WHO ເຕືອນຈຸດຮ້າຍແຮງທີ່ສຸດການລະບາດ COVID-19 ຍັງລໍຖ້າຢູ່ທາງໜ້າ
ອົງການອະນາໄມໂລກ ເຕືອນສະຖານະການທີ່ຮ້າຍແຮງທີ່ສຸດຈາກການລະບາດຂອງ COVID-19 ຍັງລໍຖ້າຢູ່ທາງໜ້າ. ຂະນະທີ່ຫລາຍປະເທດທະຍອຍຫລຸດຜ່ອນມາດຕະການລັອກດາວ.
ວັນທີ 21 ເມສາ, ທ່ານ ເທດຣອສ ອະດານອມ ເກເບຣເຍຊຸສ ຜູ້ອຳນວຍການໃຫຍ່ອົງການອະນາໄມໂລກ ເຕືອນວ່າສະຖານະການຮ້າຍແຮງທີ່ສຸດຈາກການລະບາດຂອງ COVID-19 ຍັງລໍຖ້າຢູ່ທາງໜ້າ ແລະ ຂໍໃຫ້ທົ່ວໂລກຮ່ວມກັນປ້ອງກັນບໍ່ໃຫ້ເກີດໂສກນາດຕະກຳດັ່ງກ່າວ.
ທ່ານ ເທດຣອສ ກ່າວອີກວ່າ: ການຫລຸດຜ່ອນມາດຕະການລັອກດາວບໍ່ໄດ້ໝາຍຄວາມວ່າການລະບາດໃນປະເທດໃດປະເທດໜຶ່ງສິ້ນສຸດລົງ. ພ້ອມລະບຸວ່າ: ມາດຕະການລັອກດາວຈະຊ່ວຍໃຫ້ປະເທດຕ່າງໆຫລຸດພົ້ນຈາກວິກິດລະບາດ.
ຄຳເຕືອນຂອງທ່ານ ເທດຣອສ ມີຂຶ້ນໃນຂະນະທີ່ຫລາຍປະເທດເລີ່ມຫລຸດຜ່ອນມາດຕະການລັອກດາວໃນລະດັບທີ່ແຕກຕ່າງກັນ. ຫລ້າສຸດ ດານມາກອະນຸຍາດໃຫ້ທຸລະກິດຂະໜາດນ້ອຍທົ່ວປະເທດກັບມາເປີດໃຫ້ບໍລິການຫລັງພັກໄປເກືອບ 1 ເດືອນ ຈາກມາດຕະການລັອກດາວ ລວມທັງຮ້ານເສີມຄວາມງາມ, ຮ້ານປົວແຂ້ວ, ສະຖານທີ່ກາຍະພາບບຳບັດ ແລະ ຮ້ານສັກ. ແຕ່ຮ້ານເຫລົ່ານີ້ຈະຕ້ອງປະຕິບັດຕາມກົດລະບຽບໃໝ່ດ້ານສຸຂະອະນາໄມທີ່ອອກໂດຍລັດຖະບານດານມາກຢ່າງເຄັ່ງຂັດ ເພື່ອປ້ອງກັນການລະບາດຂອງ COVID-19. ຂະນະທີ່ໂຮງຮຽນ ແລະ ສູນເບິ່ງແຍງເດັກຫລາຍແຫ່ງທົ່ວດານມາກເລີ່ມກັບມາເປີດເຊັ່ນກັນ.
ສ່ວນເຢຍລະມັນກໍເລີ່ມຫລຸດຜ່ອນມາດຕະການລັອກດາວແບບຄ່ອຍເປັນຄ່ອຍໄປ ໂດຍອະນຸຍາດໃຫ້ຮ້ານຄ້າຂະໜາດນ້ອຍ ແລະ ທຸລະກິດທາງປະເພດກັບມາເປີດບໍລິການ ຫລັງປິດໄປຫລາຍອາທິດ, ແຕ່ຍັງຮັກສາມາດຕະການເວັ້ນໄລຍະຫ່າງຢ່າງເຄັ່ງຂັດ.
ຢູ່ປະເທດອົດສະຕຣາລີ ຊາຍຫາດ 3 ແຫ່ງໃນນະຄອນຊິດນີ ໄດ້ແກ່ຊາຍຫາດຄູກີ, ຊາຍຫາດມາໂຣບຣາ ແລະ ຊາຍຫາດໂຄລເວລລີ ກັບມາເປີດໃຫ້ປະຊາຊົນເຂົ້າມາພັກຜ່ອນຮັບລົມທະເລ ແລະ ເຮັດກິດຈະກຳຕ່າງໆ ລວມທັງການອອກກຳລັງກາຍ ຫລັງຕ້ອງປິດໄປຈາກການລະບາດຂອງ COVID-19 ແຕ່ຊາຍຫາດບອນໄດ ເຊິ່ງເປັນຊາຍຫາດຍອດນິຍົມຂອງນະຄອນຊິດນີຍັງປິດຕໍ່ໄປ.
ຂະນະທີ່ຢູ່ນະຄອນຫລວງເຊອຸນເມືອງຫລວງຂອງ ສ.ເກົາຫລີ ປະຊາຊົນເລີ່ມກັບມາເຮັດວຽກຫລາຍຂຶ້ນ ຫລັງມີການຫລຸດຜ່ອນມາດຕະການເວັ້ນໄລຍະຫ່າງທາງສັງຄົມຈາກຕົວເລກຜູ້ຕິດເຊື້ອ COVID-19 ທີ່ຫລຸດລົງຢ່າງຕໍ່ເນື່ອງ ເຮັດໃຫ້ບໍລິສັດທີ່ຢຸດ ຫລື ຫລຸດຜ່ອນນະໂຍບາຍເຮັດວຽກຈາກຢູ່ເຮືອນມີຈຳນວນເພີ່ມຂຶ້ນ ແຕ່ຫລາຍບໍລິສັດຍັງຈຳກັດການເດີນທາງ ແລະ ການປະຊຸມແບບກຸ່ມ.
ໃນວັນທີ 20 ເມສາຜ່ານມາ, ສ.ເກົາຫລີ ຂະຫຍາຍນະໂຍບາຍເວັ້ນໄລຍະຫ່າງທາງສັງຄົມອອກໄປອີກ 16 ວັນ ແຕ່ສະເໜີໃຫ້ມີການຫລຸດຜ່ອນຕໍ່ສະຖານທີ່ທາງສາສະໜາ ແລະ ກິລາ ເຊິ່ງກ່ອນໜ້ານີ້ຢູ່ພາຍໃຕ້ຂໍ້ຈຳກັດຢ່າງເຂັ້ມງວດ.
