ຈີນເປີດເມືອງອູ່ຮັ່ນແລ້ວ

     ອູ່ຮັ່ນຫລຸດລະດັບຄວບຄຸມການເດີນທາງອອກຈາກເມືອງ ແລະ ເລີ່ມເປີດການຈະລາຈອນພາຍນອກອີກຢ່າງເປັນທາງການ ໂດຍຄົນທີ່ຈະອອກຈາກອູ່ຮັ່ນຕ້ອງໃຊ້ລະຫັດສຸຂະພາບ “ລະຫັດສີຂຽວ” ເພື່ອຢືນຢັນ, ຄາດວ່າຈະມີຜູ້ໂດຍສານຫລາຍກວ່າ 55.000 ຄົນ ອອກຈາກເມືອງໂດຍລົດໄຟ.

     ນັບແຕ່ເວລາ 0:00 ໂມງ ວັນທີ 8 ເມສາ 2020 ເມືອງອູ່ຮັ່ນ ສປຈີນ ໄດ້ຫລຸດລະດັບຄວບຄຸມການເດີນທາງອອກຈາກເມືອງ ແລະ ເລີ່ມເປີດການຈະລາຈອນພາຍນອກອີກເທື່ອໜຶ່ງຢ່າງເປັນທາງການ, ຄົນທີ່ຈະອອກຈາກອູ່ຮັ່ນຕ້ອງໃຊ້ລະຫັດສຸຂະພາບ “ສະຫັດສີຂຽວ” ເພື່ອຢືນຢັນ, ຜູ້ໂດຍສານທີ່ມີ “ລະຫັດສີຂຽວ” ສາມາດເດີນທາງໂດຍລົດໄຟໄດ້ ຫລັງຈາກວັດແທກອຸນຫະພູມຮ່າງກາຍ ແລະ ກວດສອບຕົວຕົນແລ້ວ.

     ຫົວໜ້າພະແນກທີ່ກ່ຽວຂ້ອງຂອງບໍລິສັດລົດໄຟຈີນແຫ່ງອູ່ຮັ່ນ ກ່າວວ່າ: ໃນວັນທີ 8 ເມສາ ຈະມີລົດໄຟໂດຍສານ 276 ຂະບວນ ອອກຈາກສະຖານີໃນອູ່ຮັ່ນໄປເມືອງຊຽງໄຮ້, ເຊິນເຈິ້ນ, ເສິງຕູ, ຟູໂຈ, ໜານໜິງ ແລະ ສະຖານີປາຍທາງອື່ນໆ ເຊິ່ງມີຂະບວນຕົ້ນທາງຈາກອູ່ຮັ່ນ 54 ຂະບວນ, ເບິ່ງຈາກຍອດຂາຍປີ້ລ່ວງໜ້າໃນວັນທີ 7 ເມສາ ຄາດວ່າຈະມີຜູ້ໂດຍສານຫລາຍກວ່າ 55.000 ຄົນ ອອກຈາກອູ່ຮັ່ນໂດຍລົດໄຟໃນມື້ນີ້.