ເມືອງໄຊພູທອງ ເຂັ້ມງວດກວດຄົນເຂົ້າ-ອອກເມືອງຂອງຕົນ

ຫົວໜ້າກອງບັນຊາການ ປກສ ເມືອງໄຊພູທອງ ແຂວງ ສະຫວັນນເຂດ, ໃຫ້ຮູ້ວ່າ: ປັດຈຸບັນ, ເຈົ້າໜ້າທີ່ທຸກພາກສ່ວນ ໃນເມືອງຂອງຕົນໄດ້ເພີ່ມທະວີຄວາມເຂັ້ມງວດກວດຄົນເຂົ້າ-ອອກເມືອງ, ໂດຍໄດ້ຕັ້ງຈຸດກວດການສັນຈອນໄປ-ມາ ຂອງປະຊາ ຊົນ ນັບແຕ່ວັນທີ 1 ເມສານີ້ເປັນຕົ້ນມາເພື່ອສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ມີປະສິດທິຜົນ ໂດຍໄດ້ແບ່ງອອກເປັນ 4 ຈຸດໃຫຍ່ ຄື: ເຂດກຸ່ມບ້ານທີ 6 ບ້ານນາຄໍາ, ເຂດກຸ່ມບ້ານທີ 5 ບ້ານໂພສີແກ້ວ, ເຂດກຸ່ມບ້ານທີ 2 ບ້ານທ່າໂພ ແລະ ເຂດກຸ່ມບ້ານທີ 8 ບ້ານເຮືອນຫີນເພື່ອເນັ້ນໃຫ້ປະຊາຊົນເອົາໃຈໃສ່ກັກກັນຕົນເອງຢູ່ໃນບ້ານເຮືອນໃຫ້ເຂັ້ມງວດ.ປີດການໄປມາລະຫວ່າງ ແຂວງຫາເມືອງ ແລະ ເມືອງຫາບ້ານ ຂອງແຕ່ລະເຂດກຸ່ມບ້ານເປັນການຊົ່ວຄາວ,ຈົນກວ່າສະພາບການແຜ່ລະ ບາດຂອງພະຍາດດັ່ງກ່າວສາມາດຄວບຄຸມໄດ້, ເພື່ອແນໃສ່ສະກັດກັ້ນການແຜ່ລະບາດຂອງພະຍາດ ໂຄວິດ-19 ບໍ່ໃຫ້ເປັນວົງກ້ວາງ. ດັ່ງນັ້ນຈິ່ງຂໍ ຮຽກຮ້ອງໃຫ້ປະຊາຊົນທຸກຊັ້ນຄົນໃນສັງຄົມຈົ່ງມີສະຕິເປັນເຈົ້າການຈັດຕັ້ງປະຕິບັດລະບຽບກົດໝາຍ, ຮັບປະກັນໃຫ້ບ້ານເມືອງມີຄວາມສະຫງົບ.