ລັດຖະບານຫ້າມບໍ່ໃຫ້ຈໍາໜ່າຍເຄື່ອງດື່ມມີທາດເຫລົ້າແຕ່ວັນທີ 13-20 ເມສານີ້

ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການໃນວັນທີ 13 ເມສາ 2020 ເພື່ອຊີ້ນໍາໃຫ້ອໍານາດການປົກຄອງທ້ອງຖິ່ນໃນຂອບເຂດທົ່ວປະເທດ ເອົາໃຈໃສ່ກວດກາຕິດຕາມບັນດາຮ້ານຄ້າຕ່າງໆບໍ່ໃຫ້ຈໍາໜ່າຍ ເຄື່ອງດື່ມທີ່ມີທາດເຫລົ້າທຸກປະເພດໃຫ້ມວນຊົນຢ່າງເດັດຂາດ ນັບແຕ່ວັນທີ 13-19 ເມສານີ້, ຊຶ່ງແມ່ນໜຶ່ງໃນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ພາຍຫລັງເຫັນວ່າພະຍາດນີ້ ຍັງສືບຕໍ່ແຜ່ລະບາດເປັນວົງກວ້າງ ແລະ ຮ້າຍແຮງໃນປັດຈຸບັນ.

ສະນັ້ນ ດ້ວຍຄວາມເປັນຫ່ວງເປັນໃຍຕໍ່ສຸຂະພາບ ແລະ ຊີວິດຂອງປະຊາຊົນບັນດາເຜົ່າ, ລັດຖະບານຈຶ່ງໄດ້ຕົກລົງຫ້າມບໍ່ໃຫ້ຕົວແທນຈໍາໜ່າຍ, ຮ້ານຊຸບເປີມາເກັດ, ຮ້ານຄ້າຂາຍຍົກ-ຂາຍຍ່ອຍ, ຕະຫລາດ, ບຸກຄົນ ລວມທັງການຄ້າຂາຍຜ່ານລະບົບອອນລາຍຕ່າງໆໃນຂອບເຂດທົ່ວປະເທດຈຳໜ່າຍເຫລົ້າ, ເບຍ ແລະ ເຄື່ອງດື່ມທີ່ມີທາດເຫລົ້າທຸກປະເພດໃນໄລຍະເວລາທີ່ໄດ້ກໍານົດດັ່ງກ່າວ ແລະ ຖ້າພົບຜູ້ລະເມີດແມ່ນໃຫ້ດຳເນີນມາດຕະການຕາມລະບຽບຢ່າງເຂັ້ມງວດ.