ຈະເປັນຜູ້ຟັງທີ່ດີໄດ້ແນວໃດໃນຊີວິດຄູ່ ?
April 18, 2020 - 1:05 PM
- ບັນຫາ : ຄູ່ສົມລົດຂອງທ່ານເວົ້າວ່າ “ເຈົ້າບໍ່ໄດ້ຟັງທີ່ຂ້ອຍເວົ້າເລີຍ” ສ່ວນທ່ານກໍຄິດໃນໃຈວ່າ “ກໍຟັງຢູ່ດຽວນີ້” ແຕ່ເບິ່ງຄືວ່າສິ່ງທີ່ທ່ານໄດ້ຍິນກັບສິ່ງທີ່ຄູ່ຂອງທ່ານເວົ້າຈະເປັນຄົນລະເລື່ອງກັນ ຜົນກໍຄື ທ່ານທັງສອງຜິດຖຽງກັນອີກແລ້ວ. ທ່ານສາມາດຫລີກເວັ້ນຄວາມຂັດແຍ່ງແບບນີ້ໄດ້ ແຕ່ກ່ອນອື່ນທ່ານຕ້ອງເຂົ້າໃຈວ່າອັນໃດອາດເປັນສາເຫດທີ່ທ່ານບໍ່ໄດ້ຍິນລາຍລະອຽດທັງໝົດທີ່ຄູ່ຂອງທ່ານເວົ້າ ໂດຍທີ່ທ່ານຄິດວ່າໂຕເອງກຳລັງຟັງຢູ່.
- ສາເຫດຂອງບັນຫາ : ທ່ານກຳລັງເມື່ອຍ, ມີຫຍັງມາເຮັດໃຫ້ຫວັ່ນໄຫວ ຫລື ທັງສອງຢ່າງ. ລູກອາດຮ້ອງໂວຍວາຍ, ສຽງໂທລະພາບກໍດັງຫລາຍ ແລະ ທ່ານກຳລັງຄິດເຖິງບັນຫາຢູ່ບ່ອນເຮັດວຽກ, ຢູ່ດີໆຄູ່ຂອງທ່ານກໍເວົ້າຫຍັງບາງຢ່າງຂຶ້ນມາ ເຊັ່ນ : “ຕອນຄໍ່ານີ້ຈະມີແຂກມາເຮືອນເຮົາເດີ້” ທ່ານງຶກຫົວແລ້ວຕອບວ່າ “ໂດຍ”, ແຕ່ຄວາມຈິງແລ້ວ ທ່ານອາດບໍ່ໄດ້ຍິນທີ່ລາວເວົ້າເລີຍ.
- ທ່ານຄິດຫລາຍໄປເອງ : ບາງເທື່ອການພະຍາຍາມອ່ານໃຈຄູ່ສົມລົດອາດເຮັດໃຫ້ເກີດບັນຫາກັບຊີວິດຄູ່, ທ່ານຄິດໄປເອງວ່າມີຫຍັງບາງຢ່າງແຝງຢູ່ໃນຄຳເວົ້າຂອງເຂົາ ເຊິ່ງຄວາມຈິງແລ້ວ ທ່ານອາດຄິດຫລາຍເກີນໄປກໍເປັນໄດ້. ໂຕຢ່າງ : ຄູ່ຂອງທ່ານອາດເວົ້າວ່າ “ອາທິດນີ້ເຈົ້າເຮັດວຽກລ່ວງເວລາເກືອບທຸກມື້ເລີຍເນາະ” ທ່ານຕີຄວາມໝາຍໄປວ່າຄູ່ຂອງທ່ານກຳລັງຕຳໜິທ່ານ ທ່ານຈຶ່ງສວນກັບໄປວ່າ “ມັນບໍ່ແມ່ນຄວາມຄິດຂອງຂ້ອຍ, ທີ່ຂ້ອຍຕ້ອງເຮັດວຽກເດິກໆດື່ນໆທຸກມື້ນີ້ກໍຍ້ອນເຈົ້າມັກໄປຊື້ອັນນັ້ນຊື້ອັນນີ້ຢູ່ຕະຫລອດເວລາ”. ຄູ່ຂອງທ່ານກໍໂວຍວາຍຕອບກັບທັນທີວ່າ “ຂ້ອຍກໍບໍ່ໄດ້ວ່າຫຍັງໃຫ້ເຈົ້າເລີຍ” ເຊິ່ງຄວາມຈິງແລ້ວ ຕອນທຳອິດເຂົາກໍພຽງແຕ່ຢາກຊວນທ່ານໄປພັກຜ່ອນນຳກັນໃນຊ່ວງວັນເສົາ-ອາທິດ.
