ປີໃໝ່ສົງການງຽບເຫງົາ

ໂດຍ: ລູກເມືອງພວນ

ສະບາຍດີທ່ານຜູ້ອ່ານທີ່ຮັກແພງທັງຫລາຍ, ຕາມປະຕິທິນບອກວ່າ ກຸດສົງການ (ປີໃໝ່) ລາວປີນີ້ຈະເລີ່ມແຕ່ ວັນທີ 13-14-15-16 ຊຶ່ງປີນີ້ມີມື້ເນົາ 2 ວັນຄື ວັນທີ 14 ແລະ 15. ແຕ່ກຸດສົງການປີນີ້ຕົກຢູ່ໃນໄລຍະພະຍາດໂຄວິດລະບາດຢ່າງຮ້າຍແຮງໄປໃນທົ່ວໂລກ, ລາວກໍເປັນໜຶ່ງໃນປະເທດທີ່ໄດ້ຮັບຜົນກະທົບ ແລະ ມີຜູ້ຕິດເຊື້ອໄວຣັສດັ່ງກ່າວ, ມາເຖິງເວລານີ້ ເປັນ 19 ກໍລະນີແລ້ວ.

ຕາມທຳມະດາແຕ່ລະປີ ກ່ອນ ຫຼື ໃກ້ຈະຮອດສົງການ ໜຶ່ງ ອາທິດ ກໍມີບັນຍາກາດຫົດນໍ້າກັນເກີດຂຶ້ນກ່ອນແລ້ວ ແລະ ມື້ວັນປີໃໝ່ແບບນີ້ ກໍຍິ່ງມີບັນຍາກາດເບີກບານມ່ວນຊື່ນ, ບໍ່ຈັກສຽງເສບ, ສຽງຮ້ອງລຳທຳເພງ, ຜູ້ຄົນ ລົດລາງພາຫະນະເຕັມທ້ອງຖະໜົນ, ຜູ້ຄົນຫຼັ່ງໄຫຼເຂົາໄປໃນວັດວາອາຮາມເພື່ອສົງນໍ້າພະ ແລະ ຂໍພອນຕາມວັດຕ່າງໆ ຈົນເຖິງ 7 ຫຼື 9 ວັດຕາມປະເພນີບອກເລົ່າ. ບາງເຮືອນກໍຈັດພິທີບາສີສູ່ຂວັນ, ຫົດນໍ້າດຳຫົວຜູ້ໃຫ່ຍໄມ້ສູງ, ຜູ້ເຖົ້າຜູ້ແກ່ຕາມຮີດຄອງປະເພນີ, ມີບາງເຮືອນກໍຈັດພິທີຊຸມແຊວສາມັກຄີກັບໝູ່ເພື່ອນ ຍາດຕິພີ່ນ້ອງ ປອງດອງຄວາມສາມັກຄີ ຫົດນໍ້າໃຫ້ພອນກັນຢ່າງມ່ວນຊື່ນ.

ແຕ່ເປັນໜ້າເສົ້າໃຈ, ສົງການປີນີ້ ມີໄພພິບັດພະຍາດລະບາດໂຄວິດ-19 ລັດຖະບານຈຶ່ງໄດ້ອອກມາດຕະການທີ່ເຂັ້ມງວດ ເພື່ອປ້ອງກັນ ແລະ ຕ້ານພະຍາດໂຄວິດ-19, ໜຶ່ງໃນບັນດາມາດຕະການດັ່ງກ່າວ ແມ່ນຮຽກຮ້ອງໃຫ້ປະຊາຊົນຈົ່ງໄດ້ຢູ່ບ້ານ, ຫ້າມຊຸມນຸມກັນຫຼາຍກວ່າ 10 ຄົນຂຶ້ນເມືອ, ໂຈະການຈັດງານ ແລະ ກິດຈະກຳຕ່າງໆ ທີ່ເປັນທາງການ ຫຼື ທາງປະເພນີກໍຕາມ, ປະຕິບັດໄລຍະຫ່າງທາງສັງຄົມ ເພື່ອບໍ່ໃຫ້ມີການແຜ່ເຊື້ອອອກເປັນວົງກ້ວາງກ່ວານີ້. ນີ້ບໍ່ສະເພາະແຕ່ມາດຕະການທີ່ລັດຖະບານລາວນຳໃຊ້ ແຕ່ຫາກເປັນກົດທົ່ວໄປໃນໂລກຈັດຕັ້ງປະຕິບັດກັນຢ່າງທົ່ວເຖິງ. ວິທີການກັກຕົວຢູ່ໃນບ້ານເປັນເສັ້ນທາງໜຶ່ງດຽວທີ່ຈະຫຼີກລ່ຽງການຕິດເຊື້ອໄດ້ດີທີ່ສຸດ.

