ໄລຍະໂຄວິດ-19 ປະຊາຊົນຫວັງໃຫ້ລັດຫລຸດຄ່ານໍ້າປະປາ ແລະ ໄຟຟ້າ

ເພື່ອຕອບສະຫນອງຄວາມມຸ່ງຫວັງຂອງປະຊາຊົນໃນໄລຍະການລະບາດຂອງພະຍາດໂຄວິດ-19 ຊຶ່ງຕ້ອງການໃຫ້ລັດຖະບານພິຈາລະນາຫລຸດຜ່ອນຄ່ານໍ້າປະປາ ແລະ ຄ່າໄຟຟ້າ, ພ້ອມຄ່າບໍລິການອື່ນໆຕໍ່ເບື້ອງລັດ, ຍ້ອນປະຊາຊົນບໍມີລາຍຮັບຫຍັງເລີຍໃນໄລຍະກັກກັນໂຕເອງຢູ່ບ້ານເຮືອນ ເພື່ອປ້ອງກັນໂຄວິດໂດຍບໍ່ສາມາດອອກໄປຊອກຢູ່ຫາກິນໄດ້ແຕ່ຢ່າງໃດ, ດັ່ງນັ້ນຢູ່ໃນກອງປະຊຸມປຶກສາຫາລືລະຫ່ວາງຄະນະສະເພາະກິດ ແລະ ວິສາຫະກິດຕ່າງໆເພື່ອແກ້ຜົນກະທົບຂອງການລະບາດພະຍາດນີ້ຕໍ່ເສດຖະກິດ ແລະ ຊີວິດການເປັນຢູ່ຂອງປະຊາຊົນທີ່ໄດ້ຈັດຂຶ້ນໃນວັນທີ 20 ເມສານີ້ທີ່ນະຄອນຫລວງວຽງຈັນໂດຍການເປັນະທານຂອງທ່ານຮອງນາຍົກລັດຖະມົນຕີສອນໄຊ ສີພັນດອນນັ້ນ: ລັດວິສາຫະກິດນໍ້າປະປາ ໄດ້ສະເໜີຕໍ່ກະຊວງໂຍທາທິການ ແລະ ຂົນສົ່ງ ເພື່ອພິຈາລະນາຫຼຸດລາຄານໍ້າປະປາໃຫ້ຜູ້ຊົມໃຊ້ປະເພດຄົວເຮືອນລົງ 5%, ພ້ອມນີ້ ລັດວິສາຫະກິດດັ່ງກ່າວ ຍັງໄດ້ສະເໜີກະຊວງການເງິນ ບໍ່ໃຫ້ເກັບຄ່າອາກອນມູນຄ່າເພີ່ມ 10% ໃນໄລຍະ 3 ເດືອນ (ພຶດສະພາ, ມີຖຸນາ ແລະ ກໍລະກົດ 2020) ແລະ ສະເໜີເພີ່ມໄລຍະການຊໍາລະຄ່ານໍ້າປະປາແຕ່ລະເດືອນ ຈາກ 2 ເດືອນມາເປັນ 3 ເດືອນ.

ສໍາລັບຄ່າກະແສໄຟຟ້າ ແມ່ນຈະໃຫ້ປະຕິບັດຕາມໂຄງສ້າງລາຄາໄຟຟ້າ ໃໝ່ ທີ່ຈະເລີ່ມປະຕິບັດໃນເດືອນພຶດສະພານີ້ເປັນຕົ້ນໄປ,ຈາກ 6 ຂັ້ນມາເປັນ 2 ຂັ້ນ, ພ້ອມທັງເລື່ອນເວລາຊໍາລະຄ່າໄຟຟ້າຈາກ 7-15 ວັນມາເປັນ 7-45 ວັນ ແລະ ສ່ວນຄ່າບໍລິການອື່ນໆກໍຂໍໃຫ້ເບື້ອງລັດພິຈາລະນາຕື່ມ, ນັບແຕ່ຄ່າເກັບຂີ່ເຫຍື່ອຂອງແຕ່ລະຄົວເຮືອນໄປົນຮອດຄ່າຝາກລົດຕາມສະຖານທີ່ຕ່າງໆຕື່ມອີກ ແລະ ທັງຫມົດນີ້ຄະນະສະເພາະກິດດ້ານນີ້ຈະນຳສະເຫນີກອງປະຊຸມປະຈຳເດືອນຂອງລັດຖະບານທີ່ຈະຈັດຂຶ້ນໃນມໍ່ໆນີ້.