ເມື່ອຊີວິດຄູ່ບໍ່ເປັນດັ່ງທີ່ຄິດ
April 18, 2020 - 12:14 PM
- ປັນຫາ : ກ່ອນແຕ່ງດອງ ທ່ານກັບຄູ່ສົມລົດມີຫຍັງທີ່ຄ້າຍຄືກັນເກືອບທຸກຢ່າງ, ແຕ່ມາເບິ່ງຕອນນີ້ ຄວາມຜິດຫວັງຊຳ້ພັດເຮັດໃຫ້ທ່ານຮູ້ສຶກໝົ່ນໝອງ, ອົມທຸກ ແລະ ການໃຊ້ຊີວິດຢູ່ຮ່ວມກັນກໍບໍ່ຕ່າງຫຍັງກັບການຕິດຄຸກ. ທ່ານຈະປັບປຸງຄວາມສຳພັນໃຫ້ດີຂຶ້ນໄດ້ແນວໃດ ? ແຕ່ກ່ອນອື່ນໃຫ້ເຮົາມາເບິ່ງວ່າແມ່ນຫຍັງທີ່ອາດເປັນສາເຫດທີ່ເຮັດໃຫ້ທ່ານຮູ້ສຶກຜິດຫວັງ ?
- ສາເຫດຂອງບັນຫາ : ພົບຂອງແທ້ແລ້ວ ວຽກງານຈຳເຈທີ່ຕ້ອງເຮັດທຸກມື້, ການລ້ຽງລູກ ແລະ ການຕິດຕໍ່ກ່ຽວຂ້ອງກັບຍາດຕິພີ່ນ້ອງຂອງຜົວ ຫລື ເມຍ ອາດເຮັດໃຫ້ຄວາມຫວານໃນຊີວິດຄູ່ຄ່ອຍໆຈືດຈາງລົງ ທັງຍັງພົບບັນຫາທີ່ບໍ່ຄາດຄິດໂຮມເຂົ້າມາຕື່ມອີກ ເຊັ່ນ : ສະພາບການເງິນທີ່ບໍ່ດີຄືເກົ່າ ຫລື ການຕ້ອງຄອຍດູແລຄົນໃນຄອບຄົວທີ່ເຈັບປ່ວຍຊຳ້ເຮື້ອກໍອາດເຮັດໃຫ້ສາຍສົມລົດເຄັ່ງຕຶງໄດ້.
- ຄວາມແຕກຕ່າງທີ່ເຮັດໃຫ້ຊີວິດເຮົາສວນທາງກັນ : ຊ່ວງທີ່ລົມກັນ ທັງສອງອາດຖືເບົາຂໍ້ແຕກຕ່າງຂອງກັນ ແລະ ກັນ, ແຕ່ເມື່ອແຕ່ງດອງແລ້ວກໍຫາກໍມາຮູ້ວ່າ ເຮົາສອງຄົນແຕກຕ່າງກັນຄົນລະຟາກ ທັງໃນເລື່ອງວິທີໂອ້ລົມ, ການໃຊ້ເງິນ ແລະ ວິທີແກ້ໄຂບັນຫາ, ຄວາມແຕກຕ່າງທີ່ຕອນທຳອິດພຽງແຕ່ເຮັດໃຫ້ຮູ້ສຶກລຳຄານ ແຕ່ຕອນນີ້ອາດກາຍເປັນເລື່ອງທີ່ສຸດຈະອົດທົນ.
- ເລີ່ມບໍ່ສົນໃຈຄວາມຮູ້ສຶກຂອງກັນ ແລະ ກັນ : ຕະຫລອດໄລຍະທີ່ຢູ່ກິນກັນມາ ຜົວເມຍອາດເວົ້າ ຫລື ເຮັດຫຍັງໂດຍທີ່ບໍ່ສົນໃຈຄວາມຮູ້ສຶກຂອງກັນ ແລະ ກັນ ລວມເຖິງບັນຫາຄວາມຂັດແຍ່ງທີ່ທັບຖົມມາດົນເປັນປີ ອາດເຮັດໃຫ້ທັງສອງມິດປາກ ບໍ່ຍອມເຜີຍຄວາມຮູ້ສຶກທີ່ແທ້ຈິງອອກມາ ຫລື ຮ້າຍແຮງໄປກ່ວານັ້ນກໍຄື ຝ່າຍໃດຝ່າຍໜຶ່ງອາດເລີ່ມເຜີໃຈໃຫ້ຄົນອື່ນ.
