ຜູ້ນຳ ສ.ເກົາຫລີ ເລັ່ງສະພາອະນຸມັດງົບປະມານເພີ່ມຕື່ມແກ້ໄຂບັນຫາວ່າງວຽກ
ເຊອຸນ 12 ມິຖຸນາ: ປະທານາທິບໍດີ ມຸນ ແຈອິນ ຖະແຫລງຕໍ່ລັດຖະສະພາ ສ.ເກົາຫລີ ໃນວັນທີ 12 ມິຖຸນານີ້ ໂດຍລະບຸວ່າ: ແຜນການຈັດສັນງົບປະມານເພີ່ມອີກມູນຄ່າ 11,2 ຕື້ວອນ (ປະມານ 81 ລ້ານກວ່າກີບ) ມີຄວາມຈຳເປັນຢ່າງຮີບດ່ວນ ເພື່ອແກ້ໄຂບັນຫາວ່າງວຽກໃນກຸ່ມໄວໜຸ່ມ ທີ່ມີໂອກາດແຜ່ລາມກາຍເປັນໄພພິບັດຂອງປະເທດ.
+ ຊາວ ສ.ເກົາຫລີ ຢາກໃຫ້ຜູ້ນຳຄົນໃໝ່ຈ້າງວຽກເພີ່ມ ແລະ ຫລຸດສຸຈະລິດ
+ ສ.ເກົາຫລີ ປັບເພີ່ມຕົວເລກ GDP ປີ 2016
ປະທານາທິບໍດີ ມຸນ ແຈອິນ ເຊິ່ງໄດ້ຮັບເລືອກໃຫ້ດຳລົງຕຳແໜ່ງແທນທ່ານນາງ ປັກ ກິນເຮ ທີ່ຖືກຖອນຖອດອອກຈາກຕຳແໜ່ງ ສະເໜີແຜນຈັດສັນງົບປະມານເພີ່ມອີກຕໍ່ລັດຖະສະພາ ຫວັງຈະແກ້ໄຂບັນຫາການວ່າງວຽກ ແລະ ສະໜັບສະໜູນສະຫວັດດີການດ້ານຕ່າງໆ ໂດຍເງິນຈຳນວນ 11,2 ຕື້ວອນ ຈະຖືກນຳໄປໃຊ້ໃນການຈ້າງວຽກປະມານ 110.000 ຕຳແໜ່ງ, ສະໜັບສະໜູນສະຫວັດດີການໃຫ້ແກ່ພະນັກງານຍິງເນື່ອງໃນໂອກາດລາພັກເກີດລູກ ແລະ ເປີດສູນເບິ່ງແຍງຜູ້ອາຍຸສູງ ແລະ ຜູ້ເປັນພະຍາດສະໝອງເສື່ອມເພີ່ມອີກ.
ທ່ານ ມຸນ ແຈອິນ ຖະແຫລງຕໍ່ສະມາຊິກສະພາຜູ້ແທນລາຊະດອນວ່າ: ວິກິດການວ່າງວຽກໃນກຸ່ມໄວໜຸ່ມອາດຈະກາຍເປັນໄພພິບັດຂອງປະເທດ, ຖ້າບໍ່ມີການອອກມາດຕະການແກ້ໄຂ. ຫລາຍຝ່າຍເບິ່ງວ່າ: ຄຸນນະພາບຊີວິດຂອງປະຊາຊົນກຸ່ມນີ້ຈະເປັນຮຸ່ນທຳອິດທີ່ມີຄຸນນະພາບຊີວິດຊຸດໂຊມກວ່າຮຸ່ນພໍ່ແມ່ຂອງພວກເຂົາ, ການຈັດສັນງົບປະມານເພີ່ມອີກຈຶ່ງມີສ່ວນສຳຄັນທີ່ຈະເຂົ້າຊ່ວຍເຫລືອບັນດາໄວໜຸ່ມເຫລົ່ານີ້ກ່ອນເປັນອັນດັບທຳອິດ.
ລາຍງານລະບຸວ່າ: ອັດຕາການວ່າງວຽກຂອງປະຊາຊົນ ສ.ເກົາຫລີ ທີ່ມີອາຍຸຕໍ່າກວ່າ 30 ປີ ເພີ່ມສູງຂຶ້ນບັນລຸ 11,2% ໃນເດືອນເມສາຜ່ານມາ ຖືເປັນຕົວເລກສູງສຸດເປັນປະຫວັດສາດ ແລະ ຄິດເປັນສອງເທົ່າຂອງອັດຕາການວ່າງວຽກຂອງຈຳນວນປະຊາກອນໃນໄວແຮງງານທັງໝົດ.
