ອາວະສານສົງຄາມຕ້ານໂຄວິດ ແຕ່ພາລະກິດຍັງສືບຕໍ່

ໂດຍ: ທິດກໍ່າ

ຄືດັ່ງພວກເຮົາໄດ້ຮັບຮູ້ນຳກັນແລ້ວວ່າ: ນັບແຕ່ມີຮ່າກ້ອມເຊື້ອໄວຣັສສາຍພັນໃໝ່ໂຄໂຣນາ ຫລືວ່າ ໂຄວິດ-19 ໄດ້ມາສັງເວີຍເອົາຊີວິດອິນຊີຂອງຊາວໂລກໃຫ້ຕາຍໄປຫລາຍໝື່ນຫລາຍແສນຄົນ ໄດ້ເຮັດໃຫ້ຊາວໂລກຫວາດຫວັ່ນຢ້ານກົວ ແລະ ອົກສັ່ນຂວັນຫາຍໄປຢ່າງຫລວງຫລາຍ. ເພື່ອຕ້ານ ແລະ ສະກັດກັ້ນໂຣກລະບາດດັ່ງກ່າວ, ແຕ່ລະປະເທດກໍໄດ້ວາງມາດຕະການຫລາຍວິທີ ແລະ ມີຍຸດທະສາດທີ່ແຕກຕ່າງກັນ. ໃນນີ້ກໍມີຫລາຍປະເທດທີ່ຖືກຜົນກະທົບຈົນເຖິງຂັ້ນຕ້ອງໄດ້ປິດປະເທດ, ປິດການພົວພັນພາຍໃນ, ພາຍນອກທັງໝົດ ເພື່ອຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດອັນຈະມາລ້າງຜານຊີວິດອິນຊີຂອງຄົນພາຍໃນປະເທດ. ປັດຈຸບັນ ເຊື້ອພະຍາດດັ່ງກ່າວຍັງແຜ່ລາມໄປຍັງບາງປະເທດໃນໂລກຢ່າງໜັກໜ່ວງຢູ່ເຊັ່ນ: ສະຫະລັດອາເມລິກາ, ສະເປນ, ອິຕາລີ, ຝຣັ່ງ, ອັງກິດ ແລະ ບັນດາປະເທດອື່ນໆໃນແຖວເອີຣົບ, ອາຊີ ແລະ ອາຟຣິກາ. ຈາກສະຖິຕິໃນທົ່ວໂລກ ມາຮອດວັນທີ 30 ເມສາ 2020 ໄດ້ມີຜູ້ຕິດເຊື້ອໄປແລ້ວ 3.222.392 ຄົນ, ເສຍຊີວິດ 228.270 ຄົນ ແລະ ປິ່ນປົວດີ 1.005.449 ຄົນ.

ສຳລັບ ສປປ ລາວພວກເຮົາ ກໍເປັນປະເທດໜຶ່ງໃນພາກພື້ນ ແລະ ໃນໂລກທີ່ຖືກຜົນກະທົບເໝືອນກັນ. ນັບແຕ່ທ້າຍເດືອນທັນວາເປັນຕົ້ນມາ ຫລື ນັບແຕ່ມີການແຜ່ເຊື້ອໂຣກລະບາດໂຄວິດ-19 ເປັນຕົ້ນມາຮອດປັດຈຸບັນ ລາວເຮົາໄດ້ມີຜູ້ຕິດເຊື້ອທັງໝົດ 19 ຄົນ, ໃນນີ້ມາຮອດວັນທີ 30 ເມສາ 2020 ໄດ້ປິ່ນປົວໃຫ້ຫາຍດີໄປແລ້ວ 8 ຄົນ ຍັງພວມປິ່ນປົວຢູ່ໂຮງໝໍ ແລະ ຍັງບໍ່ທັນມີຜູ້ໃດມີອາການໜັກ ແລະ ເສຍຊີວິດແຕ່ປະການໃດ.

