100 ປີກ່ອນໜ້ານີ້ ມະນຸດມີປະສົບການໃສ່ໜ້າກາກອານາໄມ ແລະ ລ້າງມືແລ້ວ
ໂດຍ: ລູກເມືອງພວນ
ແຫຼ່ງຂ່າວຈາກ TTO ຂອງຫວຽດນາມ ວັນທີ 3 ເມສານີ້ ໃຫ້ຮູ້ວ່າ: ກ່ອນໜ້ານີ້ 100 ມະນຸດໄດ້ຮຽນຮູ້ກ່ຽວກັບວິທີການປ້ອງກັນ ແລະ ຕ້ານພະຍາດລະບາດດ້ວຍວິທີການງ່າຍໆ, ລາຄາກໍຖືກ ແລະ ຊໍ້າບໍ່ໜຳຍັງປະຕິບັດໄດ້ແບບສະບາຍໆອີກດ້ວຍ. ຈົນເຖິງປັດຈຸບັນວິທີການດັ່ງກ່າວກໍຍັງເປັນບົດຮຽນທີ່ລໍ້າຄ່າໃຫ້ແກ່ມະນຸດຊາດຈົນຮອດທຸກມື້ນີ້, ເມື່ອມີ ໂຄວິດ-19 ເກີດຂຶ້ນ.
ໃນໜ້າໜັງສືພິມສະບັບໜຶ່ງໃນປີ 1918 ໄດ້ຂຽນໄວ້ວ່າ: “ກ່ອນຈະກິນ, ເມື່ອກັບມາຈາກແຕ່ຫ້ອງການ ຫຼື ກັບມາຈາກແຕ່ທາງນອກ ຈົ່ງລ້າງມືໃຫ້ສະອາດ” .
ໜັງສືພິມສະບັບດັ່ງກ່າວຖືກເກັບຮັກສາໄວ້ກ່ອນໜ້ານີ້ 100 ປີ ແລະ ຖືກນຳມາເປີດເຜີຍຄືນໃໝ່ໃນວາລະສານ ທາມ (Time) ຫວ່າງບໍດົນມານີ້ ໂດຍນັກວິທະຍາສາດ Elisabeth Zetland ຂອງ MyHeritage (ໃນໜ້າເວບໄຊ ປະຫວັດສາດຂອງຄອບຄົວ). ນອກຈານັ້ນ, ຍັງມີຄຳສັ່ງສອນຂອງຜູ້ເຖົ້າຄົນໜຶ່ງອາຍຸ 105 ປີ ທີ່ລອດເຫຼືອຈາກການລະບາດຂອງພະຍາດໄຂ້ຫວັດໃຫ່ຍໃນປີ 1918. ຈາກວັນນັ້ນມາເຖິງວັນນີ້, ເມື່ອຫວນຄືນເບິ່ງບົດຮຽນຈາກການລະບາດຂອງພະຍາດໄຂ້ຫວັດໃຫ່ຍໃນ ແອັດສະປາຍ ປີ 1918 ນັ້ນແລ້ວ, ມະນຸດທັງຫຼາຍກໍຕື່ນຕົກໃຈຈາກບົດຮຽນປະສົບການໃນວັນນັ້ນເປັນຢ່າງຍິ່ງ.
ມະຫັນຕະໄພໄຂ້ຫວັດໃຫ່ຍລະບາດຂຶ້ນທີ່ປະເທດແອັດສະປາຍ ໃນປີ 1918 ນັ້ນ ແມ່ນຢູ່ໃນໄລຍະຂອງສົງຄາມໂລກຄັ້ງທີໜຶ່ງ. ທຸກສິ່ງທຸກຢ່າງແມ່ນສຸມໃສ່ທາງດ້ານການທະຫານເປັນຕົ້ນຕໍ ແມ່ນແຕ່ວິທະຍາສາດ ແລະ ການແພດກໍເຊັ່ນດຽວກັນ ແມ່ນເພື່ອກອງທັບແຕ່ຢ່າງດຽວ.
ເວລານັ້ນລະດັບຄວາມຮັບຮູ້ຂອງປະຊາຊົນກໍຍັງຕໍ່າ, ຄວາມຫ່າງທາງສັງຄົມກໍຍັງສູງ, ເສດຖະກິດບໍ່ທັນໄດ້ຮັບການພັດທະນາ, ພື້ນຖານໂຄງລ່າງດ້ານການແພດຍັງຫຼ້າສະໃໝ ຈຶ່ງບໍ່ມີປັນຍາທີ່ຈະເອົາຊະນະກັບໄຂ້ຫວັດໃຫ່ຍໃນເວລານັ້ນໄດ້. ໄຂ້ຫວັດໃຫ່ຍໃນສະໃໝນັ້ນໄດ້ເອົາຊີວິດຄົນທົ່ວໂລກໄປເຖິງ 50 ລ້ານຄົນ.
