ເບິ່ງຈີນຫລັງວິກິດ COVID-19
ເບິ່ງກໍລະນີຕົວຢ່າງຈີນ ທີ່ເປັນທັງຕົ້ນທາງຂອງເຊື້ອໄວຣັສໂຄໂຣນາ 2019 ແລະ ຕົ້ນແບບແນວທາງປິ່ນປົວ, ປ້ອງກັນ ແລະ ຫລຸດການລະບາດຂອງເຊື້ອໄວຣັສ ເຊິ່ງໂລກກໍມີຄວາມຫວັງວ່າຫລັງຜ່ານວິກິດນີ້ແລ້ວ ຈີນຈະສາມາດຊຸກຍູ້ໃຫ້ກິດຈະກຳທາງທຸລະກິດກັບຄືນມາໄດ້ເຖິງ 90-95% ຂອງສະພາບປົກກະຕິ.
ຖືເປັນວຽກຍາກຂອງບັນດານັກວິເຄາະ ທີ່ຈະຄາດເດົາເສັ້ນທາງເສດຖະກິດ ແລະ ຕະຫລາດທຶນໂລກທ່າມກາງໂຄວິດ-19 ວ່າດຳເນີນໄປເຖິງຈຸດສິ້ນສຸດເມື່ອໃດ ແລະ ແນວໃດ.
ກໍລະນີສຶກສາທີ່ດີທີ່ສຸດຄື: ການເບິ່ງທີ່ຈີນ ເພາະເປັນຕົ້ນທາງຂອງເຊື້ອໄວຣັສໂຄໂຣນາ 2019 ແລະ ຕ້ອງຜະເຊີນກັບສະຖານະການທຸກຢ່າງນຳໜ້າປະເທດອື່ນປະມານ 1 ເດືອນ ແລະ ຫລ້າສຸດ ໂລກມີຄວາມຫວັງຂຶ້ນ ຫລັງຈີນສາມາດຊຸກຍູ້ໃຫ້ກິດຈະກຳທາງທຸລະກິດກັບຄືນມາໄດ້ເຖິງ 90-95% ຂອງສະພາບປົກກະຕິ, ເຖິງວ່າຍັງຮັກສາມາດຕະການປ້ອງກັນການແຜ່ລະບາດຮອບ 2 ທີ່ເຂັ້ມງວດ. ອີກເບື້ອງໜຶ່ງ ຈຳນວນຜູ້ຕິດເຊື້ອເພີ່ມຂຶ້ນແຕ່ລະວັນ ທັງຢູ່ອາເມລິກາ ແລະ ເອີຣົບເລີ່ມຊ້າລົງ ເຮັດໃຫ້ຕະຫລາດຫຸ້ນໂລກຟື້ນຕົວຕໍ່ເນື່ອງນັບແຕ່ທ້າຍເດືອນມີນາ.
ການຍົກຈີນຂຶ້ນເປັນກໍລະນີສຶກສານີ້ ພວກເຮົາເລືອກໃຫ້ນ້ຳໜັກຕໍ່ດັດຊະນີຊີ້ນຳທາງເສດຖະກິດເຊັ່ນ: 1. ດັດຊະນີຜູ້ຈັດການຝ່າຍຈັດຊື້ທີ່ສົ່ງສັນຍານຟື້ນຕົວ ທັງຂະແໜງການຜະລິດ ແລະ ບໍລິໂພກ ມາຢູ່ໃນເກນຂະຫຍາຍຕົວໄດ້ໃນເດືອນມີນາຈາກທີ່ຫລຸດລົງໃນເດືອນກຸມພາ; 2. ການຊື້ຂາຍອະສັງຫາລິມະຊັບສະເລ່ຍ 7 ວັນ ທີ່ພວກເຮົາເຫັນຈຳນວນຕຶກ ແລະ ອາຄານທີ່ຂາຍໄດ້ມາຢູ່ໃນທ່າອ່ຽງຂາຂຶ້ນອີກ ແລະ 3. ປະລິມານການເຜົາຖ່ານຫີນຂອງ 5 ບໍລິສັດພະລັງງານຍັກໃຫຍ່ກໍເພີ່ມຂຶ້ນນັບແຕ່ກາງເດືອນກຸມພາເປັນຕົ້ນມາ.