- ຝັນໃນສິ່ງທີ່ບໍ່ກົງກັບຄວາມເປັນຈິງ : ຄົນທີ່ແຕ່ງດອງກັນແລ້ວບາງຄົນຄິດວ່າ ເຂົາໄດ້ພົບຄົນທີ່ແມ່ນ ແລະ ຕັ້ງໃຈຈະໃຊ້ຊີວິດຢູ່ຮ່ວມກັນຢ່າງມີຄວາມສຸກຕະຫລອດໄປ ຄວາມຄິດທີ່ວ່າເຂົາແມ່ນຄົນທີ່ຟ້າລິຂິດມາໃຫ້ເປັນເນື້ອຄູ່ກັນຊ່າງຫວານຊື່ນໂຣແມນຕິກແທ້ໆໆ, ແຕ່ຄວາມຄິດແບບນີ້ອາດເປັນຈຸດເລີ່ມຕົ້ນໃຫ້ຊີວິດຄູ່ພັງທະລາຍໄດ້ ເພາະທັນທີທີ່ມີບັນຫາ ແລະ ບໍ່ເປັນດັ່ງທີ່ຄາດຫວັງ ນິຍາຍຮັກເລື່ອງຄູ່ແທ້ ກໍຮອດຕອນອາວະສານ ເຫລືອໄວ້ພຽງຄວາມຮູ້ສຶກຜິດທີ່ກັດກິນໃຈທັງສອງຝ່າຍ.
- ທ່ານຈະເຮັດແນວໃດໄດ້ແນ່ ? ເບິ່ງໃນຂໍ້ດີຂອງຄູ່ສົມລົດ ລອງເຮັດແບບນີ້ ຂຽນຂໍ້ດີຂອງເຂົາຈັກ 3 ຂໍ້ ແລ້ວເກັບໄວ້ກັບໂຕທ່ານ ເຊັ່ນ : ຂຽນໄວ້ຫລັງຮູບແຕ່ງດອງໃບນ້ອຍໆທີ່ທ່ານພົກຕິດໂຕ ຫລື ບັນທຶກໄວ້ໃນໂທລະສັບມືຖືກໍໄດ້ ເອົາສິ່ງທີ່ທ່ານຂຽນໄວ້ຂຶ້ນມາເບິ່ງເລື້ອຍໆເພື່ອເຕືອນໃຈວ່າເປັນຫຍັງທ່ານຈຶ່ງຕັດສິນໃຈແຕ່ງດອງກັບຄົນຜູ້ນີ້, ການເບິ່ງຂໍ້ດີຂອງຄູ່ສົມລົດຈະຊ່ວຍໃຫ້ທ່ານອົດທົນກັບຂໍ້ແຕກຕ່າງຫລາຍຢ່າງໄດ້ ທັງຍັງຊ່ວຍໃຫ້ຢູ່ຮ່ວມກັນຢ່າງມີຄວາມສຸກ ໂດຍບໍ່ຜິດຖຽງກັນ.
- ວາງແຜນທີ່ຈະມີເວລາພິເສດໆຮ່ວມກັນ : ກ່ອນແຕ່ງດອງ ທ່ານສອງຄົນມັກນັດພົບກັນ ແລະ ໃຊ້ເວລາເຮັດຫຍັງພິເສດໆນຳກັນສະເໝີ ນັ້ນເປັນສິ່ງໃໝ່ໃນຊີວິດທີ່ເຮັດໃຫ້ຫົວໃຈທ່ານເຕັ້ນແຮງ ທ່ານກໍເຄີຍເຮັດແບບນີ້ມາແລ້ວແມ່ນບໍ່ ? ຕອນນີ້ເປັນຫຍັງບໍ່ເຮັດຄືກັບຕອນນັ້ນອີກ ? ບາງເທື່ອທ່ານໜ້າຈະວາງແຜນເພື່ອໃຊ້ເວລາພິເສດໆຮ່ວມກັນ ເຊິ່ງຈະເຮັດໃຫ້ທ່ານສະໜິດກັນຫລາຍຂຶ້ນ ແລະ ຊ່ວຍໃຫ້ທ່ານກັບຄູ່ຂອງທ່ານໄດ້ຮ່ວມກັນຈັດການກັບບັນຫາທີ່ອາດເກີດຂຶ້ນແບບບໍ່ຄາດຄິດໄດ້ດີກ່ວາ.
