ລາວຍັງບໍ່ພົບຜູ້ຕິດເຊື້ອເພີ່ມ
ທ່ານ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ,ຄະນະສະເພາະກິດ ເພື່ອປ້ອງກັນ ແລະ ແກ້ໄຂ ພະຍາດ COVID-19, ແຈ້ງໃຫ້ຮູ້ໃນວັນທີ 3 ເມສານີ້ວ່າ: ມາຮອດມື້ນີ້ຢູ່ລາວຍັງບໍ່ທັນພົບມີຜູ້ຕິເຊື້ອເພີ່ມ, ຫມາຍວ່າຕົວເລກຜູ້ຕິດເຊື້ອຍັງຢູ່ 10 ກໍລະນີດັ່ງຜ່ານມາ,ໃນຂະນະທີ່ທົ່ວໂລກມີ 204 ປະເທດ, ເພີ້ມຂື້ນອີກ 1 ປະເທດ ຄືມາລາວີ ແລະ ມີຈຳນວນຜູ້ຕິດເຊື້ອພະຍາດສູງເຖິງ 1 ລ້ານກ່ວາ ກໍລະນີແລ້ວ , ເພີ່ມຂື້ນ 79.747 ກໍລະນີ, ເສຍຊິວິດ 53.166 ກໍລະນີ,ເພີ່ມຂື້ນ 5.947 ກໍລະນີ ແລະ ປີ່ນປົວຫາຍດີ 212.018 ເພີ່ມຂື້ນ 18.029 ທຽບກັບມື້ກ່ອນນີ້.
ສະເພາະຢູ່ລາວເຮົາເຖິງວ່າຍັງມີຜູ້ໂດຍສານສືືບຕໍ່ເດີນທາງເຂົ້າປະເທດເປັນຈຳນວນບໍ່ຫນອ້ຍຄືນັບແຕ່ສອງວັນມານີ້ມີຜູ້ເດີນທາງເຂົ້າມາທັງໝົດ: 4.230 ຄົນ, ໃນນັ້ນຫລາຍກ່ວາຫມູ່ແມ່ນເດີນທາງມາຜ່ານຊາຍແດນທາງບົກລາວ-ໄທມີ 3.896 ຄົນ ແລະ ບັນດາທ້ອງຖິ່ນຕ່າງໆກໍໄດ້ເອົາໃຈໃສ່ກວດສຸຂະພາບ ແລະ ກັກບໍລິເວນເພື່ອຕິດຕາມອາການຂອງຈຳນວນຜູ້ໂດຍສານ ແລະ ແຮງງານລາວດັ່ງກ່າວ ແລະ ເຫັນວ່າມີກໍລະນີເປັນໄຂ້ 6 ຄົນ ທີ່ເດີນທາງມາຜ່ານດ່ານຊ່ອງເມັກ ແຂວງຈໍາປາສັກ.ຊຶ່ງປັດຈຸບັນພວມດຳເນີນການຕິດຕາມ ແລະ ກວດຫາເຊື້ອໂຄວິດຜູ້ຕ້ອງສົງໃສດັ່ງກ່າວ ແລະ ມາຮອດວັນທີ 2 ເມສາ ລວມມີ ກໍລະນີສົງໃສເກັບຕົວຢ່າງມາກວດທັງຫມົດ 22 ຄົນ ໃນນັ້ນນະຄອນຫຼວງວຽງຈັນມີ 11 ຄົນ,ຫຼວງນ້ຳທາ, ອຸດົມໄຊ ແຂວງລະ 3 ຄົນ, ແຂວງ ໄຊຍະບູລີມີ 2 ຄົນ, ສ່ວນ ຫຼວງພະບາງ, ຫົວພັນ, ວຽງຈັນ ແຂວງລະ 1 ຄົນ, ແຕ່ຜ່ານການກວດຜົນອອກມາ ເປັນລົບ ຖືວ່າມື້ນີ້ບໍ່ມີກໍລະນີໃໝ່.
ປະຈຸບັນຈຳນວນກໍລະນີໃກ້ຊິດສຳພັດກັບຄົນເຈັບ ທີ່ກຳລັງຕິດຕາມມີ 216 ຄົນ, ຢູ່ແຂວງອຸດົມໄຊ, ຫຼວງພະບາງ ແລະ ນະຄອນຫຼວງວຽງຈັນພວມຢູ່ໃນກຸ່ມແຍກປ່ຽວເພື່ອຕິດຕາມອາການຕໍ່ໄປ.
ປະຈຸບັນທິມງານແພດລາວໄດ້ສຸມໃສ່ເຮັດວຽກຮ່ວມກັບຊ່ຽວຊານຈີນຢ່າງເຄັ່ງຮ້ອນ ໂດຍສະເພາະ ໃນຂົງເຂດຄວບຄຸມການລະບາດ ແລະ ການຄຸ້ມຄອງ ປິ່ນປົວຜູ້ຕິດເຊື້ອ ແລະ ຄວບຄຸມບັນດາມາດຕະການຈຳກັດບໍລິເວນຢ່າງໃກ້ສິດ.
