ຜູ້ຕິດເຊື້ອໂຄວິດ-19 ທັງ 10 ຄົນມີອາການດີຂຶ້ນ
ຄະນະສະເພາະກິດຄວບຄຸມການລະບາດຂອງພະຍາດໂຄວິດ-19 ໄດ້ແຈ້ງໃຫ້ຮູ້ວ່າ: ຜູ້ຕິດເຊື້ອ 10 ຄົນທຳອິດນັ້ນ, ທີ່ປິ່ນປົວຢູ່ໂຮງໝໍມິດຕະພາບ 150 ຕຽງ 7 ຄົນ ແລະໂຮງໝໍແຂວງຫລວງພະບາງ 3 ຄົນ, ມາຮອດປັດຈຸບັນໄດ້ມີອາການດີຂຶ້ນເປັນລໍາດັບ, ຍ້ອນໄດ້ຮັບການເອົາໃຈໃສ່ເບິ່ງແຍງ ແລະ ປິ່ນ ປົວຈາກແພດໝໍຢ່າງໃກ້ຊິດ, ໂດຍທັງໝົດບໍ່ມີອາການໄຂ້, ຊຶ່ງຍັງພຽງມີອາການໄອເລັກໜ້ອຍ, ທ່ານຫມໍເວົ້າວ່າ: ຜ່ານການຕິດຕາມເຫັນວ່າລະດັບອົກຊີແຊນໃນເລືອດ ແລະ ຄວາມດັນແມ່ນຢູ່ໃນເກນປົກກະຕິດີ, ບໍ່ມີ ອາການສົນຕ່າງໆເກີດຂື້ນ.
ຜ່ານການກວດກາເບິ່ງປອດຂອງເຂົາເຈົ້າ ດ້ວຍລະບົບແສງກໍເຫັນວ່າ ດີຂຶ້ນເປັນ ລໍາດັບ ແລະ ທຸກຄົນບໍ່ໄດ້ໃຊ້ເຄື່ອງຊ່ວຍຫາຍໃຈດັ່ງແຕ່ກ່ອນ ແລະພິເສດແມ່ນສະພາບຈິດໃຈຂອງເຂົາເຈົ້າເຂັ້ມແຂງດີ, ແຕ່ເຖິງຢ່າງໃດຄະນະແພດ ຍັງຈະໄດ້ສືບຕໍ່ເອົາໃຈໃສ່ປິ່ນປົວເຂົາເຈົ້າຕາມຫລັກການສາກົນລະບຸໄວ້ ເພື່ອໃຫ້ເຂົາເຈົ້າຫາຍເປັນປົກກະຕິໂດຍໄວ.
ໃນຂະນະດຽວກັນກໍຂໍສະແດງຄວາມຊົມເຊີຍມາຍັງປະຊາຊົນລາວບັນດາເຜົ່າ ທີ່ໄດ້ພ້ອມກັນເອົາໃຈໃສ່ປະຕິບັດແຈ້ງການເລກທີ 06 ຂອງນາຍົກລັດຖະມົນຕີ ເພື່ອປ້ອງກັນການແຜ່ລະບາດຂອງພະຍາດດັ່ງກ່າວໄດ້ຢ່າງຕັ້ງຫນ້າ,ໂດຍສະເພາະແມ່ນການກັກກັນຕົນເອງຢູ່ໃນເຮືອນໃຜລາວໄດ້ຢ່າງເຂັ້ມງວດທີ່ສຸດ.ຊຶ່ງສະແດງອອຫໃຫ້ເຫັນຄືໃນວັນທີ 4 – 5 ເມສາ, ທຸກໆຖະໜົນຫົນທາງໃນຕົວເມືອງນະຄອນຫລວງວຽງຈັນ ແລະ ເມືອງໃຫຍ່ຕ່າງໆເກືອບຈະບໍ່ມີຜູ້ທຽວທາງເລີຍ,ທຸກຢ່າງປະກົດຄືວ່າມັນມິດງຽບໄປທັງຫມົດ,ນັບທັງຮ້ານຄ້າຊຸບເປີມາເກັດຂະຫນາດໃຫຍ່, ໄປຈົນຮອດຮ້ານອາຫານ ແລະ ສະຖານທີ່ບໍລິການຕ່າງໆກໍມິດງຽບເຊັ່ນກັນ, ຍ້ອນໃຜໆກໍໄດ້ເອົາໃຈໃສ່ກັກກັນຕົນເອງບໍ່ອອກຈາກເຮືອນ ແລະ ຄາດວ່າສະພາບແບບນີ້ອາດຈະແກ່ຍາວໄປຈົນຮອດວັນທີ 19 ເມສາ ທີ່ລັດຖະບານກໍານົດໄວ້ເພື່ອແນໃສ່ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ພວມແຜ່ລາມໄປຢ່າງຮ້າຍແຮງໃນທົ່ວໂລກ ແລະ ລາວເຮົາໃນວັນທີ 5 ກໍມີຜຜູ້ຕິດເຊື້ອເພິ່ມອີກຫນຶ່ງກໍລະນີ, ລວມເປັນ 11 ກໍລະນີແລ້ວ.ແຕ່ກໍເຫັນວ່າຍັງຢູ່ໃນຈັງຫວະຄວບຄຸມໄດ້ ແລະ ຖ້າພວກເຮົາທຸກຄົນຫາກເອົາໃຈໃສ່ຮ່ວມກັນຕ້ານພະຍາດຮ້າຍນີ້ກໍຈະໄດ້ຮັບໄຊຊະນະໂດຍໄວ.
