ອັດຕະປື ເລັ່ງປະຕິບັດມາດຕະການປິດຮ້ານກິນດື່ມ ປ້ອງກັນໂຄວິດ-19

     ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງອັດຕະປື, ຄະນະກຳມະການຄວບຄຸມ, ປ້ອງກັນພະຍາດໂຄວິດ-19 ເພື່ອສະກັດກັ້ນການແຜ່ລະບາດຂອງຂັ້ນແຂວງ ໃຫ້ຮູ້ວ່າ: ປັດຈຸບັນແຂວງອັດຕະປືໄດ້ວາງມາດຕະການເຂັ້ມງວດປິດຮ້ານບັນເທີງ, ຮ້ານກິນດື່ມ ແລະ ຮ້ານຄາຣາໂອເກະ ເພື່ອສະກັດກັ້ນການແຜ່ລະບາດຂອງພະຍາດຮ້າຍດັ່ງກ່າວ ແລະ ເມື່ອມໍ່ໆມານີ້ ຂະແຫນງການກ່ຽວຂ້ອງຂອງແຂວງກໍໄດ້ນໍາເອົາເຈົ້າຂອງຮ້ານກິນດື່ມ 2 ແຫ່ງຢູ່ເມືອງສະໜາມໄຊມາສຶກສາອົບຮົມແນະນໍາໃຫ້ມີການປິດກິດຈະການຊົ່ວຄາວ ເພື່ອປ້ອງກັນການແຜ່ລະບາດຂອງພະຍາດຕາມຄຳສັ່ງຂອງຂັ້ນເທິງໃຫ້ເຂັ້ມງວດ.

     ຫົວຫນ້າພະແນກ ຖວທ ແຂວງ ໃຫ້ຮູ້ອີກວ່າ: ນັບແຕ່ມີແຈ້ງການຂອງລັດຖະມົນຕີກະຊວງ ຖວທ ກ່ຽວກັບການສັ່ງໂຈະ ຫລື ປິດຊົ່ວຄາວກິດຈະການການບໍລິການຕ່າງໆທີ່ພາໃຫ້ມີຊຸມຊົນຊຸມໜາແໜ້ນທີ່ຈະມີຄວາມສ່ຽງໃຫ້ແກ່ການແຜ່ລະບາດຂອງພະຍາດໂຄວິດ-19 ນັ້ນ, ທາງອຳນາດການປົກຄອງແຂວງກໍໄດ້ຊີ້ນຳໃຫ້ມີການຈັດຕັ້ງປະຕິບັດຄຳສັ່ງດ່ັງກ່າວຢ່າງເຂັ້ມງວດ ທັງໝົດ 108 ແຫ່ງ ແລະ ຍັງສັ່ງໃຫ້ໂຈະການຈັດງານບຸນປະເພນີຕ່າງໆ.