ເຈົ້າແຂວງ ໄຊຍະບູລີ ລົງຊຸກຍູ້ວຽກງານຕ້ານ ແລະ ສະກັດກັ້ນ ພະຍາດ COVID-19 ຢູ່ 4 ເມືອງເໜືອ
ໃນລະຫວ່າວັນທີ 9-12 ເມສາ 2020 ນີ້, ທ່ານ ພົງສະຫວັນ ສິດທະວົງ, ເຈົ້າແຂວງ ໄຊຍະບູລີ ພ້ອມດ້ວຍຄະນະສະເພາະກິດຂັ້ນແຂວງ ໄດ້ລົງຊຸກຍູ້ວຽກງານຕ້ານ ແລະ ສະກັດກັ້ນ ພະຍາດ COVID-19 ຢູ່ 4 ເມືອງເໜືອຄື: ເມືອງ ຄອບ, ເມືອງ ຊຽງຮ່ອນ, ເມືອງ ເງິນ ແລະ ເມືອງ ຫົງສາ, ໂດຍລວມແລ້ວເຫັນວ່າການເຝົ້າລະວັງຕ້ານ ແລະ ສະະກັດກັ້ນພະຍາດດັ່ງກ່າວຢູ່ທັງ 4 ເມຶອງແມ່ນເຮັດໄດ້ດີ, ໂດຍໄດ້ເອົາໃຈໃສ່ແຕ່ງຕັ້ງອະນຸກຳມະການສະເພາະກິດໃນການຕິດຕາມກວດກາ ກັ່ນກອງຄົນເຂົ້າອອກເມຶອງໂດຍສະເພາະແມ່ນແຮງງານລາວທີ່ມາຈາກປະເທດມີການລະບາດ ໂດຍໄດ້ມີການກຳນົດສະຖານທີ່ກັກໂຕເອງເປັນເວລາ 14 ວັນ ເພື່ອຕິດຕາມອາການ, ຊຶ່ງມີຈຳນວນທັງໝົດ ເກືອບ 2.000 ຄົນ, ຍິງ 700 ກວ່າຄົນ ແລະ ມາຮອດປັດຈຸບັນມີ 1.000 ກວ່າຄົນສາມາດອອກຈາກສູນແລ້ວ ແລະ ໄດ້ອອກໃບຢັ້ງຢືນທາງການແພດໃຫ້ກັບບຸກຄົນທີ່ຜ່ານການກັກຕົວແຍກປ່ຽວດັ່ງກ່າວທີ່ບໍ່ມີອາການສົງໃສຫຍັງເຂົ້າເຄື່ອຂ່າຍຂອງພະຍາດ COVID-19, ພ້ອມນີ້ຢູ່ແຕ່ລະເມືອງຍັງໄດ້ເອົາໃຈໃສ່ໂຄສະນາ, ເຜີຍແຜ່ຜົນຮ້າຍຂອງພະຍາດດັ່ງກ່າວຜ່ານວິທະຍຸ, ໂທລະໂຄ່ງຂອງແຕ່ລະບ້ານ, ເພື່ອໃຫ້ຄວາມຮູ້ ແລະວິທີການຮັກສາສຸຂະພາບຂອງຕົນເອງເພື່ອຫລີກເວັ້ນການຕິດເຊື້ອ ພະຍາດນີ້.
ໃນໂອກາດດັ່ງກ່າວ ທ່ານ ເຈົ້າແຂວງ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ການນໍາ ແລະ ໜ່ວຍສະເພາະກິດຂອງແຕ່ລະເມືອງທີ່ເຂັ້ມງວດ ແລະ ເອົາໃຈໃສ່ຈັດຕັ້ງປະຕິບັດຕາມຄໍາສັ່ງ 06 ຂອງທ່ານນາຍົກລັດຖະມົນຕີຢ່າງມີປະສິດທິຜົນ, ພ້ອມໄດ້ຮຽກຮ້ອງໃຫ້ການນໍາ ແລະ ໜ່ວຍສະເພາະກິດຂອງແຕ່ລະເມືອງຈົ່ງສືບຕໍ່ເຝົ້າລະວັງ, ຄຸ້ມຄອງແຮງງານທີ່ກັບຈາກຕ່າງປະເທດໃຫ້ກັກຕົວແຍກປ່ຽວຕາມທີ່ຂັ້ນເທິງໄດ້ກໍານົດໄວ້, ເພື່ອເພີ່ມທະວີປ້ອງກັນ ແລະ ສະກັດກັ້ນພະຍາດ COVID-19 ໃຫ້ໄດ້ຮັບຜົນດີ. ພ້ອມໄດ້ລົງຊຸກຍູ້ປະຊາຊົນໃຫ້ສືບຕໍ່ທໍາການຜະລິດ ດ້ວຍການປູກພືດສະບຽງອາຫານ, ລ້ຽງສັດແລະ ເອົາໃຈໃສ່ເກັບກູ້ຜົນຜະລິດລະດູແລ້ງໃຫ້ໄດ້ຮັບຜົນດີ, ກະກຽມຄວາມພ້ອມຕ່າງໆແກ່ການຜະລິດລະດູນາປີທີ່ຈະມາເຖິງໃຫ້ຮັບປະກັນ.
