ສະວີເດັນຕັ້ງປ້າຍເຕືອນ “ວອດກ້າບໍ່ແມ່ນເຈວລ້າງມື” ຫລັງລູກຄ້າຖາມໃຊ້ຂ້າເຊື້ອໂຄວິດໄດ້ ຫລື ບໍ່

ຮ້ານຄ້າສະວີເດັນຕັ້ງປ້າຍເຕືອນລູກຄ້າ ແອນກໍຮໍໃນວອດກ້າຂ້າເຊື້ອໂຄວິດບໍ່ໄດ້ ຫລັງລູກຄ້າຫລາຍຄົນສອບຖາມ ເພາະເຈວລ້າງມືຂາດເຂີນ.

Systembolaget ເຄືອຮ້ານຄ້າຂາຍຍ່ອຍຜູ້ຈັດຈຳໜ່າຍເຄື່ອງດື່ມແອນກໍຮໍທີ່ມີລັດຖະບານສະວີເດັນເປັນເຈົ້າຂອງ ໄດ້ຕັ້ງປ້າຍເຕືອນລູກຄ້າຕາມຮ້ານໃນຫລາຍສາຂາ ຫລັງທາງຮ້ານຄ້າໄດ້ຮັບລາຍງານວ່າພົບລູກຄ້າຫລາຍຄົນສອບຖາມດ້ວຍຄຳຖາມຄ້າຍຄືກັນວ່າ: ແອນກໍຮໍທີ່ຢູ່ໃນເຫລົ້າວອດກ້າສາມາດໃຊ້ແທນເຈວລ້າງມືໄດ້ ຫລື ບໍ່ ຈາກທີ່ຊາວສະວີເດັນພົບບັນຫາເຈວລ້າງມືຂາດເຂີນໃນຫລາຍພື້ນທີ່.

ເລື່ອງດັ່ງກ່າວເປັນເຫດໃຫ້ຮ້ານຄ້າດັ່ງກ່າວຕ້ອງຕັ້ງປ້າຍປະກາດເຕືອນລູກຄ້າ ໂດຍລະບຸວ່າ: ແອນກໍຮໍທີ່ຢູ່ໃນເຫລົ້າວອດກ້າ ຫລື ຍິນນັ້ນ ບໍ່ສາມາດໃຊ້ທົດແທນເຈວລ້າງມືໄດ້.

ທັງນີ້ ຕາມຂໍ້ແນະນຳຂອງກະຊວງສາທາລະນະສຸກສະວີເດັນລະບຸວ່າ: ເພື່ອເປັນການຫລຸດຄວາມສ່ຽງໃນການແຜ່ລະບາດຂອງໄວຣັສໂຄໂຣນາ ໃຫ້ປະຊາຊົນໝັ່ນໃຊ້ເຈວລ້າງມື ຫລື ລ້າງມືດ້ວຍນ້ຳ ແລະ ສະບູເທົ່ານັ້ນ ໂດຍຕາມຂໍ້ບັງຄັບຂອງສະວີເດັນລະບຸວ່າ: ເຈວລ້າງມືທີ່ໃຊ້ໄດ້ຜົນກັບໄວຣັສ ຫລື ແບກທີເຣຍ ຈະຕ້ອງມີຄວາມເຂັ້ມຂຸ້ນຂອງປະລິມານແອນກໍຮໍຢ່າງໜ້ອຍ 60% ຂຶ້ນໄປ.

ສ່ວນປະລິມານແອນກໍຮໍທີ່ຢູ່ໃນເຫລົ້າວອດກ້ານັ້ນມີຄວາມເຂັ້ມຂຸ້ນ 40% ເທົ່ານັ້ນ. ແຕ່ຢ່າງໃດກໍດີ, ນັບແຕ່ເກີດວິກິດໄວຣັສໂຄວິດລະບາດ ບັນດາຜູ້ຜະລິດເຄື່ອງດື່ມແອນກໍຮໍໃນສະວີເດັນຕ່າງປ່ຽນໄປຜະລິດເຈວລ້າງມືແທນ ເຊິ່ງແອນກໍຮໍບໍລິສຸດທີ່ໄດ້ຈາກຂະບວນການຜະລິດເຄື່ອງດື່ມບາງສ່ວນນີ້ຈະຕ້ອງປະສົມກັບເຈວທີ່ຜະລິດແຍກຕ່າງຫາກ ເພື່ອໃຫ້ເປັນເຈວລ້າງມືແອນກໍຮໍທີ່ສາມາດໃຊ້ກັບຮ່າງກາຍໄດ້.