‘ຜູ້ນຳອິຕາລີ’ ເຕືອນ ຮັບມືໂຄວິດຮອບ 2 ຫລັງຫລຸດຜ່ອນມາດຕະການ ລັອກດາວ
ນາຍົກລັດຖະມົນຕີອິຕາລີ ເຕືອນ ປະຊາຊົນຮັບມືໂຄວິດຮອບ 2 ຫລັງຫລຸດຜ່ອນມາດຕະການລັອກດາວ 4 ພຶດສະພາ.
ທ່ານ ຈູເຊບເປ ຄອນເຕ ນາຍົກລັດຖະມົນຕີອິຕາລີ ກ່າວວ່າ: ອິຕາລີຈະເລີ່ມຫລຸດຜ່ອນມາດຕະການລັອກດາວໃນວັນທີ 4 ພຶດສະພາ ເພື່ອເລີ່ມເປີດເສດຖະກິດ ແລະ ໃຫ້ປະຊາຊົນດຳລົງຊີວິດຕາມປົກກະຕິອີກຄັ້ງ.
ທ່ານ ຄອນເຕ ກ່າວເຕືອນວ່າ: ການແຜ່ລະບາດຂອງໄວຣັສໂຄໂຣນາສາຍພັນໃໝ່ (ໂຄວິດ-19) ອາດເກີດຂຶ້ນອີກຮອບ ຈະເຮັດໃຫ້ຈຳນວນຜູ້ເສຍຊີວິດເພີ່ມຂຶ້ນ ແລະ ສ້າງຄວາມເສຍຫາຍຕໍ່ເສດຖະກິດຢ່າງມະຫາສານ.
ນາຍົກລັດຖະມົນຕີອິຕາລີ ລະບຸວ່າ: ການຫລຸດຜ່ອນມາດຕະການລັອກດາວຈະເລີ່ມຈາກຂະແໜງກໍ່ສ້າງ ແລະ ການຜະລິດຈະເປັນອຸດສາຫະກຳທຳອິດທີ່ຈະເປີດເຮັດວຽກອີກຄັ້ງ, ຖັດມາແມ່ນການເປີດການຄ້າຍ່ອຍ ແລະ ພິພິຕະພັນໃນອີກ 2 ອາທິດຕໍ່ມາ, ສ່ວນບາ, ຮ້ານອາຫານ ແລະ ຮ້ານຕັດຜົມ ຈະເປີດໃຫ້ບໍລິການໃນວັນທີ 1 ມິຖຸນາ.
“ທຸກຄົນຕ້ອງການເປີດປະເທດອີກຄັ້ງ ແລະ ຫົນທາງດຽວທີ່ຈະຢູ່ຮ່ວມກັບໄວຣັສໄດ້ໃນໄລຍະນີ້ ຄືເຮົາຈະຕ້ອງບໍ່ເປັນຫຍັງ ແລະ ຍຶດໝັ້ນໃນມາດຕະການເວັ້ນໄລຍະຫ່າງທາງສັງຄົມ” ທ່ານ ຄອນເຕ ກ່າວ.
ເຖິງຢ່າງໃດກໍຕາມ, ອິຕາລີພະຍາຍາມຈະຟື້ນຟູເສດຖະກິດ, ຂະນະທີ່ມີການຄາດຄະເນວ່າ: ເສດຖະກິດອິຕາລີອາດຫລຸດລົງປະມານ 8% ໃນປີນີ້.
