ອິນໂດເນເຊຍ ເລັ່ງແກ້ໄຂບັນຫາໂຄວິດ-19 ໃຫ້ສຳເລັດໃນເດືອນກໍລະກົດນີ້
ແຫລງຂ່າວຕ່າງປະເທດລາຍງານ ວັນທີ 27 ເດືອນເມສານີ້ວ່າ: ທ່ານ ໂດນີ ໂມນາໂດ, ຫົວໜ້າ ຄະນະເຮັດວຽກ ສະເພາະກິດ ພະຍາດ ໂຄວິດ-19 ຂອງອິນໂດເນເຊຍ ເປີດເຜີຍວ່າ: ປະຊາຊົນຈະສາມາດກັບໄປໃຊ້ຊີວິດຕາມປົກກະຕິໃນເດືອນກໍລະກົດນີ້ເພາະຕັ້ງເປົ້າໝາຍວ່າຍອດຜູ້ຕິດເຊື້ອໃໝ່ ຈະຫລຸດຫລົງໃນເດືອນມິຖຸນາຫລັງຈາກຖະແຫລງໃນກອງປະຊຸມຄະນະລັດຖະມົນຕີ ເມື່ອບໍ່ດົນມານີ້ວ່າ: ທ່ານ ໂຈໂກ ວີໂດໂດ, ປະທານາທິບໍດີ ອິນໂດເນເຊຍ ຮຽກຮ້ອງໃຫ້ມີຄວາມພະຍາຍາມຫລາຍຂຶ້ນໃນການເຮັດໃຫ້ປະຊາຊົນເຊື່ອຟັງ ແລະ ມີລະບຽບວິໄນຫລາຍຂຶ້ນ ແລະ ເຮັດໃຫ້ເຈົ້າໜ້າທີ່ ເຂັ້ມງວດຂຶ້ນກວ່າເກົ່າ ເພື່ອໃຫ້ຍອດຜູ້ຕິດເຊື້ອໃໝ່ຫລຸດລົງຢ່າງຕໍ່ເນື່ອງດ້ວຍການເພີ່ມການກວດຫາເຊື້ອຂະໜາດໃຫຍ່ ໃນເດືອນເມສານີ້ ແລະ ເດືອນໜ້າ. ຫລັງຈາກ ກວດໄປແລ້ວ 59.000 ຄົນ ຈົນເຖິງມື້ນີ້ເມື່ອທຽບໃສ່ມາເລເຊຍ ແລະ ສິງກະໂປ ທີ່ກວດໄປແລ້ວ 131.491 ຄົນ ແລະ 82.644 ຄົນ ຕາມລຳດັບ. ອຸປະສັກຂອງ ອິນໂດເນເຊຍທີ່ມີປະຊາຊົນເຖິງ 260 ລ້ານກວ່າຄົນແມ່ນການຂາດແຄນບຸກຄະລາກອນ ແລະ ຂາດແຄນສານເຄມີສຳລັບກວດວິໄຈ.
ປັດຈຸບັນ ອິນໂດເນເຊຍ ມີຜູ້ຕິດເຊື້ອໂຄວິດ-19 ຫລາຍເປັນ ອັນດັບ 2 ໃນອາຊີ ຕາເວັນອອກ ສ່ຽງໃຕ້ ຮອງຈາກ ສິງກະໂປ ແລະ ມີຜູ້ເສຍຊີວິດຫລາຍທີ່ສຸດ ໃນອາຊີ ນອກຈາກຈີນ. ສ່ວນໃນ ນະຄອນຫລວງ ຈາກາຕາ ມີຜູ້ຕິດເຊື້ອ 3.896 ຄົນ, ເສຍຊີວິດ 367 ຄົນ ເປັນຕົວເລກ ຫລາຍທີ່ສຸດໃນບັນດາ 34 ແຂວງທົ່ວປະເທດ.
