ລາວສືບຕໍ່ໃຫ້ໂຮງງານປຸງແຕ່ງ ທີ່ມີຄວາມສ່ຽງຕໍ່ COVID-19 ສືບຕໍ່ປິດຊົ່ວຄາວໄປຮອດວັນທີ 3 ພຶດສະພາ
ເພື່ອສືບຕໍ່ເພີ່ມທະວີການສະກັດກັ້ນ ແລະ ຕ້ານການລະບາດຂອງພະຍາດໂຄວິດ-19ໃຫ້ມີປະສິດທິຜົນສູງຕາມຄຳສັງແນະນໍາເລກທີ O6ຂອງທ່ານນາຍົກລັດຖະມົນຕີ, ຄະນະສະເພາະກິດ ກໍຄືກະຊວງອຸດສາຫະກໍາການຄ້າ ໄດ້ຕົກລົງໃຫ້ໂຮງງານອຸດສາຫະກໍາປຸງແຕ່ງຕ່າງໆ ທີ່ມີຄວາມສ່ຽງຕໍ່ການລະບາດຂອງພະຍາດດັ່ງກ່າວສືບຕໍ່ປິດການດໍາເນີນກິດຈະການຊົ່ວຄາວໄປຈົນຮອດວັນທີ 3 ພຶດສະພາທີ່ຈະມາເຖິງນີ້, ຍົກເວັ້ນແຕ່ໂຮງງານ ຜະລິດສີນຄ້າບໍລິໂພກ, ຢາປົວພະຍາດ, ເຄື່ອງປ້ອງກັນການລະບາດ, ອຸປະກອນການແພດ ແລະ ຜະລິດເສື້ອຜ້າຊຸດປ້ອງກັນພະຍາດລະບາດຂອງແພດໝໍ ແລະ ໜ່ວຍງານປ້ອງກັນພະຍາດ, ໂຮງຊ່າງຫັດຖະກໍາ ແລະໂຮງງານທີ່ສະໜອງຜະລິດຕະພັນພາຊະນະບັນຈຸ ແລະ ການພີມໃຫ້ບັນດາໂຮງງານທີ່ກ່າວມານັ້ນ ແມ່ນໃຫ້ສາມາດດໍາເນີນກິດຈະການເປັນປົກກະຕິໄດ້, ແຕ່ຕ້ອງປະຕິບັດຄໍາແນະນໍາກ່ຽວກັບເງື່ອນໄຂ ແລະ ມາດຕະການທີ່ຄະນະສະເພາະກິດຄວບຄຸມ COVID-19 ວາງອອກ ແລະ ລະບຽບການຕ່າງໆຢ່າງເຂັ້ມງວດ ແລະ ຕ້ອງຮັບຜິດຊອບຕໍ່ການລະບາດຂອງພະຍາດດັ່ງກ່າວ,ທີ່ອາດຈະເກີດຂຶ້ນໃນຂອບເຂດກິດຈະການຂອງຕົນທັງໝົດແຕ່ພຽງຜູ້ດຽວ, ສ່ວນໂຮງງານທີ່ບໍ່ນອນໃນບັນຊີເປີດ ແຕ່ມີຈຸດປະສົງຂໍອະນຸຍາດດໍາເນີນກິດຈະການໃນໄລຍະປິດຊົ່ວຄາວນີ້ ຫາກສາມາດປະຕິບັດບັນດາເງື່ອນໄຂ ແລະ ມາດຕະການທີ່ຄະນະສະ ເພາະກິດຄວບຄຸມ COVID-19 ວາງອອກໄດ້ ຄື: ມີພື້ນທີ່ເຮັດວຽກເປັນຂອບເຂດສະເພາະຂອງໂຮງງານ, ມີບ່ອນພັກເຊົາໃນຂອບເຂດສະເພາະ ທີ່ໄດ້ມາດຕະຖານໃຫ້ພະນັກງານ-ກໍາມະກອນຢ່າງພຽງພໍ.
ສໍາລັບໂຮງງານທີ່ມີກໍາລັງແຮງງານຫລາຍ ຫລື ມີຄວາມສ່ຽງສູງ ໃນການລະບາດຂອງພະຍາດນີ້ ຕ້ອງມີສະຖານທີ່ແຍກປ່ຽວສໍາລັບກໍລະນີສົງໃສ, ພ້ອມທັງມີລົດຮັບ-ສົ່ງຄົນເຈັບໃນເວລາສຸກເສີນ, ມີສະ ຖານທີ່ເຮັດວຽກບໍ່ແອອັດ ແລະ ຮັບປະກັນໄລຍະຫ່າງ 1 ແມັດຂຶ້ນໄປ, ມີຫ້ອງອາຫານບໍ່ແອອັດ, ຮັບປະ ກັນຫລັກອະນາໄມ, ບໍ່ໃຫ້ໃຊ້ເຄື່ອງຮ່ວມກັນ ແລະ ຍາມກິນເຂົ້າຕ້ອງຢູ່ຫ່າງກັນ 1 ແມັດຂຶ້ນໄປ, ມີນໍ້າສະ ອາດໃຊ້ພຽງພໍ, ມີບ່ອນລ້າງມື, ສະໜອງສະບູ ຫລື ເຈວລ້າງມື, ຜ້າອັດປາກ-ດັງໃຫ້ພຽງພໍ, ມີການປ້ອງກັນເວນຍາມຕະຫລອດ 24 ຊົ່ວໂມງ, ໂດຍບໍ່ອະນຸຍາດໃຫ້ພະນັກງານ-ກໍາມະກອນອອກໄປນອກ ແລະ ບໍ່ໃຫ້ຄົນນອກທີ່ບໍ່ມີສ່ວນກ່ຽວຂ້ອງເຂົ້າມາໂດຍເດັດຂາດ, ພ້ອມທັງມີການອໍານວຍຄວາມສະດວກ ໃຫ້ທີມແພດເຂົ້າໄປຕິດຕາມກວດກາ ຫລື ເຜີຍແຜ່ຄວາມຮູ້ກ່ຽວກັບພະຍາດCOVID-19ໄດ້ເປັນປະຈຳ.
