ດ່ວນ..! ພຣີເມຍລີກເລື່ອນເເຂ່ງບໍ່ມີກຳນົດຈາກເຄີຍເລື່ອນແຂ່ງເຖິງ 30 ເມສານີ້
ຕາມການລາຍງານຂອງສໍານັກຂ່າວຕ່າງປະເທດໃຫ້ຮູ້ວ່າ: ພຣີເມຍລີກອັງກິດ ອອກຖະແຫຼງການຫຼັງກອງປະຊຸມລະຫວ່າງຝ່າຍຈັດການແຂ່ງຂັນລວມເຖິງຜູ້ຖືຫຸ້ນ ແລະ ສະໂມສອນຕ່າງໆ, ໃນໄລຍະວິກິດເຊື້ອໄວຣັສໂຄວິດ-19 ລະບາດ ຈົນມີຜົນເຮັດໃຫ້ການແຂ່ງຂັນບານເຕະອາຊີບທຸກລະດັບຂອງອັງກິດ ຕ້ອງຢຸດລົງຊົ່ວຄາວໃນເວລານີ້.
ພຣີເມຍລີກຈະບໍ່ກັບມາແຂ່ງຈາກກໍານົດເກົ່າຄື 30 ເມສານີ້ ແລະ ຈະເລີ່ມຕົ້ນຈັັດການແຂ່ງຂັນຕາມໂປຣແກມອີກຄັ້ງເມື່ອມີຄວາມປອດໄພເໝາະສົມ ເຊິ່ງຈະມີການຫາລືເຖິງວັນດັ່ງກ່າວອີກເມື່ອສະພາບການດີຂຶ້ນໃນອະນາຄົດ, ເຖິງຈະໄດ້ກັບມາແຂ່ງຂັນອີີກກໍຕ້ອງຢູ່ໃນການເບິ່ງແຍງຈາກລັດຖະບານ ແລະ ເຈົ້າໜ້າທີ່ສາທາລະນະສຸກຢ່າງເຂັ້ມງວດ.
ພ້ອມດຽວກັນນັ້ນ ພຣີເມຍລີກ ຍັງກ່າວເຖິງຜົນກະທົບຫຼາກຫຼາຍດ້ານເຊັ່ນລາຍຮັບທີ່ສູນເສຍໄປໃນລະດູການ 2019/20 ນັບແຕ່ມີການຢຸດການແຂ່ງຂັນຊົ່ວຄາວເພາະເຊື້ອໄວຣັສດັ່ງກ່າວ, ເມື່ອລາຍຮັບພຣີເມຍລີກຫລຸດລົງກໍໄດ້ສົ່ງຜົນເຖິງສະໂມສອນ, ຄູຝຶກ, ນັກເຕະ ແລະ ທີມງານ ເພາະພຣີເມຍລີກກຳລັງຫາລືເພື່ອໃຫ້ຄູຝຶກ, ນັກເຕະ, ທີມງານຕ່າງໆໃນສະໂມສອນຫລຸດຄ່າແຮງງານລົງຈາກ 30% ໂດຍຄໍາແນະນໍາດັ່ງກ່າວຈະມີການພິຈາລະນາອີກເມື່ອສະພາບການປ່ຽນແປງໃນອະນາຄົດ.