- ເປີດໃຈລົມກັນ : ຖ້າທ່ານຮູ້ສຶກເປັນທຸກທໍລະມານ ຍ້ອນສິ່ງທີ່ຄູ່ສົມລົດເວົ້າ ຫລື ເຮັດ ທ່ານຈະລືມເລື່ອງນັ້ນໄດ້ບໍ່ ? ຖ້າລືມບໍ່ໄດ້ ກໍຢ່າແກ້ເກມດ້ວຍການມິດງຽບບໍ່ເວົ້າຈາກັນ, ແຕ່ຈົ່ງເປີດໃຈກັບຄູ່ຂອງທ່ານທັນທີທີ່ຮູ້ສຶກວ່າພ້ອມຈະໂອ້ລົມດ້ວຍຄວາມໃຈເຢັນ ແລະ ຖ້າເປັນໄປໄດ້ຄວນຫັນໜ້າລົມກັນກ່ອນຈະຂ້າມຄືນນັ້ນໄປ.
- ແຍກໃຫ້ອອກວ່າອັນໃດແມ່ນຄວາມຮູ້ສຶກຂອງທ່ານກັບເຈດຕະນາແທ້ໆຂອງຄູ່ສົມລົດ : ປົກກະຕິແລ້ວ ທ່ານທັງສອງຄົງບໍ່ມີເຈດຕະນາຈະເຮັດໃຫ້ກັນເສຍໃຈ ດັ່ງນັ້ນ ຢ່າລືມຂໍໂທດກັນຈາກໃຈຈິງ ຖ້າທ່ານເຮັດໃຫ້ອີກຝ່າຍເສຍໃຈ ຫລື ເປັນທຸກໃຈໂດຍບໍ່ຮູ້ໂຕ ຍົກເລື່ອງທີ່ເຮັດໃຫ້ທ່ານທັງສອງຮູ້ສຶກບໍ່ສະບາຍໃຈຂຶ້ນມາລົມກັນ ເພື່ອຈະບໍ່ໃຫ້ເກີດບັນຫາແບບນີ້ອີກໃນເທື່ອໜ້າ, ຈົ່ງກະລຸນາຕໍ່ກັນ, ສະແດງຄວາມເຫັນໃຈກັນ, ໃຫ້ອະໄພກັນຢ່າງໃຈກ້ວາງ.
- ຍອມຮັບໂຕຕົນທີ່ແທ້ຈິງຂອງກັນ ແລະ ກັນ : ຄຳພີໄບເບິ້ນຍອມຮັບວ່າຄົນທີ່ແຕ່ງດອງ ຈະເຮັດໃຫ້ໂຕເອງລຳບາກ, ຖ້າທ່ານພົບບັນຫາທີ່ເຮັດໃຫ້ການຄອງຄູ່ບໍ່ຄ່ອງແຄ້ວ ຢ່າຮີບຮ້ອນໂທດວ່າເປັນຄວາມຜິດຂອງອີກຝ່າຍໜຶ່ງ, ແຕ່ຄວນຫັນໜ້າເຂົ້າຫາກັນ ແລະ ຊ່ວຍກັນແກ້ໄຂບັນຫາໂດຍອົດທົນໃສ່ກັນ ແລະ ກັນເລື້ອຍໄປ ແລະ ໃຫ້ອະໄພກັນຢ່າງໃຈກ້ວາງ.
- ຍຶດໝັ້ນກັບຄຳສັນຍາ ຫລື ຄຳປະຕິຍານຂອງທ່ານ : ທ່ານຈື່ໄດ້ບໍ່ວ່າກ່ອນແຕ່ງດອງ ຫລື ໃນມື້ແຕ່ງດອງ ທ່ານໄດ້ສັນຍາຫຍັງກັບຄູ່ສົມລົດຂອງທ່ານໄວ້ແນ່ ? ລອງນຶກທົບທວນ ແລ້ວຖາມໂຕເອງວ່າ : ຂ້ອຍຈະຍຶດໝັ້ນກັບຄຳສັນຍາວ່າຈະຮັກກັນຕະຫລອດໄປໄດ້ບໍ່ ? ຢ່າເມົາແຕ່ຄິດວ່າອີກຝ່າຍໜຶ່ງບໍ່ເຮັດຕາມຄຳສັນຍາທີ່ປະຕິຍານໄວ້ ຍ້ອນທ່ານເອງກໍສັນຍາວ່າທ່ານຈະເຮັດຕາມຄຳປະຕິຍານນັ້ນຄືກັນ ແລະ ຖ້າແຕ່ລະຝ່າຍພະຍາຍາມຍຶດໝັ້ນກັບຄຳສັນຍາໄດ້ ແນ່ນອນວ່າທ່ານທັງສອງກໍຈະໄດ້ຮັບຊີວິດສົມລົດທີ່ມີຄວາມສຸກເປັນລາງວັນ.
