ນິວຊີແລນ ບໍ່ພົບຜູ້ຕິດເຊື້ອໂຄວິດ-19 ເພີ່ມ ແລະ ກຽມຜ່ອນຜັນມາດຕະການໃນອາທິດໜ້າ
ແຫລງຂ່າວຕ່າງປະເທດລາຍງານວ່າ: ໃນວັນທີ 4 ພຶດສະພານີ້, ລັດຖະບານນິວຊີແລນ ໄດ້ຖະແຫລງຂ່າວດີວ່າໃນທົ່ວປະເທດບໍ່ມີຈຳນວນຜູ້ຕິດເຊື້ອໂຄວິດ-19 ເພີ່ມເປັນຄັ້ງທຳອິດຕັ້ງແຕ່ເລີ່ມມີມາດຕະການປິດປະເທດ, ເຊິ່ງຖືວ່າເປັນກ້າວທີ່ສຳຄັນໃນການເລີ່ມຜ່ອນຜັນມາດຕະການ ແຕ່ຍັງຄົງບອກຍໍ້າເຕືອນໃຫ້ປະຊາຊົນປະຕິບັດມາດຕະການຂອງລັດຖະບານຢ່າງເຄັ່ງຄັດ, ເຖິງແມ່ນວ່າສະຖານະການແພ່ລະບາດຂອງໄວຣັສຈະດີຂຶ້ນ ໂດຍກ່ອນໜ້ານີ້ຕຳຫລວດນິວຊີແລນໄດ້ຈັບກຸມຜູ້ຝ່າຝືນມາດຕະການໄດ້ເຖິງ 500 ຄົນ.
ຂະນະທີ່ ທ່ານນາງ ຈາຊິນດາ ອາຣ໌ເດິນ ນາຍົກລັດຖະມົນຕີ ນິວຊີແລນ ຈະພິຈາລະນາວ່າຄວນຜ່ອນຜັນມາດຕະການປິດປະເທດໃນອາທິດໜ້າ ຫລັງຈາກມີການຫລຸດລະດັບເຕືອນໄພທົ່ວປະເທດຈາກລະດັບ 4 ເປັນລະດັບ 3 ເຊິ່ງນິວຊີແລນໄດ້ຮັບຄຳຍ້ອງຍໍຊົມເຊີຍຈາກນານາຊາດໃນການຮັບມືກັບວິກິດໂຄວິດ-19, ໂດຍອົງການອະນາໄມໂລກລະບຸວ່າ ນິວຊີແລນ ຕັດສິນໃຈບັງຄັບໃຊ້ມາດຕະການປິດປະເທດທີ່ຂຶ້ນຊື່ວ່າເຂັ້ມງວດທີ່ສຸດໃນໂລກໄດ້ຢ່າງທັນການ.
ລ່າສຸດ ນິວຊີແລນ ມີຜູ້ຕິດເຊື້ອໂຄວິດ-19 ສະສົມ 1.487 ລາຍ ໂດຍ 86% ຂອງຜູ້ຕິດເຊື້ອແມ່ນໄດ້ຮັບການປິ່ນປົວຫາຍດີ ແລະ ມີຜູ້ເສຍຊີວິດທັງໝົດ 20 ຄົນ.