ສົງການປີນີ້ງຽບເຫງົາ ເສົ້າໝອງ ຖະໜົນຫົນທາງອ້າງວ້າງເປົ່າປ່ຽວດຽວດາຍ, ບໍ່ມີເງົາຄົນ ບໍ່ມີລົດລາງພາຫະນະແລ່ນສວານສົນໄປມາ, ບໍ່ມີສຽງເສບສຽງງັນ, ບໍ່ເຫັນຜູ້ຄົນໄປສົງນໍ້າພະຂໍພອນຕາມວັດຕ່າງໆຄືເມື່ອກ່ອນ. ມີຫຼາຍວັດອັດປະຕູ. ຊຶ່ງພາບດັ່ງກ່າວ ໄດ້ກາຍເປັນພາບທີ່ເສົ້າໝອງ ຂອງຄົນລາວຊາວພູດ ທີ່ບໍ່ເຄີຍມີມາ.

ເຖິງຢ່າງໃດກໍດີ, ພວກເຮົາຍັງສາມາດຈັດພິທີສະຫຼອງປີໃໝ່ຢູ່ໃນເຮືອນໃຜເຮືອນມັນໄດ້ ໂດຍການສົງພະຢູ່ໃນເຮືອນ, ປະດັບປະດາເອ້ຢ້ອງເຮືອນຊານ, ມັດຂໍ່ຕໍ່ແຂນ ຫົດນໍ້າດຳຫົວໃຫ້ພໍ່ແມ່, ແຕ່ງອາຫານແຊບໆຊຸມກັນໃນຄອບຄົວ…ນອກຈາກນີ້, ພວກເຮົາຍັງສາມາດສົ່ງຄຳອວຍພອນໃຫ້ພໍ່ແມ່ ຍາດຕິພີ່ນ້ອງທີ່ຢູ່ໄກກັນ ໄປມາຫາກັນບໍ່ໄດ້ ດ້ວຍຂໍ້ຄວາມ, ດ້ວຍຮູບພາບ, ວິດີໂອ…ທາງສື່ອອນລາຍ.

ເຖິງກຸດສົງການປີນີ້ ຈະບໍ່ມີບັນຍາກາດເທົ່າທີ່ຄວນກໍຕາມ ແຕ່ກໍມີຄວາມພາກພູມໃຈທີ່ເຫັນພີ່ນ້ອງຊາວລາວ ບໍ່ວ່າແຕ່ຢູ່ໃນຕົວເມືອງຈົນເຖິງຊົນນະບົດບ້ານນອກຄອກນາ ລ້ວນແຕ່ໃຫ້ການສະໜັບສະໜູນ ແລະ ຈັດຕັ້ງປະຕິບັດຄຳສັ່ງເລກທີ 06 ຂອງລັດຖະບານວ່າດ້ວຍການຕ້ານ ແລະ ສະກັດກັ້ນພະຍາດໂຄວິດ-19 ດ້ວຍຄວາມເປັນເຈົ້າການ ແລະ ການຮ່ວມໄມ້ຮ່ວມມືກັບລັດຖະບານເປັນຢ່າງດີ. ເພື່ອຕີເອົາຊະນະສັດຕູໂຄວິດ ແລະ ໃຫ້ຜ່ານພົ້ນວິກິດການຄັ້ງນີ້ໄປໂດຍໄວ./.