ດີໃຈເປັນມື້ທີ 9 ແລ້ວ, ລາວບໍ່ພົບຜູ້ຕິດເຊື້ອລາຍໃໝ່
ໂດຍ: ລູກເມືອງພວນ
ສຸດແສນດີໃຈ ມື້ນີ້ວັນທີ 21 ເມສາ, ເປັນມື້ທີ 9 ຕິດຕໍ່ກັນແລ້ວ ລາວເຮົາບໍ່ພົບຜູ້ຕິດເຊື້ອລາຍໃໝ່ ໂດຍການຢືນຢັນຈາກຄະນະສະເພາະກິດຖະແຫຼງອອກໄປໃນຊ່ວງເວລາ 2 ໂມງຂອງວັນນີ້ເອງ.
ຖ້າສະພາບການທຸກຢ່າງຫາກຢຸດຈຶ້ງຢູ່ພຽງເທົ່ານີ້, ຄາດວ່າ ຮອດທ້າຍເດືອນເມສານີ້ ພະຍາດໂຄວິດ-19 ອາດຈະຫາຍໄປຈາກປະເທດລາວໄປກໍເປັນໄດ້ ເພາະທາງການລາວສາມາດຄວບຄຸມທຸກກຸ່ມເປົ້າ ໝາຍສ່ຽງໄວ້ໄດ້ໝົດແລ້ວ ເຊັ່ນ: ກຸ່ມຜູ້ຕິດເຊື້ອທັງ 19 ຄົນ, ກຸ່ມໃກ້ຊິດກັບຜູ້ຕິດເຊື້ອ (19 ຄົນ), ກຸ່ມນັກທ່ອງທ່ຽວ, ກຸ່ມແຮງງານລາວມາຈາກໄທ, ກຸ່ມນັກສຶກສາລາວ ແລະ ຄົນລາວທີ່ມາແຕ່ຕ່າງປະເທດ.
ສະຫຼຸບຄວາມແລ້ວ, ທຸກເປົ້າໝາຍຂ້າງເທິງນີ້ ລ້ວນແຕ່ຖືກທາງການຄວບຄຸມໄດ້ໝົດແລ້ວ. ນອກຈາກນີ້, ຜູ້ທີ່ຕິດເຊື້ອເຂົ້າຮັບການປິ່ນປົວກໍຫາຍດີແລ້ວ 2 ຄົນ, ຈຳນວນທີ່ຍັງເຫຼືອກໍມີອາການດີຂຶ້ນຕາມລຳດັບ, ຄາດວ່າຈະໄດ້ອອກໂຮງໝໍໃນບໍ່ດົນນີ້ໝົດທຸກຄົນ.
ຍ້ອນເຫດຜົນດັ່ງກ່າວ, ຈຶ່ງສາມາດຕີລາຄາໄດ້ວ່າ: ຖ້າສະພາບຫາກຍັງຄົງສະພາບເດີມແບບນີ້ຕໍ່ໄປ ຫຼື ມີຄວາມຄືບໜ້າກວ່ານີ້, ຄິດວ່າຮອດທ້າຍເດືອນເມສານີ້ ພະຍາດໂຄວິດອາດຈະຈິບຫາຍຈາກລາວກໍເປັນໄດ້. ພວກເຮົາຈົ່ງພ້ອມກັນລໍຟັງມື້ວັນທີ 3 ພຶດສະພາ ທາງລັດຖະບານຈະປະກາດອອກມາແບບໃດ.
ພວກເຮົາຈົ່ງຮ່ວມໃຈຕ້ານໄພໂຄວິດ ເອົາຊີວິດກັບຄືນມາສູ່ສະພາບເດີມໂດຍໄວ. ອົດໃຈລໍ, ອາດແມ່ນລາວເປັນປະເທດທຳອິດປະກາດເອົາຊະນະໂຄວິດ-19 ກ່ອນໝູ່ກໍເປັນໄດ້ໃນໂລກນີ້.
