ລາວເພີ່ມທະວີມາດຕະການຄວບຄຸມ ໂຄວິດ-19
ໃນວັນທີ 13 ເມສາ 2020 ທີ່ນະຄອນຫລວງວຽງຈັນ ໄດ້ຈັດກອງປະຊຸມ ລາຍງານ ແລະ ປຶກສາຫາລື ກ່ຽວກັບ ສະພາບການລະບາດ, ລວມທັງຜົນສຳເລັດການປະຕິບັດມາດຕະການໃນການປ້ອງກັນ ແລະ ຄວບຄຸມ ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ COVID-19 ໂດຍການເປັນປະທານຂອງທ່ານ ສົມດີ ດວງດີ ຮອງນາຍຍົກລັດຖະມົນຕີ ແລະ ລັດຖະມົນຕີກະຊວງການເງິນ ພ້ອມທັງເປັນຫົວໜ້າຄະນະສະ ເພາະກິດເພື່ອປ້ອງກັນພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ COVID-19.
ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດ ໄດ້ລາຍງານວ່າ: ມາຮອດວັນທີ 13 ເມສາ 2020 ມີການກວດວິເຄາະກໍລະນີສົງໄສທັງໝົດ 1.186 ຕົວຢ່າງ, ໃນນັ້ນ 19 ກໍລະນີຖືກຢັ້ງຢືນທາງຫ້ອງວິເຄາະວ່າຕິດເຊື້ອ COVID-19 ແລະ ຍັງສືບຕໍ່ຕິດຕາມກໍລະນີສຳຜັດໃກ້ຊິດກັບຄົນເຈັບທັງໝົດ 79 ຄົນ ເຊັ່ນວ່າ: ນະຄອນຫລວງວຽງຈັນ 49 ຄົນ, ແຂວງໄຊສົມບູນ 25 ຄົນ, ນະຄອນຫລວງພະບາງ 2 ຄົນ, ແຂວງ ຄໍາມ່ວນ 2 ຄົນ ແລະ ແຂວງວຽງຈັນ 1 ຄົນ. ເລີ່ມແຕ່ວັນທີ 20 ມີນາ 2020 ມີແຮງງານລາວຈຳນວນຫລວງຫລາຍ ໄດ້ເດີນທາງກັບຈາກປະເທດໄທ ເຂົ້າຕາມຈຸດຊາຍແດນຕ່າງໆ ມີທັງໝົດ 113.404 ຄົນ, ຖືກຈຳກັດໂຕຢູ່ສູນ 68.534 ຄົນ ແລະ 44.870 ຄົນຈຳກັດໂຕຢູ່ເຮືອນໂດຍຄອບຄົວຢັ້ງຢືນ, ຮອດປັດຈຸບັນ ຄົບກຳນົດ 14 ວັນແລ້ວມີ 22.716 ຄົນ ແລະ ຍັງສືບຕໍ່ຈໍາກັດໂຕຢູ່ສູນ ແລະ ເຮືອນມີທັງໝົດ 90.688 ຄົນ.
ສ່ວນຄົນເຈັບທີ່ໄດ້ຮັບການປີ່ນປົວນັ້ນແມ່ນ ຢູ່ໂຮງໝໍມິດຕະພາບ 16 ຄົນ(1 ຄົນຊ່ຽວຊານຕ່າງ ປະເທດຈາກບໍລິສັດ ພູເບ້ຍ ມາຍນິງ) ໃນນັ້ນ 15 ຄົນມີອາການເບົາບາງ, 10 ຄົນແມ່ນປິ່ນປົວຄົບກຳນົດແລ້ວ ແຕ່ຜົນກວດຍັງພົບເຊື້ອຢູ່ ດັ່ງນັ້ນຈຶ່ງສືບຕໍ່ນອນຕິດຕາມອາການ ແລະ ປິ່ນປົວໃຫ້ຢາຈົນຄົບ. ສ່ວນຄົນເຈັບອີກ 3 ຄົນທີ່ນອນປິ່ນປົວຢູ່ໂຮງໝໍແຂວງຫລວງພະບາງ ແມ່ນອາການເບົາບາງ ແຕ່ຜົນກວດຍັງພົບເຊື້ອ ແລະ ສືບຕໍ່ປິ່ນປົວໃຫ້ຢາຈົນຄົບ.
ທ່ານ ພູທອນ ເມືອງປາກ ຍັງໄດ້ກ່າວຕື່ມວ່າ: ການປະຕິບັດຄຳສັ່ງເລກທີ 06/ນຍ ແມ່ນມີຫລາຍກະຊວງ, ອົງການຂັ້ນສູນກາງ ແລະ ອຳນາດການປົກຄອງທ້ອງຖຶ່ນ ແມ່ນໄດ້ເອົາໃຈໃສ່ຜັນຂະຫຍາຍ, ມີການເຜີຍແຜ່ ແລະ ຊີ້ນຳການຈັດຕັ້ງປະຕິບັດ ໄດ້ດີພໍສົມຄວນ ເປັນຕົ້ນແມ່ນການຜັດປ່ຽນກັນປະຈຳການ, ການຢູ່ເຮືອນ ຫລື ທີ່ຢູ່ອາໄສຂອງຕົນເອງ, ບໍ່ເດີນທາງໄປທ້ອງຖິ່ນອື່ນ, ບໍ່ຈັດກິດຈະກຳ ຫລື ໂຮມຊຸມນຸມທີ່ມີຜູ້ເຂົ້າຮ່ວມເກີນ 10 ຄົນ ແລະ ອື່ນໆ.
