ຣັດເຊຍ ຈະຢຸດການສົ່ງອອກເຂົ້າບາເລໄປຕ່າງປະເທດ

ແຫລງຂ່າວຕ່າງປະເທດລາຍງານວ່າ: ທ່ານໂອກຊານາລຸດ ຮອງລັດຖະມົນຕີ ກະຊວງກະສິກຳຂອງຣັດເຊຍ ໃຫ້ຮູ້ວ່າ ປະເທດນີ້ ຈະຢຸດ ການສົ່ງອອກເຂົ້າບາເລ ຈົນເຖິງ ເດືອນກໍລະກົດ ແຕ່ຈະສົ່ງອອກຕາມໂຄຕ້າທ່ີໄດ້ກຳນົດໄວ້ ຄາດວ່າ ຈະສຳເລັດ ໃນເດືອນ ພຶດສະພານີ້.

ເມື່ອບໍ່ດົນມານີ້, ຣັດເຊຍ ຫ້າມສົ່ງອອກ ເຂົ້າບາເລ ຢ່າງຮອບດ້ານ ເມື່ອປີ 2010 ເນື່ອງຈາກ ໄພແຫ້ງແລ້ງ ສົ່ງຜົນກະທົບ ເຖິງ ປະລິມານ ການຜະລິດ ເຮັດໃຫ້ ຕະຫລາດໂລກ ໄດ້ມີ ການປ່ຽນແປງ. ປະເທດ ຕວັກກີ, ເອຢິບ ແລະ ບັງກລາເທດ ເປັນລູກຄ້າ ທ່ີຊື້ເຂົ້າ ບາເລ ຂອງ ຣັດເຊຍ ຫລາຍທ່ີສຸດ. ທ່ານລຸດ ກ່າວວ່າ ໂຄຕ້າ ການສົ່ງອອກເຂົ້າ ໄດ້ນຳໃຊ້ ໃນໄລຍະ1/4-30/6/2020.  ພາຍຫລັງ ການສົ່ງອອກເຂົ້າ ໝົດໂຄຕ້າ ດັ່ງກ່າວ, ແຫລ່ງສະໜອງ ພາຍນອກ ສະຫະພັນ ເສດຖະກິດ ອາຊີ–ເອີຣົບ (ໂດຍມີ ຣັດ ເຊຍ ນຳໜ້າ) ໃນໄລຍະ ດັ່ງກ່າວ ຈະຕ້ອງຢຸດຕິ.

ທ່ານກ່າວວ່າ  ໂດຍອີງຕາມ ຈັງຫວະການປະຕິບັດໂຄຕ້າ, ການເຄື່ອນໄຫວສົ່ງອອກຈະຕ້ອງຢຸດຕິໃນກາງເດືອນພຶດສະພາ ແລະ ຣັດເຊຍ ບໍ່ມີແຜນການ ເພີ່ມໂຄຕ້າ ໃນໄຕມາດ 2/2020. ເພື່ອຮັບປະກັນ ແຫລ່ງສະໜອງ ໃຫ້ແກ່ ຕະຫລາດ ພາຍໃນ ປະເທດ ໃນໄລຍະ ການແຜ່ ລະບາດ ພະຍາດ ໂຄວິດ-19, ຣັດເຊຍ ແລະ ບາງປະເທດ ເພື່ອນບ້ານ ເປັນຕົ້ນ ບັນດາ ປະເທດ ສົ່ງອອກ ເຂົ້າບາເລ ຂະໜາດໃຫຍ່ ໂດຍ ຜ່ານທະເລດຳ, ໄດ້ຈຳກັດ ການສົ່ງອອກ ທັນຍາພືດ ນັບແຕ່ ຕົ້ນເດືອນເມສາ.

ນັກທຸລະກິດ ເອີຣົບ ກ່າວວ່າ ໃນລະຫວ່າງກາງ ເດືອນພຶດສະພາ ຈະເປັນ ໄລຍະ ສິ້ນສຸດ ຂອງ ໂຄຕ້າ ໃນ ການສົ່ງອອກ ເຂົ້າບາເລ ຂອງ ຣັດເຊຍ ແລະ ປະເທດນີ້ ຈະສົ່ງອອກ ເຂົ້າບາເລ ໄປຕະຫລາດຕ່າງໆ ພາຍຫລັງ ເຫດ ການ ໃນປັດຈຸບັນ ຜ່ານພົ້ນໄປ. ຂະນະດຽວກັນນັ້ນ, ບັນດາ ນັກທຸລະກິດ ເອຢິບ ກ່າວວ່າ ຖ້າຣັດເຊຍ ຢຸດສົ່ງອອກເຂົ້າ ບາເລ ຄັ້ງໃໝ່ ທ່ີເອຢິບສັ່ງຊື້ ຄາດວ່າ ຈະສົ່ງ ຜົນກະທົບ ຂະໜາດໃຫຍ່. ຍ້ອນເອຢິບ ເປັນຜູ້ນຳເຂົ້າ ບາເລ ຂະໜາດ ໃຫຍ່ສຸດ ໄດ້ສັ່ງຊື້ ເຂົ້າບາເລ ກັບ ຣັດເຊຍ ຈຳນວນ 180.000 ໂຕນ ໃນອາທິດນີ້, ໃນຄວາມ ພະຍາຍາມ ເພີ່ມ ເຂົ້າບາເລ ເຂົ້າໃນ ສາງສຳຮອງ ຍຸດທະສາດ ທ່າມກາງ ການແຜ່ ລະບາດ ພະຍາດໂຄວິດ-19.