ຈີນເປີດໂຮງໄຟຟ້າພະລັງງານແສງຕາເວັນໃຫຍ່ສຸດໃນໂລກ
ໂຮງໄຟຟ້າຂະໜາດ 40 ເມກາວັດ ແຫ່ງນີ້ຢູ່ໃນແຂວງອານຮຸຍ ມີແຜງເຊວແສງຕາເວັນ 160.000 ແຜງ ລອຍຮັບແສງຕາເວັນຢູ່ໃນທະເລສາບ ທີ່ເກີດຂຶ້ນພາຍຫລັງບໍ່ຖ່ານຫີນແຫ່ງໜຶ່ງຍຸບຕົວລົງ.
ນີ້ເປັນຄວາມພະຍາຍາມຂອງຈີນໃນການຫລຸດການອາໄສພະລັງງານຈາກເຊື້ອໄຟຟອສຊິລ ເຊິ່ງເຮັດໃຫ້ຈີນເປັນປະເທດປ່ອຍແກັສກາກບອນໄດອົກໄຊລາຍໃຫຍ່ທີ່ສຸດຂອງໂລກ, 2 ໃນ 3 ຂອງພະລັງງານໄຟຟ້າໃນຈີນມາຈາກເຊື້ອໄຟຖ່ານຫີນ.
+ ສະຫະພາບເອີຮົບ-ຈີນ ບໍ່ສົນໃຈ ທຣຳ ກຽມຖະແຫລງ ຈຸດຢືນເດີນໜ້າຂໍ້ຕົກລົງຫລຸດໂລກຮ້ອນ
+ ທຣຳ ປະກາດຖອນຕົວຈາກຂໍ້ຕົກລົງຫລຸດໂລກຮ້ອນແລ້ວ
ໂຮງໄຟຟ້າພະລັງແສງຕາເວັນແຫ່ງນີ້ເລີ່ມເປີດໃຊ້ໄລ່ລຽງກັບໄລຍະທີ່ປະທານາທິບໍດີ ໂດນັນ ທຣຳ ຂອງອາເມລິກາ ປະກາດຖອນຕົວຈາກຂໍ້ຕົກລົງປາຣີ ໃນວັນທີ 2 ມິຖຸນາ.
ຄຳປະກາດຂອງຜູ້ນຳອາເມລິກາ ເຮັດໃຫ້ປະຊາຄົມໂລກເລັ່ງຈຸດສົນໃຈໃສ່ຈີນວ່າພ້ອມຈະສະແດງບົດບາດຜູ້ນຳໃນການຕໍ່ສູ້ກັບບັນຫາໂລກຮ້ອນ ຫລື ບໍ່.
ພາຍຫລັງທ່ານ ທຣຳ ປະກາດຖອນຕົວຈາກຂໍ້ຕົກລົງປາຣີ, ຈີນເປັນເຈົ້າພາບຈັດກອງປະຊຸມສາກົນເລື່ອງພະລັງງານສະອາດ. ກອງປະຊຸມນີ້ເປັນໂອກາດໃຫ້ຈີນ ເຊິ່ງຜະລິດແຜງພະລັງແສງຕາເວັນຫລາຍທີ່ສຸດໃນໂລກ ປະມານ 2 ໃນ 3 ຂອງການຜະລິດໃນໂລກ ໄດ້ປະກາດເຈດຕະນາຈະເລັ່ງລົງທຶນ ແລະ ປະຕິຮູບການໃຊ້ພະລັງງານໝູນວຽນ.
ສຳນັກຂ່າວບລູມເບີກລາຍງານວ່າ: ນັບແຕ່ປີ 2012 ຈີນກາຍເປັນປະເທດທີ່ລົງທຶນເລື່ອງພະລັງງານສະອາດລາຍໃຫຍ່ທີ່ສຸດຂອງໂລກ ໂດຍໄດ້ລົງທຶນໃນພະລັງງານລົມ ແລະ ແສງຕາເວັນແລ້ວປະມານ 720 ຕື້ກີບ.
ໃນປີ 2016 ປະສິດທິພາບເລື່ອງພະລັງງານແສງຕາເວັນຂອງຈີນເພີ່ມຂຶ້ນທົບໜຶ່ງ, ລັດຖະບານຕັ້ງເປົ້າວ່າພາຍໃນປີ 2030 ການຜະລິດໄຟຟ້າ 20% ຈະຕ້ອງມາຈາກເຊື້ອໄຟທີ່ປ່ອຍແກັສເຮືອນແກ້ວໃນປະລິມານຕໍ່າ ເຊິ່ງລວມທັງຈາກໂຮງໄຟຟ້ານິວເຄຼຍ ໂດຍປັດຈຸບັນນີ້ ການຜະລິດໄຟຟ້າຈາກເຊື້ອໄຟດັ່ງກ່າວມີອັດຕາສ່ວນພຽງ 11%.
