EU ສົ່ງທີມແພດຊ່ວຍ ອິຕາລີ ສູ້ໂຄວິດ-19 ຂ້າຊີວິດສູງສຸດໃນໂລກ
ສະຫະພາບເອີຣົບ (EU) ເປີດເຜີຍວ່າ: ທີມແພດພະຍາບານຈາກໂຣມານີ ແລະ ນອກແວ ໄດ້ເດີນທາງໄປເມືອງມິລານ ແລະ ເບີກາໂມ ຂອງອິຕາລີ ເພື່ອຊ່ວຍບຸກຄະລາກອນທາງການແພດຂອງອິຕາລີຕໍ່ສູ້ກັບການແຜ່ລະບາດຂອງໄວຣັສໂຄໂຣນາສາຍພັນໃໝ່ (ໂຄວິດ-19).
ຖະແຫລງການທີ່ເປີດເຜີຍໃນວັນທີ 7 ເມສານີ້ລະບຸວ່າ: ທີມແພດພິເສດນີ້ໄດ້ຮັບການສະໜັບສະໜູນຈາກກົນໄກຂອງ EU ທີ່ເອີ້ນວ່າ: European Union Civil Protection Mechanism (UCPM) ເຊິ່ງມີເປົ້າໝາຍໃນການປົກປ້ອງຄຸ້ມຄອງຊີວິດຂອງພົນລະເມືອງ EU ແລະ ປະເທດອື່ນໆ ໃນຍາມເກີດວິກິດ. ນອກຈາກນີ້ ໂອຕຣິດ ຍັງໄດ້ມອບນ້ຳຢາຂ້າເຊື້ອ 3.000 ກວ່າລິດ ໃຫ້ອິຕາລີຜ່ານທາງກົນໄກນີ້.
ທ່ານ ເອີຊູລາ ຟອນ ເດິ ເລເຢນ ປະທານຄະນະກຳມາທິການເອີຣົບ ກ່າວວ່າ: ທີມແພດພະຍາບານເຫລົ່ານີ້ໄດ້ເສຍສະຫລະອອກຈາກເຮືອນຂອງຕົນມາຊ່ວຍເພື່ອນຮ່ວມງານໃນປະເທດສະມາຊິກ ເຊິ່ງຖືເປັນການສະແດງຄວາມສາມັກຄີຂອງ EU ຢ່າງແທ້ຈິງ. ຂະນະທີ່ ທາງຄະນະກຳມາທິການກຳລັງດຳເນີນການທຸກວິທີທາງ ເພື່ອຊ່ວຍອິຕາລີ ແລະ ປະເທດສະມາຊິກອື່ນໆ ໃນໄລຍະເວລາທີ່ຍາກລຳບາກນີ້.
ເຖິງວ່າ ແອັດສະປາຍຈະມີຜູ້ຕິດເຊື້ອໂຄວິດ-19 ຫລາຍອັນດັບໜຶ່ງຢູ່ເອີຣົບ ແຊງໜ້າອິຕາລີເມື່ອບໍ່ດົນມານີ້, ແຕ່ຂໍ້ມູນໃນວັນທີ 8 ເມສາ 2020 ພົບວ່າ: ອິຕາລີມີຈຳນວນຜູ້ເສຍຊີວິດສູງສຸດໃນໂລກ 17.127 ຄົນ.