- ທ່ານເມົາແຕ່ຄິດຫາທາງແກ້ບັນຫາ : ຂ້ອຍບອກວ່າ “ບາງເທື່ອຂ້ອຍພຽງແຕ່ຢາກບອກເຂົາວ່າຂ້ອຍຮູ້ສຶກແນວໃດ, ແຕ່ເຂົາຊຳ້ພັດຢາກຊ່ວຍແກ້ໄຂບັນຫາ, ຂ້ອຍບໍ່ໄດ້ຢາກຮູ້ວິທີແກ້ໄຂບັນຫາ ພຽງແຕ່ຢາກໃຫ້ເຂົາຮູ້ວ່າຂ້ອຍຮູ້ສຶກແນວໃດ” ແມ່ນຫຍັງເຮັດໃຫ້ທັງສອງບໍ່ເຂົ້າໃຈກັນ ? ຄົນໜຶ່ງເມົາແຕ່ຄິດຫາທາງແກ້ໄຂບັນຫາ ເຂົາຈຶ່ງບໍ່ທັນຟັງວ່າອີກຄົນໜຶ່ງເວົ້າຫຍັງ ຫລື ອາດຈັບໃຈຄວາມບໍ່ໄດ້ທັງໝົດ. ບໍ່ວ່າອັນໃດຈະເປັນສາເຫດຂອງບັນຫາ ທ່ານຈະເປັນຜູ້ຟັງທີ່ດີຂຶ້ນໄດ້ແນວໃດ ?
- ສິ່ງທີ່ທ່ານເຮັດໄດ້ :
- ຕັ້ງໃຈຟັງແທ້ໆ : ຄູ່ຂອງທ່ານມີເລື່ອງສຳຄັນຈະບອກທ່ານ, ແຕ່ທ່ານພ້ອມຈະຟັງຫລືບໍ່ ? ບາງເທື່ອທ່ານອາດບໍ່ພ້ອມ ເພາະຕອນນີ້ີ້ໃຈຂອງທ່ານກຳລັງຄິດເລື່ອງອື່ນຢູ່. ຖ້າເປັນແນວນັ້ນກໍຢ່າເຮັດທຳທ່າວ່າຕັ້ງໃຈຟັງ, ຖ້າເປັນໄປໄດ້ໃຫ້ພັກເລື່ອງທີ່ທ່ານກຳລັງເຮັດໄວ້ກ່ອນແລ້ວຕັ້ງໃຈຟັງຄູ່ຂອງທ່ານ ຫລື ຂໍໃຫ້ເຂົາລໍຖ້າຈົນກ່ວາທ່ານຈະວ່າງ ແລ້ວຄ່ອຍລົມກັນ.
- ປ່ຽນກັນເວົ້າ ປ່ຽນກັນຟັງ : ເມື່ອທ່ານຕ້ອງເປັນຝ່າຍຟັງ ພະຍາຍາມຢ່າເວົ້າແຊກ ຫລື ຖຽງຄູ່ສົມລົດ ລໍຖ້າໃຫ້ເຖິງຜຽນຂອງທ່ານກ່ອນ ແລ້ວຄ່ອຍເວົ້າ ຕອນນີ້ທ່ານຕ້ອງຟັງເຂົາແນ່.
- ໃຊ້ຄຳຖາມ : ການຖາມຄຳຖາມຈະຊ່ວຍໃຫ້ທ່ານເຂົ້າໃຈເລື່ອງທີ່ຄູ່ຂອງທ່ານກຳລັງເວົ້າຫລາຍຂຶ້ນ ເຊິ່ງການຖາມສະແດງເຖິງຄວາມສົນໃຈຟັງອີກຝ່າຍແທ້ໆ.
