ອະດີດປະທານສະໂມສອນໂອລິມປິກມາກເຊີຍ ເສຍຊີວິດຫຼັງຈາກຕິດເຊື້ອໂຄວິດ-19

ໃນວັນທີ 31 ມີນາຜ່ານມາ ສຳນັກຂ່າວຕ່າງປະເທດໃຫ້ຮູ້ວ່າ: ປາເປ້ ດິຢຸບ ອະດີດປະທານສະໂມສອນໂອລິມປິກມາກເຊີຍ ທີມດັງໃນລີກເອິງຝຣັ່ງ ໄດ້ເສຍຊີວິດລົງແລ້ວດ້ວຍອາຍຸ 68 ປີ, ຫຼັງຈາກຕິດເຊື້ອໄວຣັສໂຄວິດ-19. ກ່ອນໜ້ານີ້ ປາເປ້ ດິຢຸບ ມີແຜນຈະເດີນທາງດ້ວຍເຮືອບິນຈາກດາກາໄປເມືອງນີສ ເພື່ອເຂົ້າຮັບການປິ່ນປົວໄວຣັສດັ່ງກ່າວ ແຕ່ຍັງບໍ່ທັນໄດ້ເດີນທາງ ອາການກໍຮຸນແຮງຂຶ້ນ ແລະ ເສຍຊີວິດລົງໃນທີ່ສຸດ.
ສຳລັບ ປາເປ້ ດິຢຸບ ເຊິ່ງເຄີຍເປັນອະດີດນັກຂ່າວ ແລະ ເອເຢນບານເຕະ, ໄດ້ຮັບຕຳແໜ່ງ ປະທານສະໂມສອນໂອລິມປິກມາກເຊີຍ ລະຫວ່າງປີ 2005-2009 ແລະ ມີສ່ວນຊ່ວຍສ້າງທີມຈົນສາມາດຄວ້າແຊ້ມລີກເອິງ 1 ສະໄໝໃນລະດູການ 2009-2010.