ມອບ-ຮັບເຄື່ອງຊ່ວຍເຫລືອຕ້ານໄວຣັສໂຄວິດ-19 ຈາກ ສສ ຫວຽດນາມ

ພິທີມອບ-ຮັບເຄື່ອງຊ່ວຍເຫລືອຮັບມືກັບການລະຂອງພະຍາດໂຄວິດ-19 ຈາກ ສສ ຫວຽດນາມໄດ້ມີຂຶ້ນໃນວັນທີ 4 ເມສານີ້, ຢູ່ນະຄອນຫລວງວຽງຈັນລະຫ່ວາງຜູ້ຕາງຫນ້າລັດຖະບານຫວຽດນາມ ແລະ ຄະນະສະເພາະກິດ ຂອງລັດຖະບານລາວ, ພາຍຫລັງເຄື່ອງຊ່ວຍດັ່ງກ່າວນີ້ໄດ້ນຳສົ່ງມາເຖິງສະຫນາມບິນສາກົນວັດໄຕ, ນະຄອນຫລວງວຽງຈັນດ້ວຍຍົນພິເສດ ສສ ຫວຽດນາມໃນທ່ຽງຄືນວັນທີ 3 ເມສານີ້, ຕົ້ນຕໍແມ່ນອຸປະກອນການແພດສຳລັບ ການປ້ອງກັນ ແລະ ຕ້ານໄວຣັສໂຄວິດ-19 ລວມີມູນຄ່າທັງ ຫມົດຫລາຍກ່ວາ 3 ແສນໂດລາສະຫະລັດ. ໃນນັ້ນຈາກລັດຖະບານ ມີ 100.000 ໂດລາສະຫະລັດ, ຈາກກະຊວງສາທາລະນະສຸກ 5 ຕື້ດົງ ຫລືປະມານ 200.000 ກວ່າໂດລາສະຫະລັດ ແລະ ຈາກກະຊວງວິທະຍາສາດ ແລະ ເຕັກໂນໂລຊີ 250 ລ້ານດົງ ຫລືປະມານ 10.000 ກ່ວາໂດລາສະຫະລັດ.

ການຊ່ວຍເຫລືອຄັ້ງນີ້ ເຖິງວ່າລັດຖະບານກໍຄືປະຊາຊົນຫວຽດນາມຍັງພົບຄວາມຫຍຸ້ງຍາກຫລາຍຢ່າງໃນການຕໍ່ສູ້ກັບພະຍາດໂຄວິດ-19 ຢູ່ໃນປັດຈຸບັນ,ແຕ່ດ້ວຍນໍ້າໃຈ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ. ຫວຽດນາມ ທີ່ເຄີຍຮ່ວມສຸກຮ່ວມທຸກນຳກັນມາແຕ່ດົນນານແລ້ວນັ້ນ, ຍິ່ງເຮັດໃຫ້ປະຊາຊົນສອງປະເທດໄດ້ເພີ່ມທະວີການຮ່ວມມືຊ່ວຍເຫລືອຊຶ່ງກັນ ແລະ ກັນໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.