ຈີນພັດທະນາແວ່ນຕາຈັບອຸນຫະພູມ ຊ່ວຍຄັດກອງ COVID-19 ໄວຂຶ້ນ
ບໍລິສັດດ້ານເຕັກໂນໂລຊີຂອງຈີນພັດທະນາແວ່ນຕາກວດຈັບອຸນຫະພູມຮ່າງກາຍ ຊ່ວຍໃຫ້ການກວດຄັດກອງຜູ້ຕ້ອງສົງໄສຕິດເຊື້ອ COVID-19 ວ່ອງໄວຂຶ້ນ ຫລັງຊາວຈີນເລີ່ມກັບມາດຳລົງຊີວິດຕາມປົກກະຕິອີກຄັ້ງ.
ວັນທີ 1 ພຶດສະພານີ້, ແວ່ນຕາອັດສະລິຍະ ຮຸ່ນທີວັນ ທີ່ພັດທະນາຂຶ້ນໂດຍບໍລິສັດຣໍຄິດ ບໍລິສັດສະຕາດອັບດ້ານເຕັກໂນໂລຊີ ຢູ່ເມືອງຫັງໂຈຂອງຈີນ ສະແດງຕົວເລກອຸນຫະພູມຮ່າງກາຍທີ່ວັດແທກໄດ້ຈາກເຊັນເຊີອິນຟາເຣດ ແລະ ກ້ອງບັນທຶກພາບ ເພື່ອໃຫ້ຜູ້ທີ່ໃສ່ແວ່ນຕາສາມາດເບິ່ງເຫັນໄດ້ຢ່າງວ່ອງໄວ ແລະ ແນ່ນອນ ໂດຍມີຄວາມຄາດເຄື່ອນພຽງ 0,1-0,3 ອົງສາ ເທົ່ານັ້ນ.
ແວ່ນຕາຊະນິດນີ້ໃຊ້ເຕັກໂນໂລຊີເອອາ ຫລື ເຕັກໂນໂລຊີທີ່ເອົາພາບຄືພາບຈິງ ທີ່ເປັນຮູບແບບ 3 ມິຕິ ຈຳລອງເຂົ້າສູ່ໂລກຄວາມຈິງຜ່ານກ້ອງ ແລະ ການປະມວນຜົນທີ່ຈະນຳເອົາວັດຖຸທັບຊ້ອນເຂົ້າເປັນພາບດຽວກັນ ເພື່ອໃຫ້ເຮົາສາມາດເບິ່ງຜ່ານກ້ອງໄດ້ໂດຍກົງ ເຊິ່ງຈະຊ່ວຍໃນການກວດຄັດກອງອາການຂອງຜູ້ຕິດເຊື້ອ COVID-19 ໄດ້ສະດວກ ແລະ ວ່ອງໄວກວ່າອຸປະກອນກວດວັດແທກອຸນຫະພູມຊະນິດອື່ນໆ.
ປັດຈຸບັນບໍລິສັດຈຳໜ່າຍແວ່ນຕາດັ່ງກ່າວໃຫ້ລັດຖະບານ, ນິຄົມອຸດສາຫະກຳ ແລະ ໂຮງຮຽນຫລາຍແຫ່ງແລ້ວຫລາຍກວ່າ 1.000 ອັນ ແລະ ປັດຈຸບັນກຳລັງຢູ່ໃນຂັ້ນຕອນການພັດທະນາໃຫ້ແວ່ນຕາລຸ້ນນີ້ສາມາດກວດຈັບອຸນຫະພູມຮ່າງກາຍ ແລະ ສະແດງຜົນໄດ້ພ້ອມໆກັນຫລາຍຄົນ ເພື່ອນຳໄປໃຊ້ໃນສະຖານທີ່ທີ່ມີຄົນໜາແໜ້ນເຊັ່ນ: ຫ້າງສັບພະສິນຄ້າ ແລະ ສະໜາມບິນ.
