UN ກັງວົນວິກິດໂຄວິດ-19 ທຳລາຍຄວາມໝັ້ນຄົງອາຫານໂລກ

ສະຫະປະຊາຊາດເຕືອນວ່າລະບົບເສດຖະກິດທີ່ກຳລັງເຄັ່ງຕຶງຈາກສະພາບໂຣກລະບາດ “ໂຄວິດ-19” ຈະກໍ່ໃຫ້ເກີດວິກິດຄວາມຫິວໂຫຍ ແລະ ອິດຢາກໃນຫລາຍພື້ນທີ່ຂອງໂລກ.

ສຳນັກຂ່າວຕ່າງປະເທດລາຍງານວ່າ: ທ່ານ ເດວິດ ບີສລີ ຜູ້ອຳນວຍການໂຄງການອາຫານໂລກ (WFP) ເຊິ່ງເປັນໜຶ່ງໃນໜ່ວຍງານດ້ານອາຫານ ແລະ ໂພຊະນາການຂອງສະຫະປະຊາຊາດ (UN) ກ່າວໃນວັນທີ 21 ເມສາ ກ່ຽວກັບວິກິດໂຣກລະບາດໂຄວິດ-19 ວ່ານອກຈາກສ້າງຄວາມເສຍຫາຍຢ່າງຈະແຈ້ງ ແລະ ໜັກໜ່ວງໃຫ້ລະບົບເສດຖະກິດໂລກ ຍັງຈະນຳໄປສູ່ “ຫາຍະນະດ້ານມະນຸດສະທຳ”.

ທັງນີ້ ລັດຖະບານຂອງບັນດາປະເທດກຳລັງຢືນຢູ່ເທິງທາງສອງແພ່ງ ຂອງການຕັດສິນໃຈວ່າຈະຫລຸດຜ່ອນມາດຕະການລັອກດາວທີ່ບັງຄັບໃຊ້ມາໄລຍະໜຶ່ງແລ້ວແນວໃດ ທ່າມກາງຄວາມກັງວົນກ່ຽວກັບການແຜ່ລະບາດຮອບສອງ ແຕ່ໃນເວລາດຽວກັນບັນດາຜູ້ນຳລັດຖະບານມີຄວາມກັງວົນຢ່າງຈະແຈ້ງ ກ່ຽວກັບຄວາມເສຍຫາຍທາງເສດຖະກິດທີ່ເພີ່ມຂຶ້ນ ແລະ ສັນຍານຂອງຄວາມເຄັ່ງຕຶງໃນສັງຄົມທີ່ຮຸນແຮງຂຶ້ນເຊັ່ນກັນ.