ສະເປນ ຂະຫຍາຍເວລາພາວະສຸກເສີນເຖິງ 9 ພຶດສະພາ ພ້ອມສະເໜີ EU ຕັ້ງກອງທຶນຊ່ວຍໂຄວິດ
ສຳນັກຂ່າວບລູມເບິກລາຍງານວ່າ: ນາຍົກລັດຖະມົນຕີ ເປໂດຣ ຊານເຊ ຂອງສະເປນ ໄດ້ປະກາດຂະຫຍາຍເວລາສະຖານະການສຸກເສີນອອກໄປຈົນເຖິງວັນທີ 9 ພຶດສະພາ ຫລັງໄດ້ຮັບຄວາມເຫັນພ້ອມຈາກລັດຖະສະພາສະເປນ ໃນການຕໍ່ສູ້ ແລະ ຢັບຢັ້ງການລະບາດຂອງເຊື້ອໄວຣັສໂຄວິດ-19 ຫລັງຈຳນວນຜູ້ຕິດເຊື້ອໄວຣັສໂຄວິດ-19 ໃນປະເທດສະເປນ ໄດ້ເພີ່ມຂຶ້ນເປັນ 208.389 ຄົນ.
ຜູ້ນຳສະເປນກ່າວວ່າ: ການຂະຫຍາຍເວລາສະຖານະການສຸກເສີນໃນຄັ້ງນີ້ຈະແຕກຕ່າງກັບການປະກາດກ່ອນໜ້ານີ້ ເນື່ອງຈາກລັດຖະບານໄດ້ມີການຫລຸດຜ່ອນມາດຕະການບາງສ່ວນ ເຊິ່ງໄດ້ບັນລຸຂໍ້ຕົກລົງກັບລັດຖະສະພາສະເປນແລ້ວໃນວັນທີ 21 ກຸມພາ ເຊິ່ງລາຍລະອຽດຂອງການຫລຸດຜ່ອນມາດຕະການນັ້ນ ລັດຖະບານຈະເປີດເຜີຍພາຍໃນອາທິດນີ້.
ນອກຈາກນີ້ ລັດຖະບານສະເປນຍັງໄດ້ສະເໜີໃຫ້ສະຫະພາບເອີຣົບ (EU) ໃນການຈັດຕັ້ງກອງທຶນເພື່ອຊ່ວຍເຫລືອປະເທດທີ່ໄດ້ຮັບຜົນກະທົບຂອງໄວຣັສໂຄວິດ-19 ເປັນວົງເງິນສູງເຖິງ 1,5 ຕື້ເອີໂຣ (1,6 ຕື້ໂດລາສະຫະລັດ) ເຊິ່ງນາຍົກລັດຖະມົນຕີ ຊານເຊ ກ່າວວ່າ: ຂໍ້ສະເໜີໃນການຈັດຕັ້ງກອງທຶນດັ່ງກ່າວຈະຖືກນຳເຂົ້າຫາລືໃນກອງປະຊຸມສຸດຍອດສະຫະພາບເອີຣົບ ເຊິ່ງຈະເປັນກອງປະຊຸມຜ່ານທາງວິດີໂອຄອນເຟີເຣນ ໂດຍກອງປະຊຸມຈະມີຂຶ້ນໃນວັນນີ້ຕາມເວລາຢູ່ປະເທດສະເປນ.