- ພະຍາຍາມເຂົ້າໃຈຄວາມໝາຍທີ່ແຝງຢູ່ໃນຄຳເວົ້າ : ທ່ານຕ້ອງສັງເກດສີໜ້າທ່າທາງ ລວມທັງສາຍຕາ ແລະ ນຳ້ສຽງຂອງຄູ່ສົມລົດ ເມື່ອຄູ່ສົມລົດເວົ້າວ່າ “ກໍດີ” ຄວາມຈິງອາດໝາຍເຖິງ “ບໍ່ເຫັນຈະດີເລີຍ” ຂຶ້ນຢູ່ກັບວິທີທີ່ເຂົາເວົ້າ ຫລື ເມື່ອເຂົາບອກວ່າ “ເຈົ້າບໍ່ເຄີຍຊ່ວຍເຫລືອຫຍັງຂ້ອຍເລີຍ” ອາດແຝງຄວາມໝາຍວ່າ “ເຈົ້າບໍ່ເຄີຍເຫັນຄວາມສຳຄັນຂອງຂ້ອຍເລີຍ” ທ່ານຕ້ອງພະຍາຍາມເຂົ້າໃຈວ່າຄວາມຈິງແລ້ວຄູ່ສົມລົດຕ້ອງການບອກຫຍັງ ເຖິງວ່າເຂົາຈະບໍ່ໄດ້ເວົ້າອອກມາໂດຍກົງກໍຕາມ ບໍ່ດັ່ງນັ້ນ ທ່ານອາດຕ້ອງຜິດຖຽງກັນຍ້ອນຄຳເວົ້າພຽງບາງຄຳ.
- ຟັງໃຫ້ຈົບ : ຢ່າເຮັດເສີຍ ຫລື ຍ່າງໜີ ເຖິງວ່າຄູ່ສົມລົດຈະເວົ້າຫຍັງບາງຢ່າງທີ່ເຮັດໃຫ້ທ່ານບໍ່ພໍໃຈ ໂຕຢ່າງ : ຖ້າຄູ່ຂອງທ່ານວິພາກວິຈານທ່ານ ທ່ານຈະເຮັດແນວໃດ ? ເຊິ່ງຂໍແນະນຳວ່າ ທ່ານຄວນພະຍາຍາມຟັງໃຫ້ຈົບກ່ອນ ຖ້າທ່ານຕັ້ງໃຈຟັງແທ້ໆວ່າຄູ່ສົມລົດຂອງທ່ານເວົ້າຫຍັງ ທ່ານກໍສະແດງໃຫ້ເຫັນວ່າທ່ານເປັນຜູ້ໃຫຍ່ພໍ ແລະ ຄົນທີ່ໄດ້ປະໂຫຍດກໍແມ່ນໂຕທ່ານເອງ.
- ຟັງດ້ວຍຫົວໃຈ : ການຟັງຢ່າງຕັ້ງອົກຕັ້ງໃຈບໍ່ໄດ້ເປັນພຽງແຕ່ເຕັກນິກການສົນທະນາ, ແຕ່ເປັນການສະແດງຄວາມຮັກ. ຖ້າທ່ານສົນໃຈເລື່ອງທີ່ຄູ່ຂອງທ່ານເວົ້າແທ້ໆ ທ່ານກໍຈະຍິນດີຟັງເຂົາໂດຍບໍ່ຮູ້ສຶກຝືນໃຈ ຫລື ທຳທ່າເຮັດເປັນຕັ້ງໃຈຟັງ. ຖ້າທ່ານເຮັດແບບນີ້ ທ່ານກໍກຳລັງເຮັດຕາມຄຳແນະນຳທີ່ວ່າ “ຢ່າໃຫ້ໃຜຄິດແຕ່ເລື່ອງປະໂຫຍດສ່ວນໂຕ ແຕ່ໃຫ້ເຫັນແກ່ປະໂຫຍດຂອງຄົນອື່ນນຳ, ທຸກຄົນຕ້ອງໄວໃນການຟັງ ແລະ ຊ້າໃນການເວົ້າ” ຖ້າທ່ານພະຍາຍາມຈະເວົ້າກັບຄູ່ສົມລົດຕອນທີ່ເຂົາກຳລັງຢູ່ໃນອີກຫ້ອງໜຶ່ງ ຫລື ກຳລັງຄາວຽກຫຍຸ້ງຢູ່ ທ່ານຄິດວ່າເຂົາຈະໄດ້ຍິນສິ່ງທີ່ທ່ານເວົ້າຫລືບໍ່ ? ຈະດີກ່ວາບໍ່ຖ້າທ່ານຈະຍ່າງໄປຫາເຂົາແລ້ວລົມກັນ ຫລື ລໍຖ້າໃຫ້ມີໂອກາດທີ່ເໝາະສົມແລ້ວຄ່ອຍລົມກັນ.
