‘ສິງກະໂປ’ ຜະເຊີນວິກິດໂຄວິດ ຈຳນວນຜູ້ຕິດເຊື້ອແຊງ ‘ຍີ່ປຸ່ນ’
ສິງກະໂປ ເປີດເຜີຍຈຳນວນຜູ້ຕິດເຊື້ອໂຄວິດ-19 ຄົນໃໝ່ເພີ່ມສູງເຖິງ 1.000 ຄົນ ສົ່ງຜົນລວມ 13.624 ຄົນ ແຊງຍີ່ປຸ່ນ.
ສຳນັກຂ່າວບລູມເບິກ ລາຍງານວ່າ: ສິງກະໂປ ເປັນປະເທດໜຶ່ງທີ່ມີປະຊາກອນໜ້ອຍທີ່ສຸດໃນອາຊີ, ແຕ່ກຳລັງຜະເຊີນສະຖານະການການແຜ່ລະບາດໄວຣັສໂຄໂຣນາສາຍພັນໃໝ່ (ໂຄວິດ-19) ສູງທີ່ສຸດໃນພາກພື້ນອາຊີ ຖ້າທຽບໃສ່ອັດຕາສ່ວນປະຊາກອນຂອງປະເທດ.
ກະຊວງສາທາລະນະສຸກສິງກະໂປ ລາຍງານວ່າ: ພົບຜູ້ຕິດເຊື້ອໂຄວິດ-19 ໃນປະເທດ ເພີ່ມຂຶ້ນອີກ 931 ຄົນ ໂດຍສົ່ງຜົນໃຫ້ຈຳນວນຜູ້ຕິດເຊື້ອລວມເພີ່ມຂຶ້ນ 13.624 ຄົນ.
ຂໍ້ມູນທາງການສິງກະໂປ ຢືນຢັນວ່າ: ຜູ້ຕິດເຊື້ອຄົນໃໝ່ຈຳນວນຫລາຍມີການເຊື່ອມໂຍງກັບຫໍພັກສຳລັບແຮງງານຕ່າງປະເທດ ເຊິ່ງສ່ວນຫລາຍເປັນແຮງງານຜູ້ຊາຍຈາກກຸ່ມປະເທດອາຊຽນທີ່ມາເຮັດວຽກໃຊ້ແຮງງານ ເພື່ອຫາລາຍໄດ້ສົ່ງກັບໄປໃຫ້ຄອບຄົວ.
ຖະແຫລງການລະບຸວ່າ: ຜູ້ຕິດເຊື້ອຄົນໃໝ່ສ່ວນຫລາຍຖືກກັກຕົວຢູ່ສະຖານທີ່ກັກກັນຂອງລັດຖະບານແລ້ວ, ຂະນະທີ່ມີຜູ້ຕິດເຊື້ອຢູ່ລະຫວ່າງການປິ່ນປົວຢູ່ໂຮງໝໍ 1.300 ກວ່າຄົນ ສ່ວນຈຳນວນລວມຜູ້ເສຍຊີວິດຍັງມີຢູ່ 12 ຄົນ.
ເວັບໄຊ worldometers.info ໄດ້ລາຍງານວ່າ: ສິງກະໂປ ມີຜູ້ຕິດເຊື້ອໂຄວິດ-19 ຈຳນວນ 13.624 ຄົນ, ເສຍຊີວິດ 12 ຄົນ ແຊງຍີ່ປຸ່ນ ເຊິ່ງມີຜູ້ຕິດເຊື້ອໂຄວິດ-19 ຈຳນວນ 13.441 ຄົນ, ເສຍຊີວິດ 372 ຄົນ. ຂະນະທີ່ ສ.ເກົາຫລີ ມີຜູ້ຕິດເຊື້ອໂຄວິດ-19 ຈຳນວນ 10.738 ຄົນ, ເສຍຊີວິດ 243 ຄົນ.