ແນວໃດກໍຕາມ, ຜ່ານບັ້ນຮົບຕ້ານສົງຄາມກັບສັດຕູຕົວໃຫຍ່ທີ່ໄຮ້ຕົນຕົວ, ໄຮ້ກິ່ນ, ໄຮ້ສຽງໂຄວິດ-19 ທີ່ມາຮຸກຮານຄັ້ງນີ້ເຫັນວ່າພວກເຮົາໄດ້ຮັບໄຊຊະນະຢ່າງໃຫຍ່ຫລວງຄັ້ງປະຫວັດສາດຂອງຊາດ ກໍຄືຂອງໂລກ. ຈາກສາເຫດທີ່ພວກເຮົາໄດ້ຮັບໄຊຊະນະຄັ້ງນີ້ ກໍຍ້ອນພັກ ແລະ ລັດຖະບານເຮົາສະດຸ້ງ ແລະ ມີວິທີຕອບຕ້ານ ແລະ ຕອບໂຕ້ແຕ່ຫົວທີ ເປັນຕົ້ນໄດ້ມີການຄັດກອງຢ່າງເຄັ່ງຂັດ, ເຂັ້ມງວດ ແລະ ຖີ່ຖ້ວນຕໍ່ບຸກຄົນທີ່ເຂົ້າມາລາວຈາກປະເທດທີ່ມີຄວາມສ່ຽງ ໂດຍໃຫ້ກັກກັນຕົນເອງພາຍໃນ 14 ວັນ. ວາງຍຸດທະສາດອອກເປັນສອງໄລຍະຄື: ໄລຍະທີໜຶ່ງແຕ່ວັນທີ 1 ເດືອນມີນາ ຫາວັນທີ 19 ເມສາ 2020, ໄລຍະທີສອງແມ່ນແຕ່ວັນທີ 20 ເມສາ ຫາວັນທີ 3 ພຶດສະພາ 2020. ການວາງມາດຕະການເບື້ອງຕົ້ນເພື່ອສູ້ເສິກສົງຄາມໃນຄັ້ງນີ້ກໍແມ່ນເລີ່ມປິດຊາຍແດນເຂົ້າ-ອອກເມືອງ, ປິດການຮຽນການສອນຂອງນັກຮຽນ ແລະ ຄູອາຈານໃນທົ່ວປະເທດ. ຈາກນັ້ນກໍມີກຳນົດສັ່ງໃຫ້ປິດການສັນຈອນທຸກກໍລະນີຂອງຄົນໃນປະເທດ ໂດຍໃຫ້ພາກັນກັກຕົນເອງຢູ່ບ້ານ, ຢູ່ເຮືອນ, ຫ້າມມີການເຄື່ອນໄຫວໄປມາຢ່າງເດັດຂາດນອກຈາກກໍລະນີຈຳເປັນ. ມີມາດຕະການປິດການສັນຈອນບ້ານຕໍ່ບ້ານ, ເມືອງຕໍ່ເມືອງ, ແຂວງຕໍ່ແຂວງ ແລະ ປິດທົ່ວທັງປະເທດ. ນອກຈາກນີ້ ກໍຍັງປິດການຜະລິດ, ປິດການພົວພັນຊົ່ວຄາວພາຍໃນພາຍນອກ. ທັງໝົດທີ່ກ່າວມານີ້ ແມ່ນພາຍໃຕ້ການປະຕິບັດຄຳສັ່ງເລກທີ 06/ນຍ, ຄຳສັ່ງເລກທີ 07/ຄລສພ ແລະ ຄຳສັ່ງແນະນຳຂອງຄະນະສະເພາະກິດ ແລະ ນິຕິກຳຄຳສັ່ງຕ່າງໆຂອງກົມກອມທ້ອງຖິ່ນຮາກຖານໃນການຕ້ານການແຜ່ລະບາດຂອງເຊື້ອພະຍາດໂຄວິດ-19 ຈິງຈັງເດັດຂາດ.

ຈາກການຮ່ວມໄມ້ຮ່ວມມື ແລະ ຄວາມເປັນເຈົ້າການອັນເປັນພະລັງຢ່າງປຶກແຜ່ນແໜ້ນໜາຂອງທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດຢ່າງເດັດຂາດມີໄຊ ຈຶ່ງເຮັດໃຫ້ໝາກຜົນອອກມາດ້ວຍໄຊຊະນະຢ່າງຍິ່ງໃຫຍ່ທີ່ບໍ່ເຄີຍມີມາໃນຍຸກສະໄໝປະຫວັດສາດສາມາດຕ້ານກັບສັດຕູຕົວໃຫຍ່ທີ່ໄຮ້ຕົນຕົວ, ໄຮ້ກິ່ນ, ໄຮ້ສຽງໂຄວິດ-19 ອັນເປັນມະຫາໂຣກລະບາດຂອງໂລກ.

ເຖິງຢ່າງໃດກໍດີ, ອີງໃສ່ການແຜ່ລະບາດຂອງເຊື້ອພະຍາດໂຄວິດ-19 ຍັງບໍ່ທັນມີທ່າທີຢຸດຈຶ້ງ ແລະ ຫລຸດຜ່ອນລົງໃນບາງປະເທດໃນໂລກພວກເຮົາຍັງຕ້ອງສືບຕໍ່ພາລະກິດໂດຍມີເປົ້າໝາຍຍຸດທະສາດຄື: ອະນຸຍາດໃຫ້ໄປມາຫາສູ່ກັນພາຍໃນ, ທຳມາຄ້າຂາຍ, ທຳການຜະລິດ, ເປີດກິດຈະການຫ້າງຮ້ານ, ເປີດສຳນັກງານອົງການ ເພື່ອປະຕິບັດວຽກຕາມປົກກະຕິເໝືອນດັ່ງຜ່ານມາ. ແຕ່ສິ່ງທີ່ໃຫ້ທຸກຄົນເອົາໃຈໃສ່ປະຕິບັດນັ້ນ ຄືປ້ອງກັນຕົນເອງຕາມຫລັກການແພດໄດ້ແນະນຳ, ຕິດຕາມຂໍ້ມູນຂ່າວສານທີ່ໜ້າເຊື່ອຖືເພື່ອປະຕິບັດຕາມຄຳສັ່ງຂອງຜູ້ນຳ-ການນຳຢ່າງໃກ້ຊິດແລ້ວໂຄວິດຈະໜີຫ່າງຈາກຕົວເຮົາ.