ລະວັງໂຄວິດ-19 ມີປະມານ 70% ບໍ່ສະແດງອາການ
ທ່ານ ດຣ ມາຍຟອງ ມາຍຊາຍ ຮອງອະທິການບໍດີ ມະຫາວິທະຍາໄລວິທະຍາສາດ ແລະສຸຂະພາບ ໄດ້ໃຫ້ຮູ້ໃນໂອກາດຖະ ແຫລງຂ່າວຕໍ່ສື່ມວນຊົນເມື່ອບໍ່ດົນມານີ້ວ່າ: ໂຄວິດ-19 ແມ່ນພະຍາດຊຶມເຊື້ອທີ່ເກີດຂຶ້ນໃໝ່, ຍັງມີຫລາຍຢ່າງທີ່ແພດໝໍໃນທົ່ວໂລກ ບໍ່ສາມາດຮູ້ລະອຽດເລິກເຊິ່ງ ໄດ້ທັງຫມົດ ແລະ ກໍຍັງບໍ່ມີຫລັກຖານຢັ້ງຢືນທາງດ້ານວິທະຍາສາດທີ່ແນ່ນອນ ວ່າມີຢາຊະນິດໃດແດ່ ແລະ ຢາກຸ່ມຢາໃດທີ່ມີປະສິດທິພາບສູງໃນການປິ່ນປົວພະຍາດນີ້, ຊຶ່ງປັດຈຸບັນນີ້ຫນ້າເປັນຫ່ວງທີ່ສຸດສຳລັບ ຜູ້ທີ່ຕິດເຊື້ອພະຍາດນີ້ ມີທັງແບບສະແດງອາການ ແລະ ບໍ່ສະແດງອາການອອກມາ, ຖ້າຜູ້ຕິດເຊື້ອຫາກຢູ່ໃນກໍລະນີສະແດງອາການອອກມາຄື: ມີໄຂ້ສູງ, ເຈັບຄໍ, ໄອ, ປວດຕົນໂຕ ແລະ ຫາຍໃຈຍາກ,ແມ່ນພວກເຮົາສາມາດຄວບຄຸມການແຜ່ເຊື້ອໄດ້ງາຍ, ແຕ່ສໍາລັບກໍລະນີບໍ່ສະແດງອາການອອກມານັ້ນ, ແມ່ນມີຄວາມຫຍຸງຍາກຫລາຍໃນການຄວບຄຸມ,ຕາມການລາຍງານຜົນການວິໃຈໃນຕ່າງປະເທດພົບວ່າ: ໃນປັດຈຸບັນກຸ່ມຄົນຕິດເຊື້ອທີ່ບໍ່ສະແດງອາການອອກມາ ກວມອັດຕາສ່ວນຫລາຍກວ່າ 70% ຂອງຈໍານວນຜູ້ຕິດເຊື້ອທັງໝົດ ແລະ ເປັນກຸ່ມຄົນທີ່ແຜ່ເຊື້ອໄປໃສ່ຄົນອື່ນໄດ້ຢ່າງວ່ອງໄວ.
ດັ່ງນັ້ນຜູ້ປິ່ນປົວດີແລ້ວອອອກໂຮງໝໍໄປກໍຕ້ອງໃຫ້ກັກຕົວຢູ່ເຮືອນຕື່ມອີກປະມານ 14-28 ວັນເພື່ອຕິດຕາມອາການ, ເນື່ອງຈາກພະຍາດ ໂຄວິດ-19 ມັນອາດລີ້ຢູ່ໃນຮ່າງກາຍຜູ້ຕິດເຊື້ອໄດ້ດົນເປັນເດືອນ ຈຶ່ງຈະຈາງຫາຍໄປ ແລະ ມີປະມານ 20-30% ຂອງຜູ້ທີ່ປິ່ນປົວຫາຍດີທັງໝົດ ກັບມາພົບເຊື້ອຄືນອີກ. ນີ້ແມ່ນບັນຫາທີ່ນັກວິທະຍາສາດຂອງວົງການແພດໃນທົ່ວໂລກ ກໍຄື ຢູ່ປະເທດເຮົາມີຄວາມເປັນຫວ່ງ ແລະ ໄດ້ພະຍາຍາມຄົ້ນຄວ້າທາງດ້ານວິທະຍາສາດຢູ່ແຕ່ລະປະເທດ ໂດຍມີການປະສານສົມທົບ ແລກປ່ຽນຄວາມຮູ້ກ່ຽວກັບພະຍາດດັ່ງກ່າວເຊິ່ງກັນ ແລະ ກັນຢ່າງໃກ້ຊິດ, ເພື່ອຊອກຫາວິທີປິ່ນປົວຜູ້ຕິດເຊື້ອໃຫ້ມີປະສິດທິຜົນສູງ.
ທ່ານ ດຣ ມາຍຟອງ ມາຍຊາຍ ໄດ້ແນະນໍາວ່າ: ການປ້ອງກັນຕົວເອງໃຫ້ປອດໄພຈາກພະຍາດນີ້ ກໍຄື ການປະຕິບັດຄໍາສັ່ງນາຍົກລັດຖະມົນຕີເລກທີ 06/ນຍ ແລະ ມາດຕະການຕ່າງໆທີ່ລັດຖະບານວາງອອກຢ່າງເຂັ້ມງວດ ເປັນຕົ້ນ ແມ່ນບໍ່ອອກເຮືອນໂດຍບໍ່ຈໍາເປັນ, ໝັ່ນລ້າງມືດ້ວຍສະບູຫລື ເຈວຂ້າເຊື້ອ, ບໍ່ຢູ່ໂຮມກັນເປັນກຸ່ມເປັນກ້ອນ, ຕ້ອງໃຫ້ຮັກສາໄລຍະຫ່າງ 1-2 ແມັດ, ໃສ່ຜ້າອັດປາກ-ດັງເປັນປະຈໍາ, ອະນາໄມເຮືອນຊານ ກໍຄື ທີ່ຢູ່ອາໄສຂອງຕົນເອງໃຫ້ສະອາດຈົບງາມ ແລະ ກິນອາຫານຖືກຫລັກອະນາໄມ ແລະ ພຽງເທົ່ານີ້ກໍຈະຊ່ວຍໃຫ້ເຮົາສາມາດປ້ອງກັນການຕິດເຊື້ອພະຍາດໂຄວິດ-19 ແລະ ພະຍາດອື່ນໆໄດ້ເປັນຢ່າງດີ.
