ອິນໂດເນເຊຍປະກາດໄພຈາກໂຄວິດ ເປັນ “ໄພພິບັດແຫ່ງຊາດ”

     ປະທານາທິບໍດີ ໂຈໂຄ ວິໂດໂດ ປະກາດໃຫ້ສະຖານະການການແຜ່ລະບາດຂອງໂຄວິດ-19 ຢູ່ອິນໂດເນເຊຍ ໃນຮອບ 24 ຊົ່ວໂມງ ຫລ້າສຸດມີຜູ້ເສຍຊີວິດ 60 ຄົນ “ເປັນໄພພິບັດແຫ່ງຊາດ”.

     ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂຈໂຄ ວິໂດໂດ ຖະແຫລງໃນວັນທີ 14 ເມສາ ປະກາດໃຫ້ສະຖານະການການແຜ່ລະບາດຂອງໂຄວິດ-19 ຢູ່ອິນໂດເນເຊຍ “ເປັນໄພພິບັດແຫ່ງຊາດ” ຄວາມພະຍາຍາມຢັບຢັ້ງໂຣກລະບາດທີ່ກຳລັງເກີດຂຶ້ນໃຫ້ຢູ່ພາຍໃຕ້ການເບິ່ງແຍງຂອງຄະນະສະເພາະກິດ ເຊິ່ງມອບໝາຍໂດຍປະທານາທິບໍດີ ດ້ວຍການຮ່ວມມືຈາກທຸກກະຊວງ, ລັດຖະບານທ້ອງຖິ່ນ ແລະ ອົງການບໍລິຫານແກ້ໄຂໄພພິບັດແຫ່ງຊາດ.

     ທັງນີ້ ນະຄອນຫລວງຈາກາຕາເປັນເມືອງໃຫຍ່ແຫ່ງທຳອິດຂອງອິນໂດເນເຊຍ ທີ່ຍົກລະດັບມາດຕະການທາງສັງຄົມ ເພື່ອຢັບຢັ້ງການແຜ່ລະບາດຂອງໂຣກ ໂດຍໃຫ້ສອດຄ່ອງກັບແນວທາງຂອງລັດຖະບານ ເຊິ່ງຂໍການຮ່ວມມືໃຫ້ປະຊາຊົນຫລີກລ່ຽງການອອກນອກເຄຫາສະຖານຖ້າບໍ່ຈຳເປັນ ແລະ ປະຕິບັດຕາມແນວທາງຮັກສາໄລຍະຫ່າງທາງສັງຄົມຢ່າງເຄັ່ງຂັດ.

     ຂະນະທີ່ກະຊວງສາທາລະນະສຸກຂອງອິນໂດເນເຊຍລາຍງານສະຖານະການໂຄວິດ-19 ປະຈຳວັນ ວ່າມີການຢືນຢັນຜູ້ເສຍຊີວິດໃໝ່ອີກ 60 ຄົນ ຖືເປັນສະຖິຕິຜູ້ເສຍຊີວິດແຕ່ລະວັນສູງທີ່ສຸດ ເພີ່ມສະຖິຕິຜູ້ເສຍຊີວິດເປັນຢ່າງໜ້ອຍ 459 ຄົນ ແລະ ມີການຢືນຢັນຜູ້ຕິດເຊື້ອໃໝ່ອີກ 282 ຄົນ ເພີ່ມຈຳນວນຜູ້ຕິດເຊື້ອເປັນຢ່າງໜ້ອຍ 4.839 ຄົນ ໂດຍມີຜູ້ໄດ້ຮັບການປິ່ນປົວຫາຍແລ້ວ 426 ຄົນ.