ຜູ້ຊ່ຽວຊານເຕືອນອາຊຽນ ອາດເປັນແຫລ່ງໂຄວິດ-19 ລະບາດ
ຜູ້ຊ່ຽວຊານເຕືອນວ່າ: ກຸ່ມປະເທດອາຊີຕາເວັນອອກສຽງໃຕ້ (ອາຊຽນ) ອາດກາຍເປັນສູນກາງການແຜ່ລະບາດຂອງໂຄວິດ-19 ຫລັງຈາກຈຳນວນຜູ້ຕິດເຊື້ອໄດ້ເພີ່ມຂຶ້ນຢ່າງວ່ອງໄວໃນຫລາຍອາທິດຜ່ານມາ.
ປັດຈຸບັນ ອາຊຽນມີຜູ້ຕິດເຊື້ອໂຄວິດ-19 ຫລາຍກວ່າ 28.000 ຄົນ ໂດຍສິງກະໂປ, ອິນໂດເນເຊຍ ແລະ ມາເລເຊຍ ຄິດເປັນອັດຕາສ່ວນ 87,9% ຂອງຜູ້ຕິດເຊື້ອທັງໝົດ.
ເຖິງວ່າຈຳນວນຜູ້ຕິດເຊື້ອໂຄວິດ-19 ໃນອາຊຽນຍັງຕໍ່າກວ່າຢູ່ອາເມລິກາ ແລະ ເອີຣົບ ເຊິ່ງມີຈຳນວນຫລາຍແສນຄົນ, ແຕ່ຜົນການສຶກສາບົ່ງບອກວ່າ: ຈຳນວນຜູ້ຕິດເຊື້ອໃນອາຊຽນອາດຫລາຍກວ່າທີ່ມີການລາຍງານຫລາຍໝື່ນຄົນ ເນື່ອງຈາກຫລາຍປະເທດເຊັ່ນ: ອິນໂດເນເຊຍ ແລະ ຟີລິບປິນ ມີອັດຕາການກວດຫາຜູ້ຕິດເຊື້ອໃນລະດັບຕໍ່າ.
ສິງກະໂປ ເປີດເຜີຍວ່າ: ຜູ້ຕິດເຊື້ອໄວຣັສໂຄວິດ-19 ຄົນໃໝ່ມີຈຳນວນ 1.426 ຄົນໃນຮອບ 24 ຊົ່ວໂມງຜ່ານມາ ເຊິ່ງເປັນຈຳນວນສູງເປັນປະຫວັດສາດ ສົ່ງຜົນໃຫ້ປັດຈຸບັນສິງກະໂປມີຈຳນວນຜູ້ຕິດເຊື້ອໄວຣັສໂຄວິດ-19 ລວມ 8.014 ຄົນ ເຊິ່ງເປັນຈຳນວນສູງທີ່ສຸດໃນອາຊຽນ ແລະ ແຊງໜ້າອິນໂດເນເຊຍ ເຊິ່ງມີຈຳນວນຜູ້ຕິດເຊື້ອ 6.760 ຄົນ.
ຈາກຈຳນວນຜູ້ຕິດເຊື້ອຄົນໃໝ່ 1.426 ຄົນຂອງສິງກະໂປ ສ່ວນຫລາຍເປັນແຮງງານຕ່າງດ້າວທີ່ອາໄສຢູ່ຫໍພັກ ແລະ ມີພຽງ 16 ຄົນເທົ່ານັ້ນທີ່ເປັນຊາວສິງກະໂປ ຫລື ຜູ້ອາໄສຖາວອນຢູ່ສິງກະໂປ.
ນອກຈາກນີ້ ສິງກະໂປມີຜູ້ເສຍຊີວິດຈາກໂຄວິດ-19 ຈຳນວນ 11 ຄົນ, ແຕ່ຕໍ່າກວ່າອິນໂດເນເຊຍ ເຊິ່ງມີຜູ້ເສຍຊີວິດຫລາຍທີ່ສຸດໃນພາກພື້ນ ຈຳນວນ 590 ຄົນ.