ບັນດາມາດຕະການທີ່ວາງອອກມາໃນ ເດືອນ ສິງຫາ ປີ 1918 ນັ້ນລ້ວນແຕ່ບໍ່ໄດ້ຮັບຜົນ, ຊຶ່ງໃນນັ້ນມາດຕະການດຳເນີນການຕົ້ນຕໍທຳອິດກໍຄື ໃຫ້ລາຍງານກໍລະນີສົງໄສຜູ້ຕິດເຊື້ອ, ຕິດຕາມ, ກວດກາບັນດາໂຮງຮຽນ ແລະ ນິຄົມ, ປິດປະຕູທຳຄວາມສະອາດຕາມຫ້ອງປະຊຸມ, ໂຮງລະຄອນ ແລະ ປິດການປະຊຸມທີ່ມີຈຳນວນຄົນຫຼວງຫຼາຍ.
ການອອກຄຳເຕືອນໃຫ້ລ້າງມືເປັນປະຈຳ, ຫຼີກລ່ຽງການເຕົ້າລວມຫຼາຍຄົນ, ໃສ່ໜ້າກາກອານາໄມ ແມ່ນໄດ້ເວົ້າຢູ່ໃນໜ້າໜັງສືພິມສະບັບ 100 ປີດັ່ງກ່າວ ແລະ ໄດ້ນຳໃຊ້ມາແຕ່ໃນສະໃໝນັ້ນແລ້ວ.
ໃບຂ່າວໂຄສະນາຂອງສະຫະລັດໃນສະໃໝນັ້ນກໍຢັ້ງຢືນວ່າ: “ໜ້າກາກອານາໄມອາດເປັນສິ່ງໜຶ່ງທີ່ປ້ອງກັນພະຍາດໄດ້ດີເຖິງ 99%” ແລະ “ ຖ້າໃຜບໍ່ໃສ່ໜ້າກາກອານາໄມເພື່ອປ້ອງກັນພະຍາດ ຄົນຜູ້ນັ້ນແມ່ນຄົນຂີ້ຄ້ານ ແລະ ເປັນບຸກຄົນມີຄວາມອັນຕະລາຍຕໍ່ສັງຄົມ”.
ຍ້ອນສະໃໝນັ້ນຍັງບໍ່ທັນມີ ວັກຊີນ, ສະນັ້ນ ລັດຖະບານຈຶ່ງອາໄສການກັກຕົວ ຫຼື ແຍກຕົວເປັນວິທີການຕົ້ນຕໍໃນການປ້ອງກັນພະຍາດ, ຮຽກຮ້ອງໃຫ້ປະຊາຊົນທຳຄວາມສະອາດຮ່າງກາຍຂອງຕົນ, ສະພາບແວດລ້ອມດຳລົງຊີວິດ ແລະ ເຫັນວ່າວິທີການນີ້ແມ່ນໄດ້ຮັບຜົນດີ.
ພະຍາດໂຄວິດ-19 ລະບາດຂຶ້ນໃນສະຕະວັດທີ 21, ຊຶ່ງເປັນສະຕະວັດທີ່ມວນມະນຸດຊາດມີເທັກໂນໂລຢີທີ່ລໍ້າໜ້າ, ວິທະຍາສາດການແພດ, ການຢາມີຄວາມທັນສະໃໝ, ວັກຊີນຖືກຜະລິດອອກມາຢ່າງຫຼວງຫຼາຍ, ແຕ່ໃນເມື່ອພະຍາດໂຄວິດ-19 ເກີດຂຶ້ນ ແລະ ແຜ່ລະບາດຢ່າງໄວວາຢູ່ໃນຂະນະນີ້, ວິທີການທີ່ຖືວ່າເປັນວິທີການທີ່ດີທີ່ສຸດ ແລະ ໄດ້ຜົນທີ່ສຸດຂອງທຸກໆຊາດໃນໂລກ ທີ່ຮຽກຮ້ອງໃຫ້ປະຊາຊົນປະຕິບັດກໍຄື: “ລ້າງມືໃຫ້ສະອາດ, ໃສ່ໜ້າກາກອານາໄມ ແລະ ຮັກສາໄລຍະຫ່າງທາງສັງຄົມ ເພື່ອຄວາມປອດໄພໃຫ້ທຸກຄົນ” ດັ່ງທີ່ເຄີຍປະຕິບັດມາກ່ອນໜ້ານີ້ 1 ສະຕະວັດແລ້ວ./.
