ຜູ້ຕິດເຊື້ອໂຄວິດ-19 ທົ່ວໂລກໃກ້ຮອດ 2 ລ້ານຄົນ
ວັນທີ 15 ເມສາ ຈຳນວນຜູ້ຕິດເຊື້ອໂຄວິດ-19 ຍັງເພີ່ມສູງຂຶ້ນຢ່າງຕໍ່ເນື່ອງໃກ້ຮອດ 2 ລ້ານຄົນໃນອີກບໍ່ເທົ່າໃດຊົ່ວໂມງຕໍ່ໜ້ານີ້ ຫລັງການລະບາດກຳລັງກ້າວເຂົ້າສູ່ເດືອນທີ 4, ປິ່ນປົວຫາຍດີແລ້ວ 478.503 ຄົນ ອັດຕາການປິ່ນປົວຫາຍ 24%, ເສຍຊີວິດແລ້ວ 126.597 ຄົນ ອັດຕາການເສຍຊີວິດ 6,34%.
ໂດຍອາເມລິກາພົບຜູ້ຕິດເຊື້ອຄົນໃໝ່ເພີ່ມຂຶ້ນ 26.945 ຄົນ ສົ່ງຜົນໃຫ້ຈຳນວນຜູ້ຕິດເຊື້ອສູງກວ່າ 6,1 ແສນກວ່າຄົນ ຫລັງຈາກກວດຫາການຕິດເຊື້ອແລ້ວ 3 ລ້ານກວ່າຄົນທົ່ວປະເທດ, ເສຍຊີວິດ 2.400 ກວ່າຄົນໃນມື້ດຽວ ຖືເປັນມື້ທີ 9 ທີ່ມີຈຳນວນຜູ້ເສຍຊີວິດສູງກວ່າ 1.500 ຄົນຕິດຕໍ່ກັນ ສົ່ງຜົນໃຫ້ຈຳນວນຜູ້ເສຍຊີວິດມີ 26.047 ຄົນ, ໜີຫ່າງອະດີດແຊ້ມເກົ່າຄືອິຕາລີໄປແລ້ວ 5.000 ກວ່າຄົນ.
ຫລ້າສຸດ ພົບຜູ້ຕິດເຊື້ອໄວຣັສໂຄໂຣນາແລ້ວຢ່າງໜ້ອຍໃນ 178 ປະເທດ ໂດຍປະເທດທີ່ພົບຜູ້ຕິດເຊື້ອຫລາຍທີ່ສຸດ 5 ອັນດັບທຳອິດຄື: ອາເມລິກາ (613.886 ຄົນ), ແອັດສະປາຍ (174.060 ຄົນ), ອິຕາລີ (162.488 ຄົນ), ຝຣັ່ງ (143.303 ຄົນ) ແລະ ເຢຍລະມັນ (132.210 ຄົນ) ເຊິ່ງພົບຜູ້ຕິດເຊື້ອຢູ່ຈີນຄິດເປັນພຽງ 4,12% ຂອງຜູ້ຕິດເຊື້ອທັງໝົດ 1.997.666 ຄົນທົ່ວໂລກ.
ນິວຢອກຖືເປັນລັດທີ່ພົບຜູ້ຕິດເຊື້ອຫລາຍທີ່ສຸດໃນອາເມລິກາ ຫລາຍກວ່າ 2 ແສນຄົນ ເສຍຊີວິດແລ້ວກວ່າ 10.000 ຄົນແລ້ວ, ຮອງລົງມາແມ່ນລັດນິວເຈີຊີ (68.824 ຄົນ), ລັດເມສຊາຊູເຊດ (28.163 ຄົນ), ລັດມິຊິແກນ (27.001 ຄົນ) ແລະ ລັດແຄລິຟໍເນຍ (25.536 ຄົນ). ຂະນະທີ່ ລັດໄວໂອມິງເປັນລັດທີ່ມີລາຍງານພົບຜູ້ຕິດເຊື້ອໂຄວິດ-19 ໜ້ອຍທີ່ສຸດມີພຽງ 282 ຄົນ.
