ໂຄງການກໍ່ສ້າງເຂື່ອນໄຟຟ້າເຊລະນອງ 1 ມອບເງິນຊົດເຊີຍໃຫ້ປະຊາຊົນ 2 ບ້ານໃນເມືອງນອງ ທີ່ໄດ້ຮັບຜົນກະທົບ

ພິທີມອບ-ຮັບ ເງິນຄ່າຊົດເຊີຍ ໃຫ້ປະຊາຊົນບ້ານລອຍນໍ້າ ແລະບ້ານລະເບົານໍ້າ ເມືອງນອງ, ແຂວງສະຫວັນນະເຂດ ທີ່ໄດ້ຮັບຜົນກະທົບ ຈາກໂຄງການກໍ່ສ້າງ ເຂື່ອນໄຟຟ້າເຊລະນອງ1 ໃນງວດທໍາອິດ,ໄດ້ມີນໃນວັນທີ 7 ເມສານີ້, ຢູ່ທີ່ໂຮງຮຽນບ້ານຈັດສັນດັ່ງກ່າວ. ໂດຍການເຂົ້າຮ່ວມ ຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ,ປະທານຄະນະກໍາມະການຍົກຍ້າຍຈັດສັນ ໂຄງການກໍ່ສ້າງເຂື່ອນໄຟຟ້າ ເຊລະນອງ1.

ກ່ອນໜ້ານີ້ ປີກວ່າ ປະຊາຊົນ 2 ບ້ານນີ້ແມ່ນໄດ້ຕັ້ງບ້ານເຮືອນ ຢູ່ລຽບແຄມເຊລະນອງ, ເຊິ່ງເປັນໜ້າເຂື່ອນໄຟຟ້າດັ່ງກ່າວ, ຊຶ່ງຈຳເປັນຕ້ອງໄດ້ຍົກຍ້າຍອອກໄປ, ໂດຍໂຄງການໄຟຟ້າເຊລະນອງ1 ຕ້ອງໄດ້ຈັດສັນເຂດບ້ານໃຫມ່ປຸກສ້າງເຮືອນຢູ່ໃຫ້ເຂົາເຈົ້າພ້ອມສົ່ງເສີມ ຄ່າຊົດເຊີຍ ເນື້ອທີ່ນາ, ຜົນລະປູກ ແລະຊັບສິນອື່ນໆໃຫ້ແກ່ຜູ້ໄດ້ຮັບຜົນກະທົບລວມມີມູນຄ່າຫລາຍກ່ວາ 786 ລ້ານກີບ, ໃນນັ້ນ ບ້ານລະເບົານໍ້າໄດ້ຮັບ 608 ລ້ານກ່ວາກີບ, ບ້ານລອຍນໍ້າ 177 ລ້ານກ່ວາກີບ.ສຳລັບບ້ານລອຍນໍ້າ ມີ 32 ຄອບຄົວ, ໄດ້ຮັບການຈັດສັນທີ່ດິນ ເພື່ອທໍາການຜະລິດ ທັງໝົດ 58 ເຮັກຕາ, ສ່ວນບ້ານລະເບົານໍ້າມີ 56 ຄອບຄົວ, ຈະໄດ້ຮັບເງິນຊົດເຊີຍທັງຫມົດ 1,5 ຕື້ ລວມທັງເງິນຈັດສັນທີ່ດິນ ທີ່ຍັງບໍ່ທັນໄດ້ບຸກເບີກ, ໂອກາດດັ່ງກ່າວ ທ່ານຮອງເຈົ້າແຂວງ ກໍ່ໄດ້ຊີ້ນຳໃຫ້ຄະນະກຳມະການ ແຕ່ຂັ້ນ ຈົ່ງພ້ອມກັນເອົາໃຈໃສ່ ຕິດຕາມການນຳໃຊ້ງົບປະມານຫ່ວງນີ້ ໃຫ້ເກີດຜົນ ແລະຖືກຕ້ອງຕາມຈຸດປະສົງ-ເປົ້າໝາຍເພື່ອຊ່ວຍປັບປຸງຊີວິດການເປັນຢູ່ຂອງປະຊາຊົນ ທີ່ຖືກຍົກຍ້າຍ ໃຫ້ດີ ຂຶ້ນໄປເລື້ອຍໆ.