ເຖິງຢ່າງໃດກໍດີ, ອັດຕາການຟື້ນຕົວຂອງແຕ່ລະກຸ່ມອຸດສາຫະກຳມີຄວາມໄວຊ້າແຕກຕ່າງກັນ ແລະ ເບິ່ງຄືວ່າການຟື້ນຕົວເບື້ອງອຸປະທານ (Supply) ອາດຈະໄວກວ່າເບື້ອງອຸປະສົງ (Demand) ໂດຍສະເພາະຜົນຜະລິດທາງອຸດສາຫະກຳ ເຫັນໄດ້ຈາກລາຍງານຂອງໂຮງງານຜະລິດລົດຍົນຮອນດ້າໃນເມືອງອູ່ຮັ່ນ ທີ່ຮ່ວມມືກັບ Dongfeng Motor Group ພາຍໃຕ້ຊື່ບໍລິສັດ Dognfeng Honda ກັບມາເດີນໜ້າຜະລິດເຕັມທີ່ ດ້ວຍຈຳນວນພະນັກງານກວ່າ 98% ແລະ ມີແຜນເລັ່ງຜະລິດໃຫ້ຫລາກວ່າເກົ່າຈາກວັນລະ 1.060 ຄັນ ເປັນວັນລະ 1.237 ຄັນ (ເພີ່ມຂຶ້ນ 17%).
ໂດຍຈະໃຫ້ພະນັກງານເຮັດວຽກລ່ວງເວລາອີກຄົນລະ 1,5 ຊົ່ວໂມງ. ຂະນະທີ່ບໍລິສັດ Foxconn ຜູ້ຜະລິດ iPhone ໃຫ້ບໍລິສັດ Apple ລາຍງານວ່າ: ພະນັກງານກວ່າ 93% ກັບມາເຮັດວຽກແລ້ວ ລວມທັງເດີນໜ້າຜະລິດເຕັມກຳລັງໃນທ້າຍເດືອນມີນາ ຜິດກັບເບື້ອງອຸປະສົງ ໂດຍສະເພາະກຸ່ມການບໍລິໂພກ, ສັນທະນາການ ແລະ ທ່ອງທ່ຽວຄື: ຮ້ານອາຫານ, ສະຖານບັນເທີງ, ໂຮງແຮມ ຫລື ສາຍການບິນ ທີ່ຈະໄດ້ຮັບແຮງກົດດັນຕໍ່ອີກໄລຍະໜຶ່ງ, ຄົນສ່ວນຫລາຍຍັງຢູ່ໃນໄລຍະຮັດສາຍແອວ ເພາະບໍ່ຮູ້ວ່າວິກິດທີ່ດີຂຶ້ນຈະກັບມາ ແລະ ຮຸນແຮງຂຶ້ນອີກບໍ່ ຫລື ອາບເຕີຊ໊ອກອາດເຮັດໃຫ້ບໍລິສັດທີ່ຕົນເອງເຮັດວຽກຕ້ອງໄລ່ພະນັກງານອອກໃນອະນາຄົດ.
ແຕ່ຢ່າຟ້າວຕົກໃຈ ເພາະຂະແໜງການບໍລິໂພກບໍ່ໄດ້ຕົກຕໍ່າໄປໝົດ ໂດຍສະເພາະກຸ່ມ E-Commerce ຫລື ຊື້ເຄື່ອງອອນລາຍທີ່ເປັນຜູ້ຮັບປະໂຫຍດ ເຫັນໄດ້ຈາກແອບພິເຄຊັນສົ່ງອາຫານອັນດັບໜຶ່ງຄື Meituan Dianping ທີ່ເຕີບໃຫຍ່ຂຶ້ນ, ອີກທັງ Hema ຊຸບເປີມາເກັດໄຮ້ເງິນສົດຂອງ Jack Ma ທີ່ປະສົມປະສານລະຫວ່າງໂລກອອນລາຍ ແລະ ອອບລາຍໄວ້ນຳກັນ ໄດ້ປະກາດລົງທຶນເພີ່ມ ແລະ ຂະຫຍາຍສາຂາ.
ເຖິງວ່າເສດຖະກິດຈີນໄຕມາດ 1 ຈະຫລຸດລົງເຖິງ 6,8%, ແຕ່ໃນປີ 2020 GDP ຈີນອາດຈະກັບມາຢູ່ໃນແດນບວກໄດ້ ໂດຍ IMF ຄາດ GDP ຈີນ ປີນີ້ ຈະຂະຫຍາຍຕົວ 1,2%. ທັງນີ້ ນັບແຕ່ຕົ້ນປີ ຕະຫລາດຫຸ້ນຈີນ A-share ສ້າງຜົນຕອບແທນດີກວ່າຕະຫລາດຫຸ້ນອາເມລິກາ, ເອີຣົບ ແລະ ໄທ 5,6%, 12,2% ແລະ 12% ຕາມລຳດັບ. (ຂໍ້ມູນໃນວັນທີ 20 ເມສາ 2020) ສະທ້ອນຄວາມແຂງແຮງ ແລະ ທ່າອ່ຽງເສດຖະກິດຈີນທີ່ເໜືອກວ່າ.
