັດຂົນດ້ວຍວິທີອື່ນໆນັ້ນເອງ.